Fesili & Tali

“E faigaluega lou tina i le aso atoa. E mafai faapefea ona ou faaleleia le ma sootaga?”

Talu ai ona e te le vaai soo i lou tina, ia mautinoa o le taimi e te lua faatasi ai ua faaaogaina lelei. E mafai ona e talanoa i lou tina e uiga i le auala e faia ai lenei mea. E manao foi o ia i se sootaga lelei ma oe ma o le a fesoasoani ia te oe e galue i ai. Taumafai e fesili atu ia te ia po o a mea o le a ia fiafia ai: sau i le aiga i se fale mama? faia se gaoioiga faatasi? pe na o le talanoa lava ma oe? A o e faia soo gaoioiga e talisapaia e lou tina, o le a faaleleia la oulua sootaga.

Ioe, e mafai ona e fuafuaina ni gaoioiga malie e fai faatasi, ae soo se taimi anoa e faatasi ai—e pei o le fufuluina o ipu po o le faitauina o tusitusiga paia—e mafai ona avea o se auala sili e faaleleia ai le lua sootaga.

Ia fuafua foi se taimi e talanoa ai. O le malamalama o se tasi i le isi o se vaega taua i fegalegaleaiga lelei. O le isi mea e talanoaina pe faapefea ona aafia la oulua sootaga ma ia i taimi faigaluega a lou tina. E mafai ona e aloese mai le le femalamalamaai pe afai e te talanoa e uiga i ou faamoemoega faapea foi ma faamoemoega a lou tina.

O le a fesoasoani le tatalo. E taua i le Tama Faalelagi aiga, o lea e mafai ai ona Ia musuia oe ia iloa le auala e faaleleia ai la oulua sootaga ma lou tina. Aua le le amanaiaina se uunaiga e fai se mea e foliga mai e laitiiti (tagai Alema 37:6). O se opo mai ma se ataata, mo se faataitaiga, e mafai ona faia se eseesega tele.

Tusi se Tamai Tusi

E tusa lava pe matuai laitiiti lava se lua taimi faatasi, e mafai lava ona faailoa atu lou alofa i lou tina. Tusi mo ia ni tamai tusi, mai le loto ma faalilolilo. A o ia faitauina i le galuega, o le a ia mafaufau ia te oe. Fai le tele o mea e te mafaia mo ia. Mafaufau soo ia te ia ma tatalo mo ia. Talosaga i le Alii e musuia oe ma uunaia oe pe mafai faapefea ona e faaleleia la oulua sootaga.

Irinka E., 20 tausaga, Odessa, Iukureini

Saili ia Malamalama Ia Te Ia

Taumafai ia malamalama i lona tulaga, aua o loo ia galue mo lou manuia. E mafai ona e amata i le fesoasoani lea i mea i le fale, e pei o le faamamaina o le fale, fesoasoani i nai ou tei, ma le kuka. E mafai foi ona e faasoa atu tusitusiga paia i lou tina, tatalo faatasi, ma faia ni gaoioiga e te fiafia e fai faatasi.

Morony M., 18 tausaga, Chihuahua, Mekisiko

Fai se Aso Sa Faapitoa

I nisi Aso Sa ma te faia ai se meaai faapitoa i le aoauli po o se taumafataga o le afiafi faatasi ma se meaai suamalie fou, ma te talanoa, ma i le faaiuga ma te pepese i viiga. O lenei mea e tuufaatasia ai i ma’ua ma fesoasoani e avea ai i ma’ua ma se uo e sili atu ona lelei!

Repeka N., 12 tausaga, São Paulo, Pasila

Taumafai se Faataitaiga

Ma te faatulaga se taimi e faatasi ai: faia o se afiafi faaleaiga, taaalo i taaloga, o i le matafaga, aai faatasi i le aoauli. O nei mea uma e fesoasoani e faatumauina ai le faaolaolaina pea o se sootaga lelei. Pe a eseese o ma manatu, ma te aloese mai le faitio. Ou te iloa o nisi taimi ou te fai atu ai ou te le faia galuega o le fale, ae o lenei mea e tupu ai le vevesi i le aiga. Talu ona ou amataina lenei faataitaiga—faaitiitia le faitio, tuutuu i lalo lo’u leo, fesoasoani atili i galuega o le fale, ma talanoa soo ma lo’u tina—ua atiina ae ai se agaga matagofie i lo matou aiga ma ua sili atu lo ma galulue faatasi.

Glenda C., 18 tausaga, Bahia, Pasila

Aoao mai Lou Tina

Official portrait of Elder M. Russell Ballard of the Quorum of the Twelve Apostles, 2004.

“Faamolemole vaai atu i o outou tina faamaoni mo se mamanu e mulimuli ai. Faataitai ia i latou, ae le o tagata lauiloa, o o latou tulaga faatauaina e le o tulaga faatauaina ia o le Alii, ma o o latou tulaga faatauaina e le atagia ai se vaaiga e faavavau. Vaai atu i lou tina. Aoao mai i ona malosiaga, lona lototele, ma lona faamaoni. Faalogo ia te ia. Atonu e le o ia o se tagata e atamai i le faiga o feau tusitusi i telefoni feaveai; atonu foi e leai sana itulau patino i le initoneti [Facebook]. Ae a oo loa i mataupu o le loto ma mea a le Alii, e matuai tumu o ia i le atamai.”

Elder M. Russell Ballard o le Korama a Aposetolo e Toasefululua, “Tina ma Fanau Teine,” Liahona, Me 2010, 18.

Fesoasoani i le Fale

Fai ni galuega faaopoopo i le fale. Sa faigaluega lou tina i le aso atoa. Afai e faaitiitia ana galuega e fai pe a sau i le fale, atonu o le a sili atu lona fiafia ma lava ai le taimi e talanoa ma faia ai mea faatasi ma oe. Ao lua talanoa, e mafai ona e fesili atu e uiga i lona aso i le galuega. O le a ia iloa ai e te manatu alofa ia te ia, ma o le a tatala ai faitotoa mo isi autu o talanoaga, e faatagaina ai oulua e vavalalata atili.

Heather B., 18 tausaga, Oregon, ISA

Sue se Mea e Te Lua Fiafia Uma e Fai

O le ma sootaga ma lo’u tina na lele faaroketi ina ua ou fai atu, “Ou te manao ia sili atu se taimi e faaalu faatasi ma oe, ae ou te le iloa le mea e fai po o afea foi e fai ai.” O le taaalo i taaloga i le laupapa sa avea na o matou taimi e sili ona fiafia i ai i le taimi ua tuanai. O lea na ma faataatia ese ai se taimi e taaalo, talie, ma faia ni taimi e manatua. Pe a e talanoa sao ma ou matua, e iu lava ina avea i laua ma au soa e sili ona lelei. O le a mafai ona e talanoa atu ia i laua e uiga i soo se mea, ma o le a e mautinoa o se tali faamaoni. O le faailoga lena o se mafutaga faatagata matua.

Ephraim S., 15 tausaga, Niu Saute Uelese, Ausetalia

Faitau Faatasi Tusitusiga Paia

E mafai e oulua uma ona faatuina se sini e faitau faatasi i aso uma, e tusa lava pe na o le lima minute, mai le Tusi a Mamona po o se isi lava tusi o le Ekalesia. O le a faamalosia ai le lua sootaga ma fafagaina ai oulua i le afioga a le Atua ina ia mafai ona oulua saunia e feagai ma aso taitasi. Ia manatua foi e tatalo i le Atua ma ole atu mo Lana fesoasoani. Ou te iloa Na te faafofoga mai ia te oe ma e alofa ia te oe.

Laura M., 19 tausaga, Córdoba, Atenitina

O tali ua faamoemoe e mo se fesoasoani ma ni manatu, ae e le o se faalauiloaga aloaia o aoaoga faavae o le Ekalesia.

Fesili o le a Sosoo Mai

“Faatoa tatala le faaipoipoga a o’u matua. Ua ou ita ua la talepeina lo matou aiga. E mafai faapefea ona ou faamagaloina i laua?”

Auina mai lau tali ma se atapue sili ona manino, pe a manaomia, a o lei oo i le aso 10 Setema, 2014, i le liahona.lds.org, e ala i le imeli i le [e-mail], po o le meli (tagai i le tuatusi i le itulau e 3).

E ono faapupuuina tali mo le uumi po o le manino.

O le faamatalaga ma le faatagaga o loo i lalo e tatau ona aofia mai i lau i-meli po o le tusi: (1) igoa atoa, (2) aso fanau, (3) uarota po o le paranesi, (4) siteki po o le itu, (5) lau faatagaga tusitusia, ma, afai e itiiti ifo i le 18 ou tausaga, o le faatagaga tusitusia a ou matua (e talia foi le i-meli) e lolomiina ai lau tali ma lou ata.