Mo Le Malosi o le Autalavou
Tetee le Kalave Agai i Luma ma le Faatuatua
A o e agai pea i luma, e mafai ona e nofo sao e tusa lava pe o taumafai le malosiaga mai fafo e toso ese oe i lalo.
Ata na tusia e Julia Yellow
Sa ou mauaina la’u uila muamua e lua-uili ina ua valu o’u tausaga. I le fesoasoani mai a lo’u tuagane matua ma lo’u tama, sa ou amataina le faagasologa taufaafefe o le tau mafaufauina pe faapefea ona tietie. O isi tamaiti i le pitonuu na foliga mai e matua faigofie ma o se mea masani a o latou alamu i luga ma lalo o le auala i a latou uila. Sa ou nofo i luga o le nofoa o le uila—lea na pei e le itiiti ifo ma le 10 futu (3 m) i luga o le eleele—ma iloa ai sa matuai leai se mea e taofia ai au mai le pau ese ma faamaonia ai o le tulafono o le kalave o loo ola pea ma aoga.
A o ou taumafai e tietie, sa vave ona ou aoaoina afai ou te manao ia tumau ai le paleni, ou te manaomia le viliina pea. Ina ua ou faatoa nofo i luga o le nofoa, o le saoasaoa o le mea lea ou te le matuai manaomia lava e fai. Ae sa vave ona ou malamalama i le poto ma le faasaienisi e aofia ai i le agai i luma. Pau lava ia ou viliina lava, o le a mafai ona ou tumau i luga ma aloese ai mai le sima maamaai o loo faatalitali mai e fofoe ese le pa’u mai o’u lima ma vae. E lei umi ae ou alamu solo i le pitonuu ma a’u uo.
E faapena foi le ola ai i le talalelei ma tulaga faatonuina i Mo le Malosi o le Autalavou. E manaomia le faatuatua e talitonu ai afai tatou te mulimuli pea lava pea i le fautuaga a le Au peresitene Sili o loo otooto atu i lena tamaitusi, o o tatou olaga o le a paleni ma tumau. O le a taitaiina i tatou i le mea tatou te fia o i ai.
E tatau ona tatou tumau i le agai i luma ina ia aloese mai le pau. I le faia o lena mea, e tatau ona tatou faia pea lava pea ma le faamaoni ni amioga patino:
-
Tatalo i taeao ma po.
-
Suesue i aso uma i tusitusiga paia.
-
Auai i sauniga a le Ekalesia ma tagofia le faamanatuga ma le agavaa.
-
Auauna atu ia i latou o siomia i tatou.
-
Ia agavaa e auai i le malumalu.
O nei gaoioiga uma e faatumauina ai i tatou e agai i luma i le itu sa’o.
O le mafuaaga lena o le faitauina ma le faamasani i tulaga faatonuina o loo faamatala mai i Mo le Malosi o le Autalavou o le a fesoasoani ia mautinoa ai o loo tatou faia filifiliga e talafeagai ma tulaga faatonuina a le Atua. O le ola ai i nei mataupu faavae ma le tausia o poloaiga e valaaulia ai le Agaga Paia e avea ma a tatou soa tumau. E pei lava o i latou o e viliina pea se uila e mafai ona tumau i luga e ui lava i le malosi o le kalave, o i latou o e o loo taialaina e le Agaga Paia i mea uma latou te faia e mafai ona tetee atu i le uunaiga a le fili.
O a ni taunuuga o loo i lou mafaufau a o e vili atu i luma? Mo alii talavou uma o le Perisitua Arona, o le saunia nei mo se misiona talai e taua i le tuputupu faaleagaga. Mo le autalavou uma, o le saunia e alu i le malumalu ma maua le faaeega paia e ala i le osia ma tausia o feagaiga paia e tatau foi ona avea o se sini autu.
E pei o le savali mai le Au Peresitene Sili i le amataga o Mo le Malosi o le Autalavou fai mai: “i mea uma tou te faia, ia taulai atu i le malumalu. I totonu o le malumalu o le a outou maua ai faamanuiaga silisili i faamanuiaga uma lava a le Alii, e aofia ai le faaipoipoga mo le olaga nei ma le faavavau atoa.”1 O le mauaina o le feagaiga o le faaipoipoga e faavavau i le maota o le Alii ma avea ma ni tane, ava, tama, ma tina amiotonu atonu e foliga mamao ese mai le ala, ae o le taimi e amata saunia ai o le taimi nei. O nei mea uma e taitai atu ai i le taunuuga e sili ona mamalu ma maoa’e i mea uma—ola e faavavau ma lo tatou Tama Faalelagi.
O se tasi o mau ou te fiafia i ai o loo aofai uma ai mea e tatau ona tatou faia ina ia agai pea i a tatou sini: “O le mea lea, e tatau ona outou fetaomi atu i luma ma le tumau ia Keriso, ma se susulu atoatoa o le faamoemoe, ma le alofa o le Atua ma tagata uma. O le mea lea, afai o le a outou fetaomi atu i luma, ma taumamafa fiafia i le afioga a Keriso, ma tumau e oo i le iuga, faauta, ua faapea ona fetalai mai le Tama: o le a outou maua le ola e faavavau” (2 Nifae 31: 20).
E pei lava ona ou aoaoina o se teineitiiti valu-tausaga-le-matua e tatau ona ou viliina pea ma agai i luma ina ia mafai ona tetee atu i le kalave ma tausisia lou paleni i luga o la’u uila, e taua mo i tatou uma ina ia agai i luma ma le faatuatua, ma faalagolago i le fautuaga a perofeta soifua ma se Tama Faalelagi e tausia i tatou mai le faatoilaloina. O nisi o o tatou taunuuga e latalata mai lava i le auala a o isi o le a manaomia ai le olaga atoa o le ola faamaoni ina ia ausia. O folafolaga i mea o loo faatalitali mai i le faaiuga o le auala, pe afai tatou te faamaoni, e mautinoa ma mamalu ma e matuai tauia ai le tietie atu i ai.