Sa Ou Fai Atu Pea lava Pea
O le tusitala e sau mai São Paulo, Pasila.
Sa ou iloa e tatau ia i tatou uma ona faasoa atu le talalelei, ae e le’i faamanuiaina ai lava a’u. Ona oo lea, i le taimi o se mataupu faaSipaniolo sa ou aveina, sa ou feiloai ai i se alii talavou e igoa ia Tiago. Sa avea i maua ma se uo ma sa masani ona ma savavali faatasi atu i le fale mai le aoga. I se tasi aso sa ma ui atu ai i luma o se falesa o le AAG sa le’i leva ona fausia.
Sa ou faapea atu, “Ua avea au ma se tagata o le Ekalesia a Iesu Keriso o le Au Paia o Aso e Gata Ai mo ni nai tausaga.” Sa ou faasoa atu ia te ia nisi o mea tatou te talitonu i ai, ma ta’u atu ia te ia le faamanuiaina tele o i matou ma lo’u aiga ona o le talalelei. Sa ou valaauliaina o ia e auai mai i sauniga o le Aso Sa a sau i le 9:00 i le taeao.
Na oo i le Aso Sa ma sa ou faatalitali ma le naunautai, peitai sa le’i sau o ia. O lena vaiaso, sa ou toe valaauliaina ai o ia. Sa faaauau pea lenei mea i vaiaso uma mo le lua pe tolu masina. Sa ia ta’uina mai ia te a’u i taimi uma se mafuaaga na le sau ai: “Na ou moe umi,” “Sa ou lelava,” “Sa i ai faafitauli.” Ae sa faaauau pea ona ou fai atu ia te ia, ma sa foliga mai sa le’i afaina ia te ia.
I le taeao o se tasi Aso Sa, sa ou saofai ai i se nofoaumi e lata i le pito i tua o le falesa. Sa i ai lava nai minute na totoe ona faatoa amata lea o le sauniga ae valaau malie mai loa e se tagata i lo’u igoa. Sa ou tilotilo atu i le faitotoa, sa i ai iina Tiago!
“Pe ou te le’i folafola atu ea ia te oe e i ai se aso ou te sau ai?” na ia fai mai ai. Sa auai o ia i le sauniga faamanatuga, ma i lo’u te’i, sa nofo foi mo isi sauniga na totoe ma sa foliga mai sa fiafia ina ua ou faailoa atu o ia i faifeautalai. Sa amata ona latou feiloai soo. Sa faaauau ona ma talanoa ma Tiago a’o ma savavali atu i le fale mai le aoga, ae o a ma talanoaga sa faatatau i upumoni sa ia aoaoina. Sa mafai ona ou taliina fesili ma tuu atu i ai la’u molimau. Mulimuli ane, ona maua ai lea o lana ia lava molimau ma auai i le Ekalesia.
O le taimi nei o loo avea a’u o se faifeautalai faamisiona i le Misiona a Pasila Santa Maria. Ae ou te le’i alu atu mo le galuega faamisiona, sa auina atu foi e Tiago lana talosaga e fia avea ma se faifeautalai faamisiona, ma o loo auauna atu nei i le Misiona a Pasila Manaus.
Talu ai nei lava na ou mauaina ai se tusi mai ia te ia. “Faafetai lava mo le valaauliaina pea lava pea o a’u e sau i le lotu,” na ia tusi mai ai. “O le a faavavau lou agaga faafetai.” Ua ou fiafia e le gata ina faasoa atu le talalelei i aso uma, ae i le iloa foi o loo faia e Tiago lea mea e tasi.