Na Fetalai Mai le Tama Faalelagi Leai ma Ioe
E alala le tusitala i Kalefonia, ISA.
Sa ou mafaufau ua fetalai mai le Tama Faalelagi leai, ae sa Ia fetalai moni mai lava ioe i se fuafuaga sili atu mo lou olaga.
I Suetena, i le taimi o lo’u tausaga mulimuli o le aoga maualuga, sa ou filifili e talosaga mo le Iunivesite o Polika Iaga i Iuta. Sa na o le tasi le faafitauli: tusa lava po o le a le tele o lau tatalo faatauanau i le Atua e faamautu mai la’u faaiuga, sa lei i ai lava se lagona e sao. Sa ou mafaufau, “E le tatau lava ona leai le tali, e tatau ea? I le tele o itu, o le BYU e foliga e tatau ona avea ma filifiliga sa’o, ae maise lava ona ou te manao i se faaipoipoga i le malumalu ma o ou faamoemoega i le BYU e sili atu ona lelei nai lo i Suetena.” Vagana ai sa le sa’o. E le mo au. E le o le taimi lena.
I le le fiafia, sa ou lafoaia au fuafuaga e aoga i le BYU ma talosaga loa i se iunivesite i Suetena. I le taimi lava lea sa tatau ai ona ou alu mo la’u sailiga i le BYU, sa ou alofa ai ia Iona—se faifeautalai faatoa foi mai. E ui lava atonu na ma auai faatasi i ni gaoioiga a le autalavou a o lei alu Iona i lana misiona, ou te lei amanaiaina lava o ia. O le ala na ou le matauina ai lana ata aulelei ma faafiafia loto o loo tumau pea o se mealilo!
I le amataga o la ma sootaga, na tau mai ai e Iona ia te au ua talosaga atu o ia i le BYU ma na faamoemoe e auai i le kuata o sosoo ai. I le maea ai o lana kuata i Provo, na ma faaipoipo i le malumalu ma amata ona aooga faatasi i le BYU, ma faauu i le aso lava e tasi.
O lenei ua ou toe tepa i tua ma iloa ai pe aisea na fai mai ai le Tama Faalelagi i le amataga leai—po o le mea moni, “e le’o nei”—i la’u tatalo faatauanau e uiga i le auai i le BYU. E ui lava sa Ia fai mai leai i lo’u manao i lena taimi faapitoa, sa Ia fai mai ioe i se manao e sili atu ona taua. A o ou teineitiiti, sa masani ona ou tatalo faapea o lo’u toalua i le lumanai ma au o le a mauaina e le tasi le isi pe a ua sao le taimi. Atonu e mafai ona ma feiloai i le BYU, ae ou te talitonu e faapea, o se vaega o se fuafuaga e sili atu, o Iona ma au sa manaomia le mauaina e le tasi le isi i Suetena. Atonu o le tele lava o tali “leai” a le Tama Faalelagi i a tatou tatalo o ni vaega taua o Ana tali “ioe” i fuafuaga e sili atu mo o tatou olaga.
Ia Faia Lou Finagalo
I Ketesemane, na tatalo ai Iesu Keriso ma le naunau tele, “Lo’u Tama e, afai e mafai, ia aveese lenei ipu ia au.” Ona Ia faaopoopo atu lea, “Ae aua le faia lo’u loto, a o lou finagalo” (Mataio 26:39). Na filifili Iesu Keriso e inu i le ipu oona ona sa Ia iloa o se vaega o le fuafuaga sili atu a le Atua e tuuina atu se Faaola, o le a togiola mo agasala a tagata (tagai 3 Nifae 11:11).
E faapena foi, ua tatou iloa e i ai se fuafuaga a lo tatou Tama Faalelagi mo lo tatou olaga. Ae atonu tatou te le iloa le atoatoaga o le fuafuaga a le Atua mo i tatou, e mafai ona tatou faalagolago i tali a le Tama Faalelagi ia tatou tatalo ma faapea atu, “Ia faia Lou finagalo.”
Sa faaogatasi le finagalo o Keriso ma le finagalo o le Atua, ma o le fuafuaga sili lea na aofia ai le Togiola a le Faaola mo tagata uma na tatalaina. E faapena foi, a o tatou faaogatasi o tatou loto ma le Atua, e mafai e le Tama Faalelagi ona faaalia mai se fuafuaga sili atu mo i tatou. A o tatalaina lo tatou olaga, e mafai ona tatou maua faamanuiaga na aioi atu ai Iesu Keriso i Lana Tatalo Faatoga: “Ina ia tasi i latou uma; faapei o oe le Tama o i totonu ia te au, o au foi i totonu ia te oe, ina ia tasi i latou i totonu ia te i taua” (Ioane 17:21).
Ou te matuai faafetai lava ona o lo tatou Tama Faalelagi e musumusu mai leai ma le alofa i nisi tatalo ina ia mafai ona Ia tuu atu se ioe manino i isi.