Malosi e sili atu nai lo lo Tatou Lava Malosi
Saunia e Elder David A. Bednar
O Le Korama a Aposetolo e Toasefululua
Mai le “O Le Togiola ma le Malaga i le Olaga Faitino,” Liahona, Aperila 2012, 12–19.
O le mana gafatia o le Togiola e faamalosia ai i tatou e fai ma ia amio lelei ma ia galulue ia sili atu i o tatou lava manao taitoatasi ma gafatia masani.
Ou te masalo ua sili atu le masani o le toatele o tagata o le Ekalesia i le natura o le mana faaola ma faamama o le Togiola, nai lo le mana faamalosi ma gafatia. E ese le iloa o Iesu Keriso na afio mai i le lalolagi e maliu mo i tatou—o se itu taua faalefaavae i le aoaoga faavae a Keriso. Peitai, e tatau foi ona tatou iloa talisapaia le finagalo o le Alii, e ala i Lana Togiola ma le mana o le Agaga Paia, ia ola i totonu ia i tatou—e le gata ia taitaiina ai i tatou ae ia faamamanaina ai foi i tatou.
Ua silafia e le toatele o i tatou afai tatou te faia ni mea sese, tatou te manaomia le fesoasoani e faatoilalo ai aafiaga o le agasala i o tatou olaga. Ua totogi e le Faaola le tau ma ua mafai ai ona tatou toe mama e ala i Lona mana togiola. O le toatele o i tatou ua malamalama lelei o le Togiola e mo e agasala. Ae, ou te le mautinoa, pe ua tatou iloa ma malamalama o le Togiola e mo le au paia foi—mo alii ma tamaitai lelei o e e usiusitai, agavaa, ma filiga ma ē o loo taumafai ina ia lelei atu ma auauna atu ma le faamaoni sili atu? Atonu tatou te talitonu sese e ao ona faia le malaga mai le lelei i le lelei sili atu, ma avea ai i tatou lava o ni au paia, e ala i lo tatou lava naunautai, finafinau, ma le lotopulea, faapea ai ma o tatou gafatia e mautinoa lava le faatapulaaina.
O le talalelei a le Faaola e le faatatau i le na o le aloese mai le leaga i o tatou olaga; ae e faatatau foi i le faia ma le avea ma ni tagata lelei. Ma o le Togiola ua tuuina mai ai le fesoasoani mo i tatou e faatoilalo ma aloese ai i mea leaga ae ia faia ma avea ma tagata lelei. E maua le fesoasoani mai le Faaola mo le malaga atoa o le olaga nei--mai le leaga i le lelei i le lelei sili atu ma ia suia ai o tatou natura moni.
Ou te le o fautuaina atu e faapea o mana togiola ma gafatia o le Togiola e ese ma motu ese mai. Nai lo o le na, o nei itu e lua o le Togiola e fesootai ma tutusa; la te manaomia ona faagaoioia i le taimi o vaega uma o le faigamalaga o le olaga. Ma e faavavau le taua mo i tatou uma ona iloa o nei elemene taua e lua o le faigamalaga i le olaga nei—o le tuu ese o le tagata o le lalolagi ae avea ma se au paia, o le faatoilaloina o le leaga ae avea ma se tagata lelei—e ausia e ala i le mana o le Togiola. O le naunautai ma le lotopulea o le tagata lava ia, lotomau ma le uunaiga, fuafua lelei ma le faatutuina o sini e manaomia, ae e matuai le lava lea mo i tatou e faamaeaina ai ma le manumalo ia lenei malaga i le olaga faitino. E moni lava, e ao ona tatou faalagolago “i galuega, ma le alofa mutimutivale, ma le alofa tunoa o le Mesia Paia” (2 Nifae 2:8).
Alofa Tunoa ma le Mana Gafatia o le Togiola
I le lomifefiloi o le Tusi Paia, ua tatou iloa ai o le upu alofa tunoa e masani ona faaaoga i tusitusiga paia e faauigaina o le mana gafatia:
O le [alofa tunoa o] se upu e ta’ua soo i le Feagaiga Tuai, ae maise lava i tusitusiga a Paulo. O le manatu autu lava o le upu o le, auala faalelagi e maua ai le fesoasoani po o le malosi, lea e ala mai i le alofa mutimutivale matamau ma le alofa o Iesu Keriso.
“E ala mai i le alofa tunoa o le Alii o Iesu, ma mafai e ala i Lana taulaga togiola, o le a siitia ai tagata i le tino ola pea, e maua e tagata uma lona tino mai le tuugamau i se tulaga o le ola e faavavau. E faapena foi e ala i le alofa tunoa o le Alii, ona maua e tagata taitoatasi, e ala i le faatuatua i le Togiola o Iesu Keriso ma le salamo i a latou agasala, maua le malosi ma le fesoasoani e fai ai galuega lelei, ia semanu e le mafai ona latou tausisia pe ana tuu e fai i a latou lava ala. O lenei alofa tunoa, o se mana gafatia lea e mafai ai e alii ma tamaitai ona maua le ola e faavavau ma le faaeaga pe a uma ona latou faia le mea sili latou te mafaia” (Bible Dictionary, “Grace”; ua faaopoopo le faamamafa).
O le alofa tunoa o le lagolago faalelagi po o le fesoasoani faalelagi lea e matuai manaomia lava e i tatou taitoatasi e agavaa ai mo le malo selesitila. O lea la, o le mana gafatia o le Togiola e faamalosia ai i tatou e fai ma ia lelei ma ia galulue ia sili atu i o tatou lava manao taitoatasi ma gafatia masani.
I a’u suesuega patino o tusitusiga paia, e masani ona ou tuuina i ai le faaupuga “mana gafatia” i soo se taimi ou te tau ai i le upu alofa tunoa. Mo se faataitaiga, mafaufau i le fuaiupu lenei lea ua tatou masani uma ai: “Ua matou iloa e faaolaina i tatou i le alofa tunoa, pe a uma mea uma e mafai ona tatou faia” (2 Nifae 25:23). Ou te talitonu e mafai ona tatou aoaoina ni mea se tele e uiga i lenei tulaga taua o le Togiola pe afai o le a tatou tuuina i ai le “mana gafatia ma le malosi” i taimi uma tatou te tau ai i le upu alofa tunoa i tusitusiga paia.
Faataitaiga a Nifae
Agavale: ata na tusia e Brian Call
O le faigamalaga o le olaga nei o le sau mai i le leaga i le lelei i le lelei sili atu ma ia suia ai o tatou natura moni. Ua tumu le Tusi a Mamona i faataitaiga o soo ma perofeta o e na silafia, malamalama, ma sa suia e le mana gafatia o le Togiola i le faia o lena faigamalaga. A’o tatou malamalama lelei i lenei mana paia, o le a faapea ona matuai faateleina ma faatamaoaigaina o tatou manatu faale-talalelei. O manatu faapena o le a suia ai i tatou i ni auala tulaga ese.
O Nifae o se faataitaiga o se tagata na silafiaina, malamalama, ma faalagolago i luga o le mana gafatia o le Faaola. Manatua foi na toe foi atalii o Liae i Ierusalema e aumai Isamaeli ma lona aiga i la latou faigamalaga. Sa fulitua Lamana ma isi o le vaega sa malaga faatasi ma Nifae mai Ierusalema e foi atu i le vao, ma sa apoapoai atu Nifae i ona uso ia faatuatua i le Alii. O le vaega lenei o le latou faigamalaga na saisai ai e uso o Nifae o ia i maea ma fuafuaina lona fasiotiga. Faamolemole e maitau le tatalo a Nifae: “Le Alii e, e tusa ma loʼu faatuatua ia te oe, sei e laveaia aʼu mai lima o oʼu uso; ioe, foai mai ia te aʼu le malosi ia mafai ai ona ou motusia o nei maea ua noatia ai aʼu” (1 Nifae 7:17; ua faaopoopo le faamamafa).
Tou te silafia le mea e masalo ou te tatalo ai pe ana faapea na saisai a’u e o’u uso? “Faamolemole aveese atu a’u mai lenei mea leaga I LE TAIMI NEI!” E faapitoa ona manaia ia te a’u ona sa le’i tatalo Nifae ina ia suia ona tulaga. Ae, sa tatalo o ia mo le malosi e sui ai ona tulaga. Ma ou te talitonu o le ituaiga tonu lenei o tatalo sa ia tatalo ai ona sa ia iloaina, malamalama, ma na aafia i le mana gafatia o le Togiola.
Ou te manatu o filifili sa noatia ai Nifae, sa le’i faamaneta ona toulu ese mai ona lima ma tapulima. Ae, ou te manatu sa faamanuiaina o ia i le finafinau ma le malosi patino na sili atu i lona gafatia e masani ai, ma “i le malosi o le Alii” (Mosaea 9:17) sa ia galue i ai ma milo ma toso ia noataga, ma iu ina mafai moni ona ia motusia ia maea.
O le aafiaga o lenei mea na tupu mo i tatou taitoatasi e tuusao lava. A o tatou malamalama ma faaaoga le mana gafatia o le Togiola i o tatou olaga patino, o le a tatou tatalo ma saili mo le malosi e sui ai o tatou tulaga nai lo le tatalo mo o tatou tulaga e sui. O le a avea i tatou ma sui e galulue nai lo o ni mea faitino e taugalueaina (tagai i le 2 Nifae 2:14).
E Silafia ma Malamalama le Faaola
Ua tatou aoaoina i le Alema fuaiupu e 7 le auala ma le mafuaaga ua mafai ai e le Faaola ona tuuina mai le mana gafatia:
“Ma o le a afio atu o ia, ma mafatia i tiga ma puapuaga ma faaosoosoga o ituaiga eseese uma; ma o le a oo ia te ia nei mea, ina ia mafai ona faataunuuina o le upu ua fai mai, o le a ia ave i ona luga tiga ma ma’i o ona tagata.
“Ma o le a ia ave i ona luga le oti, ina ia mafai ona ia tatalaina fusi o le oti ia ua noatia ai ona tagata; ma o le a ia ave i ona luga o latou vaivaiga, ina ia mafai ona faatumuina ona loto i le alofa mutimutivale, e tusa ai ma la le tino, ina ia mafai ona ia silafia e tusa ai ma la le tino, le ala e fesoasoani ai i ona tagata, e tusa ma o latou vaivaiga” (Alema 7:11-12; faaopoopo le faamamafa). Na puapuagatia le Faaola e le gata mo a tatou amioletonu ae mo le le tutusa, le le sa’o, le tiga, le mafatia, ma lagona atuatuvale e luitauina ai i tatou i le tele o taimi.
E leai se tiga faaletino, leai se ita o le loto, leai se puapuaga o le agaga, leai se ma’i po o le vaivai e te oo i ai pe ou te oo i ai i la tatou malaga i le olaga faitino e le’i oo muamua i ai le Faaola. I se taimi o le vaivai tatou te ono tagi atu ai, E leai se tasi na te iloaina pe faape’i. E leai se tasi e malamalama i ai. E leai se tasi e iloa.” Atonu e leai se tagata soifua na te iloa. Ae ua silafia ma malamalama atoa i ai le Alo o le Atua, aua sa Ia lagonaina ma tauave a tatou avega a’o le’i tatou tauaveina. Ma ona ua Ia totogiina le tau faaiu ma tauaveina lena avega, ua ia te Ia le tiga-alofa atoatoa ma e mafai ona ia faaloaloa mai Lona aao o le alofa mutimutivale ia i tatou i le tele o vaega o lo tatou olaga. E mafai ona Ia aapa mai, pa’i mai, fesoasoani,—e tamoe moni mai ia i tatou—ma faamalosia i tatou ina ia sili atu nai lo le mea e mafai ona tatou faia ma fesoasoani ai ia i tatou e faia le mea e le mafai ona tatou faia i le na o lo tatou faalagolago atu i lo tatou lava malosi.
“O mai ia te au, o outou uma o e tigaina ma mafatia i avega, o au foi e malolo ai outou.
“Ia outou amoina la’u amo, ma ia outou faaa’oa’o ia te au, aua o au le agamalu, ma le loto maulalo, ona maua lea e outou o le malologa mo outou agaga.
“Aua e avegofie la’u amo, o la’u avega foi e mama ia” (Mataio 11:28–30).
Ou te molimau atu e uiga i le, ma le agaga faafetai mo le taulaga e le iu ma faavavau a le Alii o Iesu Keriso. Ou te iloa o loo soifua le Faaola. Ua ou iloa Lona mana faaola ma Lona mana gafatia, ma ou te molimau atu o nei mana e moni ma avanoa mo i tatou uma taitoatasi. Ioe, “O le malosi o le Alii” e mafai ai ona tatou faia ma onosaia ma faatoilalo mea uma a’o tatou fetaomi atu i luma i la tatou faigamalaga o le olaga nei.