Ia Maua le Lototele e Faasoa Atu ai le Talalelei
Ata na tusia e Michael Mullans
E manaomia le lototele e faasoa atu ai le talalelei i se tagata ese. Tau lava o le fesili i se faifeautalai faamisiona fou. O nisi taimi e sili atu le lototoa e manaomia e fai atu ai i au uo pe latou te fia iloa e uiga i le Ekalesia, le Tusi a Mamona, po o tatou talitonuga.
E te mafaufau faapea: Ae faapefea pe a latou le mananao ai? Ae faapefea pe a latou le fiafia ai? Ae faapefea pe a latou ula mai ai ia te a’u? Ae faapefea pe a latou fai mai, ua feita ia te a’u ma e le toe fia vaai lava ia te a’u?
Aua le popole. E le o le mea moni lena o le a tupu. Atonu o le a na ona faapea mai o au uo, “Leai, faafetai.” Ae aua le te’i pe a tali mai nisi, “Ua lelei, faamatala mai nisi mea ia te a’u”—ae maise lava pe afai o loo e ola i le talalelei.
Na saunoa mai Elder M. Russell Ballard o le Korama a Aposetolo e Toasefululua: “O i tatou o tagata o le Ekalesia toefuataiina a Iesu Keriso, ua faamamanaina ma auina atu e le Alii lava Ia e saili, fafaga, ma aumai ma le saogalemu i totonu o Lana Ekalesia i latou o e o loo saili e fia iloa le upumoni.”
Mai lena vaaiga, o le faasoaina atu o le talalelei e “faigofie ma manino.” Ae na ioeina e Elder Ballard, “o le galuega faafaifeautalai e mafai ona luitauina ma o nisi taimi e taufaafefe ai.”
E mafai faapefea ona tatou faatoilaloina lenei fefe? E tolu auala ua ta’ua i lalo na fautuaina mai e Elder Ballard:
Muamua, tatalo na o oe lava ma faatasi ma lou aiga ina ia fesoasoani mai le Alii ia te oe e saili ni auala e faasoa atu ai le talalelei. (Tagai i le faalava o loo i le autafa e iloa ai le mea na faia e se tamaitai talavou i Pasila.) Ma le isi, ole atu i le Alii e taitai atu oe ia i latou o e ua sauni.
Lona lua, avea ma se faataitaiga. I se lalolagi ua olopalaina ona tulaga faatonuina, o le a faapea ona matauina e au uo ia lou susulu. O lou lava tulaga agavaa o le a tuuina atu ai ia te oe le lototele ma le malosiaga faaleagaga.
Lona tolu, faaaoga le faatuatua ma faalagolago i le Alii ma ia faaali atu e le aunoa le alofa i isi.
“Fai mai nisi o le au paia, ou te fefe e faasoa atu le talalelei ina ne’i o’u faatiga ai i se tasi,” o le saunoaga lea a Elder Ballard. “O mea ua tutupu ua faaalia ai, e le feita tagata pe afai o le faasoa na faaosofia e le agaga o le alofa ma le popole alofa. E faapefea ona ita se tasi pe a tatou fai atu se faaupuga faapenei: ‘Ou te fiafia lava i le auala ua fesoasoani ai la’u ekalesia ia te a’u’ ona faaopoopo atu lea ma soo se mea e faatonu ai e le Agaga”?1
O le tiute e faasoa atu le talalelei e a tagata uma o le Ekalesia--e aofia ai ma oe. O lea ia lototele ma tuu atu i le Alii e faamanuia i au taumafaiga.