Nakaila Ko sa Tingog sa Propeta
Miriam Ruiz, Utah, USA
Usa ka Dominggo sa gabii mga tulo ka bulan human ako mibalhin gikan sa Mexico ngadto sa Estados Unidos aron moeskwela, namili ko sa daghang mga estasyunan sa radyo aron makapaminaw og musika sa Dominggo. Samtang naminaw ko sa daghang mga lokal nga mga estasyunan, nakadungog ko og pamilyar nga tingog ug mihunong.
Nagtuo ko nga ang tingog iya ni Presidente Gordon B. Hinckley (1910−2008), kinsa mao ang Presidente sa Simbahan nianang higayona. Nakaamgo ko nga makatingala nga makaila ko sa iyang tingog. Naanad ko nga maminaw sa kinatibuk-ang komperensya, Church Educational System firesides, ug ubang mga sibya sa Simbahan pinaagi sa tingog sa usa ka Katsila nga maghuhubad nga nagsulti puli sa tingog sa mamumulong. Pero morag nakaila gyud ko nga ang tingog diha sa radyo iya ni Presidente Hinckley.
Dili pa kaayo ko makamao sa Iningles aron makasabut unsay iyang gisulti, apan naminaw lang gihapon ko sa pakigpulong diha sa radyo. Ang iyang tingog nakahatag og kalinaw. Sa dihang nahuman na ang pakigpulong, ang tigbalita sa radyo miingon, “Bag-o lang natong nadunggan si Presidente Gordon B. Hinckley.”
Nasayud ko nga ang Ginoo mamulong pinaagi sa Iyang mga sulugoon ug nga bisan ang mensahe gikan sa Iyang kaugalingon nga tingog o gikan sa Iyang mga propeta, kini managsama ra (tan-awa sa D&P 1:38).
Naghunahuna ko nga talagsaon kaayo nga ako nakaila sa tingog ni Presidente Hinckley. Nga nakahimo sa ingon nakapaamgo nako nga ako gusto kanunay nga makaila sa tingog nga gigamit sa Ginoo sa pagpakigsulti sa Iyang mga anak—bisan pa sa tinubdan.
“Ang akong mga karnero nagapatalinghug sa akong tingog, ug ako nakaila kanila, ug sila nagasunod kanako,” miingon ang Manluluwas (Juan 10:27).
Sa kalibutan nga puno sa daghang mga tingog—daghang “mga estasyunan”—nga kapilian, manghinaot ko nga kanunay nga takus nga makaila sa tingog sa akong Magbalantay ug sa Iyang mga sulugoon ug andam nga mosunod sa ilang tambag.