Mo Tamaiti Laiti
Moe i le Aso Toonai ma ’Ataata i le Aso Sa
E alala le tusitala i Iuta, ISA.
“Ou te lagona le fiafia i taimi uma pe a ou alu i le lotu” (Children’s Songbook, 157).
E fiafia lava Mara e faa’ataata tagata. Sa ia faa’ataataina lona faiaoga i le aoga ina ua sii lona lima e fai atu ni fesili. Sa ia faa’ataataina lona uso o Masela ina ua ia fai atu ni upu lelei ia te ia.
Ona ataata foi lea o Mara. E manaia le lagona e maua i le fesoasoani i isi ia fiafia.
Ae sa i ai se taimi se tasi i vaiaso taitasi e tau le ataata ai lava Mara. O lena taimi o le taeao po o le Aso Sa. O le taimi lena e aupito sili ai lava ona lelavava ai ia Mara ma Masela. O le nanati solo e sauni mo le lotu na atili ai lo la to’u. Ona sosoo ai lea ma le savaliga umi i le lotu. Sa sili atu ma le maila le mamao! E masani lava ona tuai le taunuu atu i ai o Mara ma Masela. La te misia le vaega muamua o le Peraimeri.
“Matou te misia lava oulua pe a oulua le vave oo mai iinei,” o le tala lea a Sister Lima i se tasi o aso. O ia o le peresitene o le Peraimeri o le latou uarota i Pasila.
Na iloa e Mara e tatau ona ia vave oo atu i le lotu. Ae e faapefea? Ona i ai lea o se manatu o Mara. O le isi po o le Aso Toonai na sosoo ai, na tonu ai ia Mara e faataitai se mea fou.
Nai lo o le ai nanaina o meaai faavaiaiga pe a uma le taumafataga o le po, sa fufulu e Mara ona nifo. O le tele lava o aso e tatau ai lava ona faamanatu e Tina i teineiti e tape le televise ae o e momoe. Ae e tusa foi lava, la te taaalo ma taumusumusu i lalo o o la ieafu seia oo i le leva o le po. O nisi taimi e feala umi ai lava lea e tau le mafai ai ona pupula o la mata. Na tatau ai ona la feminoia’i ina ia aua ai ne’i o la momoe.
O le po lenei sa faamaulu ai e Mara lona ofumoe ma oso sa’o loa lava i luga o le moega. Sa tau le faamanatuina atu e Tina ia te ia. Sa amata ona tilotilo solo i ata o loo i luma o lana Tusi a Mamona.
“O le a lau mea na e fai?” Sa fesili ai Masela.
“O se suega,” o le tala lea a Mara. Sa tumu lona mafaufau i mafaufauga fiafia. Ma le isi o lea ua amata ona tautulemoe.
O le mea na sosoo ai na iloa e Mara, ua onoono atu le susulu o le la i lona faamalama. Na toeitiiti lava oo i le taimi e sauni ai mo le lotu. Nai lo le lagona o le inoino, sa lagona e Mara le fiafia. Sa le’i pei e nenefu lona mafaufau. Sa le’i lagona e lona tino se lelava.
Sa taunuu atu o ia i le Peraimeri a o le’i oo atu nisi o taitai.
“Faafetai lava mo le avea ma se faataitaiga lelei tele i isi tamaiti,” o le tala lea a Sister Lima.
Ia o le taimi la lea o Mara e ataata ai. Sa tonu ia te ia o le a vave alu i taimi uma e moe i le Aso Toonai. O le auala lena o le a mafai ai ona ia faasoa atu le ataata i le Aso Sa atoa.