Kami Namulong kang Kristo
Ang Matag Pagsulay Makalig-on sa Pagtuo
Ang tagsulat nagpuyo sa Sardinia, Italy.
Isip siyete anyos nga bata, sa dihang akong nasayran nga ang akong amahan namatay tungod sa aksidente, nag-ampo ko og milagro.
Sa dihang bata pa ko, usa sa akong paborito nga bahin sa adlaw mao ang pagpaabut sa akong papa nga moabut gikan sa trabaho. Motan-aw ko sa bintana ug magtan-aw kaniya nga nagpadulong, ug akong iphon ang iyang mga lakang padulong sa balay, naghinam-hinam sa kalipay nga iyang dala. Wala ko magtuo nga magpakabuhi nga wala na kana nga pagbati.
Usa ka adlaw sa dihang siyete anyos pa ko, imbis nga ang akong amahan, may miabut nga tawo nga guol ang nawong nga nagbarug sa may pultahan ug miingon namo nga ang akong amahan namatay tungod sa aksidente.
Niadtong adlawa wala ko katingog. Akong gitan-aw ang akong kwatro anyos nga manghud nga lalaki ug akong inahan, nga bata pa kaayo ug nag-inusara, ug wala ko mohilak. Wala ko maghunahuna nga kini tinuod, busa miadto ko sa may bintana ug mitan-aw sa dalan. Misugod ko sa pagbati og bug-at nga pwersa nga midat-og sa akong mga abaga, bug-at nga pagbati nga dili ko normal nga makaginhawa, usa ka gibug-aton nga nakapaguol nako.
Wala madugay human sa kamatayon sa akong amahan, nag-inusara ko nga miadto sa kwarto sa nagkasalup nga adlaw ug, sama sa gitudlo kanako, nag-ampo sa akong Langitnong Amahan. Nangamuyo ko Niya nga makita nako pag-usab akong amahan, para lang makagakos kaniya. Sa akong kasingkasing sigurado ko nga ang Langitnong Amahan makahatag nako niining milagro.
Nianang adlawa wala ko makakita sa akong amahan o makagakos kaniya, apan mas sobra pa akong nadawat. Mora og akong nabati ang mga kamot sa Manluluwas nga anaa sa akong abaga. Ang iyang presensya ingon og hapit na makita samtang Iyang giwala ang bug-at nga pagbati diha sa akong dughan.
Paghulagway pinaagi ni James Johnson
Karon, sobra na sa 20 ka tuig ang milabay, kana nga paghupay wala gayud mawala kanako. Usahay mibati ko og kaguol apan dili kahaw-ang tungod sa pagkamatay sa akong amahan. Ako makahinumdom ug makakita kon kapila ang Espiritu naghupay, nagtabang, ug nagpakita kanako sa paagi aron masunod ang bililhong mga pamaagi sa Manluluwas. Akong mabati ang Iyang presensya sa akong kinabuhi, salamat niadtong una nga pagsulay, nga nagtabang nako nga makakita sa matag adlaw nga pagsulay uban sa mahangturong panglantaw. Nasayud ko nga ang ebanghelyo sa atong kinabuhi ang nakapahimo nato nga mobati sa dili makita nga paghapuhap sa kamot sa Manluluwas.
Naminyo ko alang sa kahangturan, ug karon ang akong bana ug ako adunay tulo ka gagmayng anak nga mga babaye, kinsa nagpabati namo sa daklit nga kalangitan diha sa among panimalay. Kon ako silang makita, magmaya ko sa kalinaw ug kahibalo nga ang matag kasub-anan, pagsulay, ug hagit sa ilang kinabuhi makamugna og mas dagkong pagtuo, bag-ong mga pagsaksi, ug talagsaong mga milagro. Nagmaya ko sa kasiguradoan nga kon sila nanginahanglan og usa ka butang nga dili mahatag nako ug sa akong bana, sila mapanalipdan, mahupay, ug maluwas, sama nako.