Unsay Among Nakat-unan gikan sa Among mga Ginikanan
Ang mga young adult mipakigbahin kon sa unsang paagi ilang gigamit ang mga leksyon nga ilang nakat-unan gikan sa ilang mga ginikanan.
Pagkugi sa Trabaho
Sa akong panimalay nakakat-on ko nga magkugi. Ang akong pamilya naggamit og sistema nga among gitawag og “listahan sa kakugi.” Sa sinugdanan sa bulan, makadawat mi og lista sa lain-laing mga buluhaton, sama sa pagpanghugas, pag-atiman sa mga kabayo, ug uban pa. Among tsikan ang buluhaton inigka human niini, ug dayon sa pagtapos sa bulan, hatagan mi og kantidad sa kwarta sumala sa among pagkugi basi sa gidaghanon sa tsik nga among nabutang sa tsart. Gikan niini nakakat-on ko nga magkugi sa trabaho ug magkontrol sa paggasto sa kwarta.
Peter Stegeby sa Västerbotten, Sweden
Matarung nga Pagkaginikanan
Isip single parent, ang akong inahan daghan kaayo og mga buluhaton, apan mogahin gyud siya og panahon sa pagtabang, paghupay, o yanong pagpaminaw nako. Ang masayud nga anaa siya kanunay bililhon gyud kaayo, ug gusto ko nga ihatag usab kini sa akong mga anak sa umaabut.
Sa dihang naminyo siya og usab, ang iyang bag-ong bana mipili nga mahimong amahan sa akong magulang ug kanako. Sa wala madugay, aduna mi manghud nga gamayng babaye, apan wala gyud koy mabati nga kalainan sa mabination ug mahigugmaong paagi sa iyang pag-atiman kanamo isip iya mismong mga anak. Salamat sa iyang batasan, ang akong magulang ug ako nagdako sa lig-on ug nagkahiusang pamilya uban sa priesthood diha sa balay. Ang adlaw nga kami nabugkos isip pamilya epesyal gyud kaayo. Ang iyang mahigugmaong ehemplo nagtudlo nako nga ang amahan dili lang kon unsa ka—apan unsa ka nga mamahimo.
Amanda Cornelius sa Stockholm, Sweden
Balaanong Proteksyon
Sa bata pa ko, ang akong papa nagtrabaho sa layo nga dapit ug kanunay moabut nga gabii na. Magmata ko hangtud nga moabut siya. Apan usa ka gabii dugay kaayo siyang miabut, ug dili nako siya makontak sa telepono. Nahadlok kaayo ko. Nakahinumdom ko sa gisulti sa akong mga ginikanan nga mag-ampo kanunay ug mangayo og tabang kon mahadlok ko, busa miluhod ko ug nag-ampo nga luwas lang nga makauli ang akong papa. Sa akong katingala, sa pagtapos sa akong pag-ampo, nadunggan nako ang pag-abut sa bisikleta sa akong papa sa gawas. Mapasalamaton kaayo ko sa akong Langitnong Amahan sa pagbantay sa akong papa.
Isip usa ka young adult, kon ako maglibog o mahadlok, ang unang tawo nga akong mahinumduman mao ang Langitnong Amahan. Nasayud ko nga naa Siya kanunay ug Siya maminaw sa akong mga pag-ampo.
Rohini Krishnan sa Bangalore, India
Pag-ampo
Usa ka gabii miadto ko sa kwarto sa akong mga ginikanan kay aduna koy ipangutana sa akong papa, apan siya nagluhod diha sa pag-ampo, busa milakaw ko ug mibalik pipila ka minuto nga anaa gihapon siya sa samang posisyon. Mihukom ko nga mangandam aron matulog, naghunahuna nga siguradong mahuman na siya og ampo kon mahuman ko sa akong buluhaton sa dili pa matulog. Mibalik ko sa kwarto sa akong ginikanan paglabay sa mga 10 minutos nga nag-ampo gihapon siya! Nakakita nianang ehemplo gikan sa akong amahan nakapalig-on sa akong pagpamatuod. Siya sa tinuoray kinasingkasing gyud nga nag-ampo sa Langitnong Amahan.
Jen Hansen sa Idaho, USA
Kaminyoon didto sa Templo
Mapasalamaton ko nga ang akong mga ginikanan mipakigbahin sa istorya sa ilang relasyon ngari nako. Nahimong silang maayo nga managhigala sa edad nga 14, ug dungan nga nagdako ug nag-eskwela. Paglabay sa panahon, ang ilang panaghigalaay milambo ngadto sa matuod nga gugma, ug sila naminyo sa templo. Nagplano ko nga sundon ang ehemplo sa akong mga ginikanan nga magminyo sa templo ug naglaum nga makasinati ko og kalipay ug tinuod nga gugma sama kanila.
Pasăre Ana Maria sa Prahova, Romania
Panimalay nga Nakasentro kang Kristo
Si Jesukristo kanunay anaa sa sentro sa relasyon sa akong mga ginikanan. Ilang gitutokan ang paghimo og panimalay diin maanaa ang Espiritu ug himoong prayoridad ang pagtuon sa kasulatan uban ang pamilya, pag-ampo sa pamilya, ug ang family home evening.
Ang akong inahan gitawag nga mag-visit teach sa usa ka batan-ong inahan kinsa nanlimbasug sa bag-ohay lang nga diborsyo. Kadaghan mouli ko sa balay nga nakita akong mama nga nagbantay sa duha ka batang lalaki niini nga babaye. Usahay kami mohapit sa balay niining babaye samtang kami mamalit, ug ang akong mama magbilin og gamayng sulat sa pultahan. Mapasalamaton ko sa ehemplo sa akong mama nga ang gugmang putli “dili mangita alang sa iyang kaugalingon” (Moroni 7:45).
Ang akong mga ginikanan kanunay nagkat-on ug naggamit sa ilang bag-ong mga kahanas ug kahibalo sa pagtukod sa gingharian sa Dios. Tungod sa ilang ehemplo, akong gihimo ang edukasyon nga prayoridad sa akong kinabuhi. Ang ehemplo sa akong mga ginikanan nakapahimo nako nga maminyo sa usa ka lalaki kinsa si Jesukristo mao usab ang sentro sa iyang kinabuhi.
Rachel Nielsen sa Utah, USA
Magsalig sa Langitnong Amahan ug ni Jesukristo
Ang akong papa makaayo sa tanang butang. Isip usa ka tin-edyer, nangutana ko niya kon giunsa niya nga makaayo og tarung sa mga butang. Siya miingon, “Sa dili pa siya magsugod og trabaho, mag-ampo ko nga mangamuyo sa Langitnong Amahan sa pagtabang nako. Dayon motrabaho ko.” Ang iyang ehemplo nagtudlo kanako nga magmapainubsanon ug tinguhaon ang langitnong inspirasyon.
Kon ang akong inahan mawad-an og kadasig, nakakaplag siya og kaayohan ug kalinaw diha sa tiilan sa Manluluwas. Kon ako adunay susama nga mga panghitabo, siya modasig nako nga mosalig sa gahum sa Pag-ula. Isip usa ka young adult, padayon nakong makaplagan ang kalinaw ug makahupay nga gugma sa Manluluwas pinaagi sa pagsunod sa iyang matarung nga ehemplo.
Isak Malm sa Jönköping, Sweden
Diosnong Kinaiya
Sa dihang bata pa ko, ang akong mga ginikanan natisok ngari kanako ang gugmang putli gikan sa akong Amahan sa Langit. Nailhan nako Siya samtang ang akong mama mokanta og “Ako Anak sa Dios” (Mga Himno ug mga Awit sa mga Bata, nu. 58) ngari kanako, ug sa paglabay sa panahon ang ehemplo sa akong mga ginikanan nahimong talagsaon nga inspirasyon aron masayud ug mohigugma sa akong Amahan sa Langit pinaagi sa pagserbisyo ug sa matinud-anong pagtambong sa mga miting ug kalihokan sa Simbahan.
Marlin Ortega Vásquez sa Managua, Nicaragua