Aisea Tatou Te Faasoa Atu ai le Talalelei
Mai se saunoaga na tuuina atu i le semina mo peresitene fou o misiona i le nofoaga Autu o Aoaoga Mo Faifeautalai i Provo i le aso 22 o Iuni, 2008.
I le avea ai ma Au Paia o Aso e Gata Ai, ua tofu i tatou ma se faamoemoega faafaifeautalai—e valaaulia isi e o mai ia Keriso.
O le mataupu muamua o le Talai La’u Talalelei o loo fai ai se fesili e faatatau i tagata uma o Le Ekalesia a Iesu Keriso o le Au Paia o Aso e Gata Ai: “O le a lo’u faamoemoega i le avea ai ma se faifeautalai?”
O le tali, o loo aoteleina i se fuaiupu se tasi, ua tuuina mai iina e faapea: “Ia valaaulia isi e o mai ia Keriso e ala i le fesoasoani atu ia i latou ia maua le talalelei toefuataiina e ala i le faatuatua ia Iesu Keriso ma Lana Togiola, salamo, papatisoga, mauaina o le meaalofa o le Agaga Paia, ma tumau e oo i le iuga.”1
Tagata o Avea Ma Faifeautalai
Ua talosagaina i tatou uma ia avea ma faifeautalai. Ma ia faamanuiaina i le faasoaina atu o le talalelei a Iesu Keriso, e tatau ona i ai lenei faamoemoega i o tatou mafaufau, lagonaina i o tatou loto, taliaina i o tatou agaga, ma galueaiina. Pe a tatou faia, e musuia ai ma toe taialaina i tatou i le faasoaina atu o le talalelei. E tatau ona tatou tausia manino le eseesega i le va o le faamoemoega o le faasoa atu o le talalelei, i le tasi itu, ma le auala e ausia ai lena faamoemoega, i le isi itu.
E le o lo tatou faamoemoega o le tau lava ina ia auai i talanoaga e uiga i le talalelei po o le talanoa atu i soo se tasi ma tagata uma tatou te mafaia e uiga i le Ekalesia pe o le na ona faatutu lava o ni sini ma faia ni fuafuaga. O nei mea e taua, ae o le auala e tau atu i le faaiuga, ma o lena faaiuga o le aumaia o tagata ia Keriso.
Faatotonugalemuina i le Faamoemoega Faafaifeautalai
Mafaufau i nisi o faataitaiga o le mea e tupu pe a faatotonugalemuina a tatou taumafaiga e faasoa atu le talalelei i le faamoemoega faafaifeautalai:
-
O le a tatou aoao atu tagata i se auala e fesoasoani ai ia i latou ia malamalama moni i le talalelei ma pe aisea ma pe faapefea ona latou salamo. O le a tatou faalogo ma tali atu ai i mea o loo i le mafaufau ma le loto o le tagata sailiili.
-
O le a tatou saili atu ma faalogo i le Agaga Paia e iloa ai po o ai o loo lagonaina le Agaga a o tatou talanoa.
-
Fuafuaina—i aiga, i aufono a uarota, ma faatasi ai ma faifeautalai faamisiona—o le a avea ma se meafaigaluega e faamautinoa ai mea e manaomia ona tutupu e aumai ai le liua ma le papatisoga, o le mea moni, iloaina, manatuaina, ma tulitataoina mo tagata sailiili taitoatasi.
-
O le a tatou olioli i lo tatou avanoa e taumamafa ai i le afioga a le Atua ona o a tatou suesuega o le a i ai le faamoemoega. O le a tatou suesueina tali i fesili o le agaga a a tatou tagata sailiili ae faapea foi mo i tatou lava.
-
O le a tatou valaaulia tagata ia auai i sauniga a le Ekalesia, e le faapea ona tatou te talitonu o se mea lea e tatau ona tatou faia ae ona tatou te malamalama o le auai i le ekalesia e taua mo le tagata sailiili e atiina ae ai se manao e malosi atu mo le papatisoga, ma faatulaga ai se faavae mo le tumau ai e oo i le iuga i le feagaiga o le talalelei. Faatasi ai ma lena faamoemoega tupito i le mafaufau, o le valaaulia ia auai i le lotu o le a i ai se faanatinati e sili atu, o le faamalamalamaga o le taua o tapuaiga i le Sapati ma mea e faamoemoeina i se sauniga a le Au Paia o Aso e Gata Ai o le a ese mai, ma o le agaga lea e faatasi mai i a tatou upu o le a i ai se mana faatauanau lea semanu e le faatasi mai.
Talitonu Faaletagata ma Malamalama
Faamolemole aua nei faagaloina mataupu 1 o Talai La’u Talalelei ma lana fesili “O le a lo’u faamoemoega i le avea ai ma se faifeautalai?” Ia talitonu oe lava ia i le faamoemoega o le aumaia o tagata ia Keriso e ala i aoaoga faavae ma sauniga o le talalelei toefuataiina, ma o le a e malamalama ai o le faasoaina atu o le talalelei e le o se polokalama; o se galuega—le galuega a le Tama, le Alo, ma le Agaga Paia. Ia talitonu oe lava ia i le faamoemoega o le valaauliaina o tagata e o mai ia Keriso, ma o le a e malamalama ai e leai se avanoa o le lalolagi i le alofa tunoa togiola ma le faaolataga sei vagana ai e ala atu i Le Ekalesia a Iesu Keriso o le Au Paia o Aso e Gata Ai. O le a e malamalama ai i le uiga atoa o le faasoaina atu o le talalelei, ma o le a e pisi i le faiga o le galuega a lou Tama. O le a e iloa o faifeautalai faamisiona, e pei ona faia e atalii o Mosaea, e aoao atu “ma le mana ma le pule mai le Atua” (Alema 17:3), ma o le a e valaaulia i latou e aoao atu le talalelei ia i latou ua uma ona e tuuina atu i ai le valaaulia e “o mai ma matamata” (Ioane 1:39).
O La Tatou Valaaulia—O Mai ia Keriso
Ia te au, o le faamoemoega faafaifeautalai e faaatoatoaina le paia o le galuega ma le mamalu o le Atua (tagai Mose 1:39). O a ni taumafaiga e sili atu ona matagofie nai lo le aumaia o fanau a le Atua i le faaolataga faaiu e ala i le alofa tunoa o lo latou Togiola, o le Alii o Iesu Keriso? Manatua o lo tatou faamoemoega faafaifeautalai e le gata e lapatai atu i isi ae faapea foi ia laveai i latou, e le gata ina aoao atu ae ia papatiso foi, e le gata ina aumaia isi ia Keriso ae faapea foi ina ia latou mausali ia Keriso seia oo i le iuga.
O la tatou valaaulia i le lalolagi o le o mai ia Keriso. O le o mai ia Keriso o se faapuupuuga, o se auala e faamatalaina ai i upu e tolu le ata o le faaolataga. O lona uiga ina ia maua ai fua o Lana Togiola ma le Toetu—ma oo ai i le ola e faavavau. O le ola e faavavau e faalagolago i le faaaogaina o la tatou filifiliga saoloto, ae faatoa mafai lava i le alofa tunoa o Iesu Keriso. O le o mai ia te Ia o lona uiga o le faia o mea e manaomia e faaaoga ai lena alofa tunoa—le faamagaloga, faapaiaga, liua, le mana togiola o Lana taulaga lē i’u, le taulaga togiola.
O lenei tala fou lelei, le talalelei, ua sili atu le faaleoina e Iesu lava Ia i le Tusi a Mamona:
“Faauta, ua ou tuu atu ia te outou la’u tala lelei, o le talalelei lenei ua ou tuu atu ia te outou—na ou sau i le lalolagi e fai le finagalo o lo’u Tama, aua na auina mai a’u e lou Tama.
“Na auina mai au e le Tama, ina ia siitia ae au i luga o le satauro; ma a mavae ona sii ae o au i luga o le satauro, ina ia mafai ona ou aumai o tagata uma ia te au, ina ia pei ona sii ae o au i luga e tagata ia faapea foi ona sii ae i luga tagata e le Tamā, e tutu i ou luma, e faamasinoina i a latou galuega, pe ua lelei pe ua leaga—
“Ma le pogai lenei nasii ai au i luga; o lea, e tusa ai ma le mana o le Tamā, o le a ou aumai ai tagata uma ia te au, ina ia faamasinoina i latou e tusa ma a latou galuega.” (3 Nifae 27:13–15).
Tala Fiafia ma Tala Fou Lelei
O lea la, i lona faavae, le talalelei, po o le tala fou lelei, e faapea o loo i ai so tatou Tama oi le Lagi, ona o Lona alofa mo i tatou, na auina mai Lona Alo Pele e Toatasi e togiola i tatou mai le agasala ma le oti. O le Alo, i le usiusitai atoatoa i le Tama, lea Na te tuuina atu i ai le mamalu, na ofoina atu Lona soifua i lena taunuuga. Sa ia faatauina i tatou i Lona toto, ma tatou te tali atu ia te Ia mo o tatou olaga (tagai 1 Korinito 6:19–20). O Ia o lo tatou Faamasino nei. O Ia o le faamasinoga tonu ua liutino tagata.
Ua toe tautino atili mai e le savali faatalalelei o le tala fiafia faapea ona o Lana taulaga togiola, o Iesu foi o le alofa mutimutivale ua liutino tagata. O Lona alofa mutimutivale, galuega, ma le alofa tunoa ua lava lea e magalo ma faamamaina ai i tatou ina ia oo i le Aso Faamasino ua mafai ona tatou tutu ma le paia ma le le pona i Ona luma. (Tagai 2 Nifae 2:8; Moronae 10:32–33.)
O le faamoemoega faafaifeautalai i le Talai La’u Talalelei ua faamalamalama mai ai le mea e tatau ona fai e faataunuu ai lenei mea. E pei ona taua, o le faamagaloina ma le faamamaina e manaomia ai le “faatuatua ia Iesu Keriso ma Lana Togiola, salamo, papatisoga, mauaina o le meaalofa o le Agaga Paia, ma tumau e oo i le iuga.”2
Ma le isi foi i le 3 Nifae 27, ua faamaea e le Faaola Lana faamatalaga i mea faavae o Lana talalelei:
Ma o le a oo mai foi, o le a faatumuina [i le Agaga Paia] soo se tasi e salamo ma papatiso i loʼu igoa; ma afai e tumau o ia seia oo i le iuga, faauta, o ia lea o le a ou le tausalaina i luma o lou Tamā i lena aso pe a ou tu e faamasino i le lalolagi. …
“Ma e leai se mea le mama e mafai ona ulu atu i lona malo; o lea e leai se mea e ulu atu i lona malologa vagana ai i latou o e ua faamamaina o latou ofu i lou toto, ona o lo latou faatuatua, ma le salamo i a latou agasala uma, ma lo latou faamaoni e oo i le iuga.
“O le poloaiga lenei: Ina salamo ia outou tuluiga uma o le lalolagi, ma o mai ia te au, ma ia papatisoina i lo’u igoa, ina ia faapaiaina outou i le Agaga Paia tou te talia, ina ia outou tutu ma le le pona i ou luma i le aso gataaga.
“E moni, e moni, ou te fai atu ia te outou, o la’u talalelei lea” (3 Nifae 27:16, 19–21).
Faatuatua ma le Tautinoga
Ao tatou faasoa atu le molimau i le talalelei e ala i le Agaga, o i latou o e naunau e faalogo o le a lava se molimau e maua e amata ai ona maua le faatuatua ia Iesu Keriso ma Lana Togiola. O lena faatuatua o le a tuuina atu ia te i latou le naunau ina ia salamo. O tagata o le ekalesia ma faifeautalai faamisiona e mafai ona, e ala atu foi i le Agaga, aoao i latou i suiga e tatau ona latou faia ma valaaulia ma latou tautino mai o le a latou faia. O le tautinoga mulimuli tatou te valaaulia le tagata sailiili e talia ma faatino o le papatisoga lea i le vai. O lenei papatisoga e mulimuli mai ai, pe sili ona faapea, e faaatoatoaina i le, taliaina o le Agaga Paia, lea e aumaia ai se faamagaloga o agasala faapea foi le faamamaina (tagai 2 Nifae 31:17).
O lenei tulaga o le tu ua tauamiotonuina ma le le pona i luma o le Alii e mafai ona faasaoina i le olaga atoa pe afai e faaauau e se tasi ona ola i le faatuatua, salamo pe a manaomia ai ma toe faafouina folafolaga o le papatisoga. Tatou te ta’ua lena mea o le tumau e oo i le iuga. O i latou e tumau e oo i le iuga o le a le fefefe i le faamasinoina e tusa ai ma a latou galuega, aua o le a avea i latou ma galuega o le faatuatua ma le salamo ma le papatisoga i le vai ma le Agaga.
Uluai Mataupu Faavae Muamua
O le faamatalaga a Ailama Samita o loo maua i le Talai La’u Talalelei e loloto: “Ia talai atu ia uluai mataupu faavae o le Talalelei—ia talai atu pea lava pea: o le a outou iloaina ai lea aso ma lea aso le faaalia mai ia te outou o manatu fou ma le malamalama faaopoopo e faatatau i ai. E mafai ona outou faalauteleina ina ia matuai malamalama lelei i ai. Ona mafai lea ona outou matuai faafaigofieina ina ia malamalama ai i latou [tou] te aoaoina.”3
I lenei faamatalaga, o loo faamalamalamaina mai e Ailama Samita, le Peteriaka, o nei uluai mataupu faavae, le vaega e sili ona taua o le talalelei, e le o mafai ona malamalama atoatoa i ai i se iloiloga se tasi. O le malamalama faaopoopo ma le malamalama loloto o le a oo mai i le aluga o taimi i le tele o aafiaga faafaaaliga.
A o tuuina atu e tagata o le ekalesia a latou molimau ma fesili atu i faifeautalai faamisiona e fesoasoani ia i latou e ala i le aoaoina atu o le talalelei, ia manatua o se malamalama faateleina o le talalelei e oo mai e le gata mai suesuega ae faapea foi a o tatou auai i le faasoaina atu o le talalelei. Afai tatou te suesue, saunia, ma faasoa atu mataupu faavae o le talalelei e ala i le Agaga, o le a tatou “mafai lea ona matuai faafaigofieina ona malamalama i ai,” ma o le Agaga o le a aoao ma molimau atu ia i latou uma o e auai—tagata o le ekalesia, o faifeautalai ma tagata sailiili.
Auai i le Galuega o le Faaolataga
Aoao pe faapefea ona mafai ona e fesoasoani i le liua, faatumauina, ma le faatoaagaina mai i hasteningthework.lds.org.
E mafai ona e maua ni faamatalaga faaopoopo e uiga i le olioli o le faasoaina atu o le talalelei i lds.org/topics/missionary-work/change, ma e mafai ona e aoao pe faapefea ona faasoa atu le talalelei i le initoneti i lds.org/church/share.
O Le Aisea, O Le A, ma le E Faapefea
O le aisea, o le a, ma le faapefea o le galuega faafaifeautalai ua sili atu ona matagofie le folafolaina mai i le Tusi a Mamona nai lo se isi lava mea. Ua faatumulia i faataitaiga a i latou o e na malamalama ma galulue e faataunuu le faamoemoega faafaifeautalai. O loo i ai faamatalaga e sili ona manino i soo se tusitusiga paia o aoaoga faavae autu e tatau ona tatou aoao atu. O loo ia tauaveina se agaga o le faaliliuina ma se molimau i le moni o nei lava aoaoga faavae. O le a ia faaliliuina i latou uma e faitau i ai ma tatalo i ai ma se loto faamaoni ma le manatu tonu (tagai Moronae 10:3–5).
Ua faatulagaina e le Tusi a Mamona Iesu Keriso i Lona uiga moni o le Alo o le Atua ma le Mesia Paia. E uunaia le faatuatua ia te Ia. E aumaia tagata ia Keriso. Ua tatou nofo aitalafu e faavavau i ona tusitala ma le Perofeta o Iosefa Samita mo le faaliliuina o le Tusi a Mamona e ala i le meaalofa ma le mana o le Atua.
Ou te tuuina atu lau molimau, a o soifua le Alii, e moni le Tusi a Mamona. O lana molimau ia Iesu Keriso e moni. O le na faaliliuina, o Iosefa Samita, o le Perofeta maoae o le Toefuataiga. Aoao mai le Tusi a Mamona, suesue i ai, aoao atu mai ai, fiafia i ai, ma usitai i ai, ma o le a e aoao pe aisea tatou te faasoa atu le talalelei ma o lo tatou faamanuiaga ma le tiute le valaaulia ma fesoasoani i isi e o mai ia Keriso.