Kinahanglan Ka nga Mag-ampo
Jimy Saint Louis, Haiti
Mga paghulagway pinaagi ni Bradley H. Clark
Niadtong Enero 12, 2010, ang Langitnong Amahan mipakita kanako sa Iyang gahum human ang upat ka andana nga konkreto nga building nahugno diha nako ug sa akong palibut human sa grabeng linog nga migun-ob sa Haiti.
Samtang nagsyagit nga nadat-ugan sa mga tinumpag, usa ka malinawong tingog ang misulti kanako: “Jimy, nganong dili ka mag-ampo imbis nga mosyagit?”
Dili ko makapugong sa pagsyagit, tungod kay nahadlok ko nga mamatay sulod sa pipila ka minuto. Ang tingog, sama sa tingog sa buotan nga higala nga madasigon kaayong motabang, namulong kanako pag-usab: “Jimy, kinahanglan ka nga mag-ampo.”
Ang kasakit sa akong paa hapit na nga dili maagwanta, ug hapit nako mahutdan og oxygen diha sa kangitngit sa akong palibut. Ang tingog mibalik pa pag-usab: “Jimy, kinahanglan ka nga mag-ampo.”
Niining higayona wala nako magmagahi. Sa luya nga tingog miingon ko: “Langitnong Amahan, Ikaw nasayud sa akong kalig-on, ug Ikaw nasayud hangtud kanus-a nako maagwanta kining sakit. Mangamuyo ko Nimo, palihug kuhaa kining kasakit kanako. Sa pangalan ni Jesukristo, amen.”
Diha-diha dayon human og sulti niining yano nga pag-ampo, nakatulog ko. Wala nako kahinumdom sa nahitabo paghuman niadto, apan sa dihang nakamata ko gikan sa lawom nga pagkatulog, ang kasakit nawala. Pagkataud-taud niadto, ang mga tigluwas [rescuers] nakakita nako samtang sila nangita sa mga biktima diha sa nagun-ob nga office building.
Pagkahuman akong nahibaloan nga sa lima ka mga trabahante diha sa ikaduhang andana sa Port-au-Prince building kon asa ko nagtrabaho, ako lang ang nakagawas nga buhi. Tungod sa kadaut, kinahanglang putlon ang usa sa akong paa ug migahin og pipila ka bulan sa ospital. Apan nasayud ko nga ang Espiritu Santo midasig nako sa pag-ampo ug ang Langitnong Amahan mitubag niadtong pag-ampo.
Makapamatuod ko nga ang Langitnong Amahan motubag sa atong mga pag-ampo sa Iyang kaugalingong paagi ug sumala sa Iyang gusto—bisan asa kita ug bisan kanus-a kita mag-ampo.