Faamatalaina o Mealilo
“Pei na ou alofa ia te outou, ia faapea na outou fealofani” (“Ia Fealofani,” Viiga, nu. 195).
Pe o se mealilo lenei sa tatau ona taofia e Luisa?
Na tapuni e Luisa lana tusi numera ina ua ta le logo. Ma le isi, sa le’i mafai ona taulai atu o ia i fesili i le itula e tasi ua mavae atu.
Sa nanati atu i fafo isi tamaiti aoga uma. O le vasega mulimuli o le Aso Faraile. Sa masani lava ona lagona e Luisa le fiafia ona o le faaiuga foi o le vaiaso. Ae o le aso, sa le mafai ona ia lagonaina se mea ae na o le popole. Sa le’i mafai talu mai le malologa umi. O le taimi lena na fesili atu ai lana uo lelei, o Salota ia te ia: “E mafai ona e taofia se mealilo?”
O le taimi lena, na faalagolago atu ai Luisa ma luelue [lona ulu] ma le naunautai. Sa lelei o ia i le taofiofia o mealilo. Sa mafaufau o ia, e mautinoa lava o le a ta’u mai e Salota ia te ia e uiga i se tamaitiiti aulelei na fia alu i ai.
Ae peitai o le mealilo a Salota, sa leai ma se malie.
Sa faasalavei ane se leo i mafaufauga o Luisa. Sa emo ma ea a’e i luga mai lana kesi. “Na i ai sau fesili e uiga i le meaaoga, Luisa?” na fesili atu ai lona faiaoga. Ua tuua e isi tamaiti aoga uma le potu.
“Leai,” o le tali atu lea a Luisa. Sa tau atu lana vaai i mata o le faiaoga. E tatau lava ona ia ta’uina atu i se tasi! Ae peitai na faatauto o ia e Salota e aua le tauina.
“E tatau ona ou alu e pu’e le pasi,” o le oso vave atu lea a Luisa. Sa ia faamaulu lona ofutele ma topetope atu i fafo i le ea malulu o le taumalulu.
O le taimi atoa na alu atu ai le pasi i le fale, sa lagona e Luisa le popole o lona loto o lea sa tau le mafai ai ona ia onosaia. Sa pei e fufusi lona fatafata, sa pei e faigata ona manava.
Sa le mafai e Luisa ona taofi le mafaufau i le mealilo a Salota. I le malologa umi, na fai atu ai Salota sa ia faia se mea matautia. Sa le mafai lava e Luisa ona talitonu i le mea na ia faalogoina. Sa faapea ua masani o ia i lana uo lelei! Sa le mafai ona ia vaai faalemafaufau e mafai ona fai e Salota se mea taufaafefe faapena. Ina ua uma le malologa umi, sa faatauto e Salota ia Luisa ia aua lava ne’i tauina atu i se isi.
Ae faapefea pe a lavea ai Salota?
Sa taumafai Luisa e poloka i fafo taliega ma talanoaga sa siomia ai o ia i totonu o le pasi a’o moeiini ona mata ma tatalo i lona loto.
“Faamolemole, le Tama Faalelagi, fesoasoani mai ia ou iloa le mea e tatau ona fai. Ou te le manao e ita la’u uo ia te a’u. Ae ou te le manao foi e tupu se mea leaga ia te ia. I le suafa o Iesu Keriso, amene.”
O le savali atu i le fale na pei e umi nai lo le mea na masani ai. Mata e le iloa e Tina se mea ua faaletonu pe a oo atu Luisa i le fale? O le a sana tala e fai atu i ai?
O le tilotilo atu i le kiona i luga o le eleele, na manatua ai e Luisa le taugaaisa na la amataina ma Salota ma nisi tamaiti i le paka i le vaiaso na te’a. Sa matuai malie tele lena mea! Sa mafaufau o ia i isi mea la te fiafia ma Salota e fai faatasi. Tafafao faatasi. Savaliga sopo. Faiga o meaaoga. Taaalo i taaloga
Mata o le a faapei pe afai e ta’u e Luisa lana mealilo ma le toe manao ai Salota e toe avea o ia ma ana uo? O le manatu na atili fufusi ai le manava o Luisa.
Ona oso ae lea o se isi ona manatu O le taimi nei o le mea e sili ona taua o le mea lea e sili ona lelei mo Salota—ae e le o le mea e ono mafaufau i ai Salota e uiga ia te ia. E manaomia e Salota se uo moni, o se uo o le a fesoasoani ia te ia ia saogalemu. Na iloa e Luisa sa faia e le aunoa e Iesu mea e sili ona lelei mo isi, e tusa lava pe na le fiafia ai isi tagata ia te Ia.
Sa iloa e Luisa le mea na tatau ona ia faia. E tatau ona ia talanoa ia Tina e uiga i ai. O le a valaau atu o ia ia Salota ma ta’u atu i ai lona popole ma e tatau ona fesoasoani mai se tagata matua. Ma atonu foi o le a talanoa atu ai Salota i lona tina.
Sa mama teisi le loto o Luisa a’o savali atu o ia i le faitotoa pito i luma.
“Tina?” o lana valaau lea a’o savali atu i totonu. “E mafai ona ta talanoa?”
Atonu o le a iu ina ita Salota, ae na iloa e Luisa o le mea sa’o lenei e tatau ona fai. O le a avea o ia ma se uo moni.
O nisi mealilo e matuai taua tele mo le taofiofia.