O le Mea Aupito Taua o Loo ia te A’u
E alala le tusitala i Pasila.
I le konafesi a le autalavou a siteki tuufaatasi, sa tofu maua ai e i matou uma se Tusi a Mamona ma sa valaaulia i matou e tuuina atu i se tasi. Sa ou manao e avatu la’u [Tusi a Mamona] i le tagata pese ma siva ou te fiafia lava i ai.
Ina ua ou iloa o le a fai sana konaseti i le matou nuu, sa ou mafaufau o le avanoa lelei lava la lenei, O ana konaseti taitasi e i ai se lulu e filifili ai ni tagata lagolago se 15 e o atu i tua o le tulaga e feiloai ia te ia. Na toetoe lava a le mafai ona filifilia, ae na ou lesitala lava.
O ni nai vaiaso a’o le’i faia le konaseti, sa ou tusia ai la’u molimau i totonu o se Tusi a Mamona ona ou tatalo lea. Sa ou faamatala atu i le Tama Faalelagi o le a faigata ona ou mauaina se avanoa, ma sa ou manaomia Lana fesoasoani.
O le taimi lava na ou fai atu ai “amene,” ae tatagi loa ma la’u telefoni i se valaau mai le ofisa o le alii pese. Sa filifilia a’u!
I tua o le tulaga i le aso o le konaseti, sa ou tuuina atu ai i le alii pese le tusi. Sa ia susueina ma faitau i la’u molimau: “Sa ou faaaluina se taimi tele e mafaufau ai i se meaalofa taua, ma aoga mo oe. Sa ou iloaina e tatau ona ou tuuina atu ia te oe se mea e taua ona o mea o loo i ai ae le ona o lona tau. O le Tusi a Mamona lenei; o le mea aupito taua o loo ia te a’u. O le a taua foi ia te oe pe afai e te faitau i ai.”
Sa ia fusiina a’u ma fai mai o le a ia faitau i ai. Sa le mafai ona taofiofi o’u loimata!
O se aafiaga e seasea tupu le tuuina atu o se Tusi a Mamona i se tagata lauiloa. Ae o le faasoaina atu o le tusi e tatau ona fai ma se aafiaga masani. Na mafai ona ou tuuina atu i se uo i le aoga, se tuaoi, po o soo se isi lava.
O le tuuina atu o se Tusi a Mamona, tuuina atu o a tatou molimau, talanoa e uiga i le Ekalesia, ma le avea ma se faataitaiga, o o tatou tiute ia. E le tatau ona tatou mama e faasoa atu le talalelei a Iesu Keriso.