Ļoor Rikanaan eo
Jān juon Nokon an Church Educational System kōm̧m̧an ilo Brigham Young University–Idaho ilo Māe 5, 2013. Kōn aolep ennaan, etal n̄an lds.org/broadcasts.
Ilo ad ļoor Būreejtōn Monson im kajjieon̄ erom̧ āinwōt e, jenaaj lukkuun tōprak ilo ad rikaļoor ro retiljek ļo̧k an Irooj Jisōs Kraist.
Jejjo iiō rem̧ootļo̧k, m̧okta jen kweilo̧k eo eļap, Būreejtōn Thomas S. Monson eaar katakin juon katak em̧m̧an. Iien in eaar n̄an kobaik Ritōl ro Routiej ro raar itok n̄an Salt Lake City, Utah, elōn̄ rej itok jān jikin ko ipeļaakin laļ in ijo rej jerbal ie ilo Eria Būreejtōnji ko. Jaar itok ippān doon n̄an ekkatak jen Būreejtōnji eo Kein Kajuon im Jon̄oulruo Rijilōk ro.
Ke iien kweilo̧k ej itok, aolep raar pād ijjelo̧kin Būreejtōn Monson. Jejjo minit ko m̧okta jen an kweilo̧k eo kar ijjino, kōm̧ ar bōjrak am bwebwenato ippān doon im kar jijjet ilo kautiej im ron̄jake ainikien kōjan̄jan̄ eo, ļōmņak bwe rikanaan eo enaaj itaak tok m̧ōttan wōt jidik.
Kōm̧ ar kijenmej im kōttar ke eaar 9:00 jibbon̄ ar itok im eļļā ļo̧k. Juon eaar diwōjļo̧k ilo kōjem̧ eo rājet—n̄an lale eļan̄n̄e jet jipan̄ emaron̄ menin aikuj. Ilo an ro̧o̧l tok, eaar ba, “Būreejtōn Monson enaaj koba tok ejjab etto.”
Enan̄in 15 minit tokālik, Būreejtōn Monson eaar deļo̧n̄e tok ruum̧ eo. Kōn ejjeļo̧k, kōm̧ kar jutak ke eaar deļo̧n̄ tok. Kōm̧ ar m̧ōņōņō in loe e im m̧ōņōņō bwe em̧m̧an an pād. Ejjeļo̧k juon un āinwōt n̄an etke eaar maron̄ rum̧ij.
Būreejtōn Monson eaar kaju ļo̧k n̄an jikin kōņaan eo im ba, “Em̧m̧aan raņ jitōn bōro, joļo̧k aō bōd bwe irum̧ij, ak kōrā eo pāleeō eaar aikuji eō jibbon̄ in.”
Iaar lukkuun bwilōn̄ im ettā, eaar jab maron̄ bōjrak aō kōļmenļo̧kjeņ kōn naan in.
Kweilo̧k in eaar lukkuun aorōk. Aolep ritōl ro rerūtto an Kabun̄ in raar kobatok, ak Būreejtōn Monson eaar kwaļo̧k juon waanjon̄ok n̄an kōm̧ aolep. Kōrā eo pāleen eaar aikuji e, im eaar bōk iien eo emenin aikuj n̄an kea kake e. Eaar juon rikwaļo̧k eļap. Ij jab keememej bar jabdewōt men eaar ba raan eo, ak ij keememej kwaļo̧k in: “Kōrā eo pāleeō eaikuj eō.”
Ļoor waanjon̄ok eo an Rikanaan eo
Ikōņaan lewaj ļalem wāween ko jemaron̄ ļoor waanjon̄ok eo an Būreejtōn Monson.
1. Jemaron̄ jab elotaan, im jemaron̄ m̧ōņōņō.
Ilo Pearl of Great Price, Rikanaan Joseph Smith ej kōmeļeļeiki en̄jake eo an elem̧ōņōņō (Joseph Smith—History 1:28). “Kwaļo̧k m̧ōņōņō” ej barāinwōt kōmeļeļeik Būreejtōn Monson.
Ilo juon iien Būreejtōn Monson eaar ba: “Jemaron̄ … kālet n̄an jab bōk juon m̧wil in ellotaan. Jemaron̄ jab kōjebwebweik kōto eo, ak jemaron̄ kōm̧anm̧an ļo̧k iaļ in wa eo. Ilo naan ko jet, jemaron̄ in kālet n̄an m̧ōņōņō im jab ellotaan, mekarta ta eo ej itok im̧aad.”1
Juon raan iaar kōttar inabwij in ruum̧ in kōttar eo an Būreejtōnji eo Kein Kajuon. Iaar kūrļo̧k ijo n̄an bōk koņaaō ilo juon kweilo̧k n̄an kōnono kōn jerbal ko an tampeļ. Iaar jijet inabwij in ruum̧ eo, make iaaō. Iaar ļōmņak Būreejtōnji eo Kein Kajuon emōj aer jino kweilo̧k im inaaj kūr n̄an koba ļo̧k ippāer ium̧win jejjo minit ko.
Ke iaar jijet ijo, iaar maron̄ ron̄jake an juon armej etetal wejel ilo waal eo. Iaar ļōmņak ippa make, “Armej rej jab meļeļe kakien ko rejejjet. Kwoj jab etetal namōj in peļaakin opiij eo an Būreejtōn eo an Kabun̄ in im wejel.”
Ejjab etto riwejel eo ej etetal tok ipeļaakin dam̧ eo—eaar Būreejtōn Monson. Eaar m̧ōņōņō, eaar jab ellotaan. Eaar iakiakwe eō im ba, “Ij ļōm̧ņak jenaaj jino kweilo̧k in ilo jejjo minit ko.”
Men̄e eddo in an aolep Kabun̄ ioon aeran, ej juon waanjon̄ok in m̧ōņōņō im e ej aolep ejjeļo̧k an m̧wil in ellotaan. Jej aikuj erom wāween in.
2. Jemaron̄ jouj im iakwe ajri ro.
Jisōs emakijkij an kōnono n̄an ajri ro. Rikanaan eo An, Būreejtōn Monson, emakijkij an kōnono kōn ajri ro barāinwōt. Iaar loe, eļap tata ilo iien aje ko an tampeļ, wāween an iakwe ajri ro im, jen waanjon̄ok eo an, ej katakin kōj wāween n̄an kōm̧m̧an n̄an er. Ilo aolep aje an tampeļ, ej pedped wōt ioon ajri ro. Ej m̧ōņōņō in kobaik er ilo kōjeram̧m̧an eo an dōkā in jabōn em̧ eo im aolep iien karuwaineneik jejjo iaer n̄an likūt jet jimāān ilo dōkā in jabōn em̧ eo n̄an leļo̧k koņaer ilo kōkkaļļen an dedeļo̧k juon tampeļ. Ej kōm̧m̧ane bwe en limo n̄an er. Ej kōm̧m̧ane bwe ren jab meļo̧kļo̧k e. Ej aolep iien ettōn̄ n̄an er. Ej rōjan̄ im kakien er. Ej juon men em̧m̧an n̄an lale.
An iakiakwe ekitbuuj ļalem men ko, kōm̧akūtkūt lojiln̄in, im rōjan̄ n̄an jerbale mijen ko im m̧are ilo tampeļ eo.
Jet iiō rem̧ootļo̧k, Būreejtōn Monson eaar jikejuuļ n̄an aje Oquirrh Mountain Utah Temple ilo raan in ļotak eo an. Ke eaar itaak tok ilo tampeļ eo im epaake ļo̧k kōjam̧ eo im̧aan tampeļ eo, juon kumi in jodikdik ro raan koba ippān doon. Raar jeļā bwe eaar raan in ļotak eo an Būreejtōn Monson ke raar jino al “Happy Birthday” n̄an e. Eaar bōjrak im jelm̧ae er kōn juon ettōn̄ iturin mejān. Eaar jino kōm̧akūtkūt pein eļan̄n̄e eaar tōl er ilo al eo. Ilo jem̧ļo̧kin raar kobaik naan in “Im ebar lōn̄.” Eaar ba n̄an n̄a, “Eaar m̧ōttan eo em̧m̧an ippa.”
Ajri ro im jodikdik ro an Kabun̄ in rej iakwe e, im ejjeļo̧k aer pere bwe ej iakwe er barāinwōt!
3. Jemaron̄ in ļoor im̧we ko an Jetōb eo.
Būreejtōn Monson ej kwaļo̧k an wujlepļo̧k n̄an Irooj im an kalim̧m̧ur n̄an ļoor im̧we ko an Jetōb eo jen naan kein: “En̄jake eo em̧m̧an tata ijeļā ilo mour ej n̄an en̄jake juon im̧we im m̧akūtkūt ekkar n̄ane im tokālik jeļā bwe eaar kakūrm̧ool jar an juon armej ak juon aikuj an armej. Im ij aolep iien kōņaan bwe Irooj en jeļā bwe eļan̄n̄e Ej aikuj juon rijipan̄ n̄an ettōr, Tom Monson enaaj ettōr kōn ijjitōn eo kōn E.”2
En̄in ej juon jon̄ok bwe kōj kajjojo aikuj in ļoor e.
4. Jemaron̄ in iakwe tampeļ eo.
Būreejtōn Monson enaaj pād ilo bwebwenato āinwōt juon iaan rikkaļ tampeļ ro reļļap ilo bwebwenato in Kabun̄ in. Jen ke eaar erom̧ Būreejtōn eo an Kabun̄ in ilo Pāpode 2008, eaar wōnm̧aan ļo̧k kōn jerbal in eļap kalōk tampeļ ko. Ium̧win iiō ko jiljino ke eaar rikanaan, Būreejtōn Monson eaar kōjjeļļāik karōk ko n̄an kalōk 33 tampeļ ko rekāāl.
Būreejtōn Monson eaar ba, “Kōj wōj kajjojo maron̄ ke mour erreo ilo mour ko ad, kōn pā ko rōrreo im bōro ko rōm̧m̧an, bwe tampeļ eo en unūr mour ko ad im baam̧le ko ad.”3
Eaar barāinwōt letok kalim̧m̧ur in em̧m̧an: “Ilo ad iakwe tampeļ eo, un̄ūr tampeļ eo, im pād ilo tampeļ eo, mour ko ad renaaj kwaļo̧k tōmak eo ad. Ilo ad itok n̄an em̧ kein rekwojarjar im̧ōn Anij, ilo ad kakeememej bujen ko ad jej kōm̧m̧ani ilowaan, jenaaj maron̄ kijoni aolep kapo im anjo jen kajjojo mālijjon̄.”4
Jen ļoor jon̄ok eo rikanaan eo eaar kwaļo̧k n̄an kōj ilo iakwe tampeļ eo.
5. Jemaron̄ in jouj, kea kake, im iakwe.
Būreejtōn Monson ej juon waanjon̄ok em̧m̧an kōn iakwe ro jet. Kwaļo̧k eo an eaar obrak kōn kōm̧m̧an loļo̧k ko n̄an mōko; likūt pā ko ioon bar ko im leļo̧k kōjeram̧m̧an ko; kōm̧m̧an phone call ko jab jeļā kaki n̄an kainōm̧m̧an im rōjan̄; jilkinļo̧k leta in rōjan̄ ko, naan in nōbar, im kam̧oolol; loļo̧k aujipitōļ im m̧ōn rinan̄inmej ko; im pukōt iien n̄an etal n̄an kallōb ko im ilomej ko men̄e eboub jikejuuļ eo an.
Āinwōt n̄e Rilo̧mo̧o̧r enaaj kar kōm̧m̧ane, Thomas Monson eaar etal kōm̧m̧ane men ko rem̧m̧an (lale Jerbal 10:38) im kōjeram̧m̧an im iakwe ro jet; en̄in eaar kajoor in iaļ eo ilo mour eo an.
Juon waanjon̄ok ekabwilōn̄lōn̄ kōn jouj an Būreejtōn Monson kar waļo̧k ilo 2012. Ke Tampeļ eo eaiboojoj ilo Brigham City Utah eaar epaak an dedeļo̧k, iaar kweilo̧k ippān Būreejtōnji eo Kein Kajuon n̄an kōnono kōn karōk in aje eo an. Kōn wōt an Brigham City maron̄ juon wōt awa ilōn̄ in Salt Lake City, enaaj kar lukkuun pidodo n̄an Būreejtōn Monson n̄an etal n̄an ijeņ n̄an aje eo.
Ijjeļo̧kin, Būreejtōn Monson eaar ba, “Brigham City ej jikin eo an Būreejtōn Boyd K. Packer, Rijilōk in eļap eo eaar jijet iturājet eō elōn̄ iiō ko ilo Jon̄oulruo eo. Ikōņaan bwe en bōk utiej in im kōjeram̧m̧an in aje tampeļ in ilo bukwōn in an. Inaaj pād wōt, im inaaj jitōn̄ Būreejtōn Packer n̄an aje Brigham City Temple. Ikōņaan bwe raan en en An.”
Eaar juon raan eaiboojoj n̄an Būreejtōn Packer im n̄an Sister Packer, ro raar barāinwōt rūttoļo̧k ilo Brigham City. Iaar lukkuun en̄jake jen jouj in im m̧akūtkūt in em̧m̧an jen Būreejtōn Monson n̄an Rijilōk in m̧ōttan. Kōj aolep maron̄ bōk wāween in. Jemaron̄ kwaļo̧k im jouj im ļōmņak eļap ļo̧k n̄an armej ro ipeļaakid.
Jon̄ok eo an juon Ri kanaan
Būreejtōn Monson eaar katakin kōj wāween eo n̄an mour mour ko ad kōn ennaan ko an rem̧m̧an im im̧we ilo kweilo̧k eo eļap. Eaar katakin kōj wāween n̄an erom̧ rikaļoor ro an Jisōs Kraist jen waanjon̄ok eo ekabwilōn̄lōn̄ im em̧m̧an an juon make. Em̧ool Irooj eaar letok n̄an kōj juon jon̄ok in men otemjej, im juon iaan jon̄ok ko bwe jej aikuj pukōt n̄an ļoor rikanaan eo ad ejitōn bōro.
Ij kam̧ool bwe ewōr juon Anij ilo lan̄ eo ejeļā wōn kōj im Ej iakwe kōj. Eaar letok n̄an kōj juon rikanaan—n̄an tōl kōj, n̄an katakin kōj, im tōl kōj ilo raan kein āliktata. Ij tōmak bwe Irooj ej kōtmāneik kōj n̄an iakwe rikanaan eo, n̄an rejtak e, im n̄an ļoor waanjon̄ok eo an.
Ij bwe juon kōjeram̧m̧an eļap n̄an mour ilo raanin Thomas S. Monson ej rikanaan eo an Irooj. Ilo ad ļoor Būreejtōn Monson im kajjieon̄ erom̧ āinwōt e, jenaaj lukkuun tōprak ilo ad rikaļoor ro retiljek ļo̧k an Irooj Jisōs Kraist.