Kōjerbal Karōk in Lo̧mo̧o̧r n̄an Uwaake Kajjitōk ko
N̄e ewōr ad ak ro jet kajjitōk ko kōn ko̧jpeļ eo an Jisōs Kraist, jejeļā ke ia eo n̄an pukot uwaak ko?
Jej mour ilo juon tōre ekaitoktok limo. Ko̧jpeļ eo kar kōjepļaaktok an Jisōs Kraist ej itok jen ittiņo (lale D&C 1:30). Āinwōt juon tōprak, elōn̄ ajri ro nejin Jemedwōj Ilan̄ ̄ ro me rejjab jen tōmak in ad rej ron̄ kōn “Mormon ro.” Jet rej ron̄ kōn men ko rekōjak im rekaibokbok. Ro jet rej ron̄ men ko me rejeļā kaki im kaenōm̧m̧an. Kajjojo armej ro jān jimor kumi ko remaron̄ itok n̄an kōj n̄an pukōt uwaak ko n̄an kajjitōk ko aer. Elōn̄ uwaak ko repād ilo karōk in lo̧mo̧o̧r eo, eo barāinwōt jeļā kake āinwōt “karōk in m̧ōņōn̄ō eļap” (Alma 42:8).
Enan̄in eo kajjitōk eo eļap kajjitōk kaki ej “Ij itok jān Ia?” Etke ij bed ijin?” im “Inaaj ilo̧k n̄an Ia ālkin mour in?” Aolep kajjitōk kein maron̄ uwaaki kōn m̧ool ko loi ilo karōk in lo̧mo̧o̧r eo. Bwebwenato in enaaj kwaļo̧k jet iaan uwaak ko jeje ko rekwojarjar im rikanaan eo ad, Būreejtōn Thomas S. Monson, eaar litok reiookļo̧k kajjitōk kein.
Ij itok jān ia?
Jej armej ro indeeo. Jaar jokwe ippān Anij m̧okta jen mour in āinwōt ajri in jetōb ro Nejin. “Rijilōk Paul eaar [kwaļo̧k] bwe ‘kōj ro nejin Anij’ [Jerbal 17:29],” Būreejtōn Monson eaar ba. “Kōn ad jeļā bwe ānbwin kanniōk rej kwaļo̧k bwe kōj nejin ro jined im jemed ilo kanniōk, jej aikuj in pukot meļeļe eo an Paul. Irooj eaar kean̄ bwe jetōb im ānbwin rej an armej (lale D&C 88:15). Kōn menin ej jetōb eo me ej nejin Anij. Rijeje eo an Hibru rej ba kōn E āinwōt ‘Jemān jetōb raņ’ [Hibru 12:9].”1
Etke ij pād ijin?
Kōn mour eo ad ioon laļ in, Būreejtōn Monson eaar ba: “Jej aikuj in kam̧m̧oolol bwe juon Rikōm̧anm̧an emāletlet eaar kōm̧anm̧an juon laļ im juon jikin n̄an kōj ijin, ippān juon rōn̄ōl in meļo̧kļo̧k ijo jikid m̧okta bwe jen maron̄ en̄jake juon iien idajon̄jon̄, juon iien em̧m̧an n̄an mālijjon̄e kōj make, n̄an maron̄ in karbōb n̄an men otemjej Anij em̧ōj an kōpooj n̄an kōj n̄an būki.
“Emeļeļe, unleplep in jibadbad eo ad m̧okta ioon laļ in ej n̄an bōk ānbwin kanniōk im di. Jaar barāinwōt bōk menin letok an anemkwoj in kālet. Ilo taujin wāween ko, jaar jeram̧m̧an n̄an kālet n̄an kōj make. Ijin jej ekkatak jān kōņaan ko reppen an en̄jake an juon make. Jej peek n̄an kālet ikōtaan em̧m̧an im nana. Jej lo oktak eo kōtaan meo̧ im tōn̄al. Jej lo bwe ewōr kaje ko rej ekkeijel n̄an m̧akūtkūt ko ad.”2
Inaaj ilo̧k n̄an ia ālkin mour in?
Mej ej itok n̄an aolep ro uwaan baam̧le eo an armej. “Eļan̄n̄e juon armej e mej, enaaj bar mour ke?” (Job 14:14). “Jejeļā bwe mej ejjab jem̧ļo̧k eo,” Būreejtōn Monson eaar ba. “M̧ool in em̧ōj kar katakin jen rikanaan ro remour ilo aolep bwebwenato in laļ in. Ej barāinwōt lo ilo jeje ko rekwojarjar ad. Ilo Bok in Mormon jej riiti naan ko rejeno̧lo̧k im rekaenōm̧m̧an:
‘Kiiō, kōn lam̧lam̧ in jetōb eo ikōtaan mej im jerkakpeje—Lo, kar kwaļo̧k n̄an eō jān juon enjeļ, bwe jetōb ko an aolep armej, ilo wōt iien eo rej ilo̧k jān ānbwinnin kanniōk in, aaet, jetōb ko an aolep armej, mekarta n̄e rem̧m̧an ak nana, rej ilo̧k n̄an jikier n̄an Anij eo eaar leļo̧k n̄an er mour.
‘Im Jetōb ko an ro raar jim̧we naaj bōk er ilo juon mejatoto in m̧ōņōņō, eo ņa etan paradise, juon mejatoto in kakkije, juon mejatoto in aenōm̧m̧an, ijo renaaj kakkije jān aolep inepata ko aer im jān aolep ailparo, im būrom̧ōj’ [Alma 40:11–12].”3
Ālkin ad jerkakpeje, jej ilo̧k n̄an laļ eo eutiej tata kōn aiboojoj eo āinwōt aļ, Laļ an allōn̄ kōn aiboojoj eo āinwōt allōn̄, laļ an iju kōn aiboojoj eo āinwōt iju ko, ak ilo maroklep (lale D&C 76).
Ewōr ke juon lukkuun Anij? Setan ej ke lukkuun?
Jemedwōj Ilan̄, Jisōs Kraist, im Setan raar aolep m̧ōttan Kweilo̧k eo eļap ilo Lan̄ kar kōm̧m̧ane m̧okta jān ad kar ļotak. Āinwōt m̧ōttan karōk in lo̧mo̧o̧r eo, Jemedwōj Ilan̄ eaar kajjitōk ippān juon iaan ajri ro Nejin bwe en itok n̄an laļ in im en̄taan kōn jerawiwi ko ad. Eaar ba: “Wōn eo Inaaj jilkinļo̧k? Im juon [Jisōs Kraist] eaar uwaak āinwōt Nejin Armej: N̄a E, jilkinļo̧k eō. Im eo juon [Setan] eaar uwaak im ba: N̄a E, jilkinļo̧k eō. Im Irooj eaar ba: Eo m̧oktata eaar ba jilkinļo̧k Eō.
Im Satan eaar illu, im kar jab bōk ļamļam eo an m̧oktata. Im ilo tōre eo, elōn̄ raar ļoore (lale Abraham 3:27–28; bar lale D&C 29:36–37; Moses 4:1–4).
Ewōr ke kajoor eo ippād n̄an jum̧ae kapo ko an Setan?
Juon m̧ōttan-jilu in jetōb ko me raar kālet n̄an ļoor Setan ālkin Kweilo̧k eo ilo Lan̄ kar kadiwōj ļo̧k er ippān. Er im Setan rej jetōb wōt ilo ejjeļo̧k ānbwiin kanniōk ko. Rikanaan Joseph Smith eaar katakin “Aolep armej ewōr ānbwinnier ewōr aer kajoor ioon ro ejjeļo̧k ānbwinnier.”4 M̧ool Setan emaron̄ kapo kōj, bōtaab ewōr ippād kajoor eo n̄an jum̧ae.
Etke jet iien āinwōt Jemed Ilan̄ ejjab uwaaki jar ko aō?
“Jar ej kōm̧m̧an jān ta eo en ankilan Jemen im ankilan ajri eo rej būktok ekkar n̄an doon. Jar ejjab men eo ej ukot ankilaan Anij” (Bible Dictionary, “Prayer”). Jar ej juon kein jerbal me ej jipan̄ kōj kālet eļan̄n̄e jenaaj kōjerbal anemkwōj eo ad n̄an kajokkun wōt juon ankilad ippān eo an Anij (lale Abraham 3:25). Jemedwōj Ilan̄ ej aolep iien uwaaki jar ko ad, bōtaab uwaak ko remaron̄ itok ilo jekjek in aaet, jaab, ak ejjab kiiō Iien ej Aorōk.
Etke ewōr aō idajon̄jon̄ ko n̄e ij kajieon̄ in mour juon mour em̧m̧an?
Idajon̄jon̄ ko rej m̧ōttan wōt karōk in lo̧mo̧o̧r eo. Rej kōm̧m̧an bwe jān kajoor ļo̧k, rej kōkōm̧anm̧an ļo̧k kōj, im rej karreoik ļo̧k kōj ilo ad pedped wōt ioon Jisōs Kraist im ko̧jpeļ eo An. Jemedwōj Ilan̄ ej rie kōj ilo iien idajon̄jon̄ ko ad. Mālijjon̄ ko ad rej letok n̄an kōj en̄jake, im enaaj n̄an em̧m̧an eo ad (lale D&C 122:7).
Ekōjkan aō maron̄ jeļā ta eo ejim̧we im ta eo ebōd?
Aolep ajri ro nejin Anij rej lo̧tak tok kōn Meram in Kraist, eo ej jipan̄ kōj “jeļā em̧m̧an jān nana” (Moronai 7:16). Ilo kakobaba, Jetōb Kwojarjar emaron̄ kwaļok kam̧ool n̄an kōj kōn m̧ool eo ilo kōļmenļo̧kjeņ eo ad im būruwōd kōn en̄jake ko an aenōm̧m̧an im okmeņeņ (lale D&C 8:2–3).
Imaron̄ ke jeo̧rkļo̧k bōd men̄e iaar kōm̧m̧ani jerawiwi ko reļļap?
Anij ejeļā bwe aoleped wōj naaj jerawiwi ilo ad jeļā n̄an kālet ikōtaan jim̧we im bōd.5 Aolep jerawiwi, mekarta, ewōr kaje ej ekkeijeļļo̧k ippāer. Jim̧we ej kajjitōk bwe kaje en jako. Kōn tiram̧o kake eo An, Jemed Ilan̄ eaar kōtļo̧k Jisōs Kraist n̄an kōm̧m̧ane Pinmuur eo im kakūrm̧ool kajjitōk ko an jim̧we n̄an kōj aolep (lale Alma 42). Ilo naan ko jet, en̄taan eo an Kraist ilo Gethsemane im mej eo an ioon Golgotha eaar kōļļāik wōņāān aolep jerawiwi ko ad eļan̄n̄e jenaaj kōtļo̧k Pinmuur eo an Kraist kōn ukwelo̧k im bōk kain̄i ko an ko̧jpeļ in. Jerawiwi ko ad renaaj jako (lale D&C 1:31–32).