Mga Ideya sa Family Home Evening
Kini nga isyu naglangkob og mga artikulo ug mga kalihokan nga mahimong magamit alang sa family home evening. Ang mosunod mao ang duha ka mga ideya.
“Kon ang mga Pagduha-duha ug mga Pangutana Motumaw,” pahina 38: Human og basa niining artikulo, ikonsiderar sa paghisgut isip pamilya ang kalainan sa mga pangutana ug pagduha-duha. Basaha ang kasaysayan sa mga tawo diha sa kasulatan kinsa adunay mga pangutana ug unsay ilang gibuhat kabahin niini (sama pananglit, 1 Nephi 11; Ether 2:19–3:16; Joseph Smith—Kasaysayan 1:10–19; o ang mga pakisayran nga anaa sa endnote 1 sa artikulo).
Mahimo mo nga mohangyo sa pipila ka sakop sa pamilya sa pagpangutana. Dayon gamita ang kasulatan, lds.org/topics, o personal nga mga kasinatian sa pagtubag. Ang pagpalambo og palibut sa pagkadayag ug pagkamatinuoron sa panimalay makatabang sa mga sakop sa pamilya nga mobati nga komportable sa pagpangutana.
“Pag-andam alang sa Pasko sa Pagkabanhaw,” pahina 70: Sa dili pa mag-family home evening, mahimo mo nga mosulat sa pipila ka mga hagit matag adlaw diha sa ginunting nga mga papel. Sama pananglit, “Mibati mo og kasuko sa dihang ang inyong igsoong lalaki dili mopakigbahin sa iyang mga dulaan ninyo,” o “Nakamatikod ka nga usa ka gabii si papa nagguol sa iyang pag-uli gikan sa trabaho.” Hangyoa ang mga bata sa pagpuli-puli og pili sa ginunting nga papel, basahon ang sitwasyon, ug mosugyot kon unsang paagi sila mahisama sa Manluluwas niana nga sitwasyon. Ipaila-ila ang kalihokan sa Pasko sa Pagkabanhaw niining artikulo ug dapita ang tanan ninyong mga anak sa pagdawat sa pito ka adlaw nga hagit sa pagkat-on kabahin ni Jesukristo ug sa pagsunod sa Iyang ehemplo.