Sa ou Lagonaina le Agaga Paia
Sa masani ona ou fesili i ou matua i le uiga o le “lagonaina o le Agaga Paia.” Sa ou faalogo ia i latou o talanoa i ai, ae sa ou le mautinoa pe faapei le lagona. Sa fai mai Tina ia te au o se lagona lelei tele, ae ou te le mautinoa po o le a lona uiga.
I se tasi taeao sa tamoe solo ai lo’u uso e tasi le tausaga le matua sa faafuasei ona pa lona ulu i le masini faamafanafana. Sa i ai se lavea tele i lona ulu. Sa tagi o ia, ma sa maligi lona toto. Sa ou fefe lava ma popole. Sa togafiti e lou tina le lavea ma tuu i ai se fusi. Ona ia aveina lea o a’u i le aoga.
I le aoga, sa ou fefe pea ma popole i lo’u uso. Ona ou manatua lea e mafai ona ou tatalo. Sa ou alu i totonu o le faletaele ma tatalo ma le faamaoni i le Tama Faalelagi ma fai atu ia te Ia e faamanuia lo’u uso. Ina ua uma le tatalo sa ou le toe fefe. Sa ou faalogoina se lagona filemu lava, ma sa ou toe alu atu i la’u vasega.
I le auala i le fale i lena aso, sa ou ta’u atu i lo’u tina le mea na tupu. Sa tau mai e ia ia te au ma le fiafia o le lagona mafanafana, ma le filemu sa ou maua o le Agaga Paia sa faamafanafanaina au. Sa ia fai mai e masani lava ona le talanoa mai le Agaga Paia ia i tatou e pei ona talanoa mai isi tagata ia i tatou. Nai lo o lena, Na te tuuina mai ia i tatou se lagona toafilemu.
Ina ua mavae lena, sa ou matauina isi taimi pe a ou lagonaina le Agaga Paia. Ina ua tuuina atu e lo’u tama se faamanuiaga i lo’u tina, sa moeiini ou mata ma taumafai e matua faaaloalo lava. Ona ou toe lagonaina foi lea o lena lagona mafanafana. Ou te iloa, ina ia mafai ona sili atu le faigofie ona lagona le Agaga Paia, e tatau ona tatou faaaloalo.