Em̧m̧aan im Kōrā ro ilo Jerbal eo an Irooj
Jān juon kōnono in nokon kar kwaļo̧ke ilo Brigham Young University ilo O̧kwōj 20, 2013. N̄an aolep ennaan eo ilo English, etal n̄an speeches.byu.edu.
Ilo karōk eo an Jemedwōj Ilan̄ me ej leļo̧k n̄an em̧m̧aan ro kajoor an priesthood eo, em̧m̧aan ro im kōrā ro ewōr oktak ak aorōk in jerbal ko rej juon wōt.
Ij tōmak ewōr jet m̧ool ko bwe jim̧or kōrā ro im em̧m̧aan ro rej aikuj in meļeļe kōn eddo eo eaorōk ewōr ippān kōrā ro ilo kōkajoor ļo̧k im kalōk aelōn̄ in kiin̄ eo an Anij ioon laļ in. Ilo elōn̄ wāween ko, kōrā ro rej būruwōn Kabun̄ eo. Kōn menin kōn jipan̄ eo an Irooj, ikōņaan leļo̧k aō kile n̄an kōrā ro retiljek im jiron̄ ro an Kabun̄ in. N̄an kom̧ sister ro, jekdoon ia eo kom̧ij jokwe ie ilo laļ in, jouj jeļā bwe Būreejtōnji eo Kein Kajuon im Doulul eo an Jon̄oulruo Rijilōk ro rej iakwe im lōke kom̧.
In jino kōn juon ekkatak eo enaaj kakeememej kōn ta eo jej kōm̧m̧ane ioon laļ in.
Jej ļaddik ro im leddik ro rej jetōb nejin Jemedwōj Ilan̄. Jaar mour Ippān ilo mour eo m̧okta. N̄an kakūrm̧ool mijen eo n̄an bōktok jab wabanban im mour indeeo an armej (lale Moses 1:39), Jemedwōj Ilan̄ eaar kōm̧m̧ane juon karōk n̄an jipan̄ ajri ro Nejin bōk jibadbad eo aer eļap. Karōk eo an Jemed kar kūr armej n̄an wōtlo̧k im maron̄ jepel ļo̧k jān E ium̧win juon tōre ilo aer ļotak tok ilo mour in, bōk juon ānbwin, im deļo̧n̄e juon tōre in idajon̄jon̄ im m̧aanjebpopo. Karōk eo An kar n̄an letok juon Rilo̧mo̧o̧r n̄an lo̧mo̧o̧ren aolep armej jān Wōtlo̧k in. Pinmuur eo an ad Irooj Jisōs Kraist ej kōpooj iaļ eo kōn kain̄i ko an ko̧jpeļ eo im bujen ko rekwojarjar n̄an jepļaak ļo̧k n̄an im̧aan mejān Anij. Kōnke jenaaj kar mour ilo juon peļaak eo ewabanban eobrak kōn kauwōtata im kareel ko, Jemedwōj Ilan̄ im Nejin raar jeļā bwe jenaaj kar aikuj n̄an maron̄ bōk kajoor eo eļap ļo̧k jen eo ad make. Raar jeļā bwe jenaaj kar aikuj n̄an maron̄ bōk kajoor eo Aer. Ko̧jpeļ eo im katak ko an Kraist rej leļo̧k n̄an aolep ro renaaj bōke kajoor in n̄an bōk mour indeeo im kajoor eo n̄an loe lan̄lōn̄ ilo iaļ in.
Ewōr ro rej kajjitikin jikin eo an kōrā ro ilo karōk eo an Anij ilo Kabun̄ in. Iaar maron̄ kar intōrpiu jen national im international media n̄an jiron̄ kom̧ bwe enan̄in aolep rijeje nuuj ro, ro iaar maron̄ jerbal ippāer eaar wōr kadede aer jeļā ilo ejjeļo̧k pere kōn unin kōnono in. Ium̧win iiō ko rellōn̄ raar kajjitōk kajjitōk ko ļōmņak bwe kōrā ro rej membōr edik ļo̧k aorōk er ilo Kabun̄ in. Ejjab m̧ool meļeļe in.
In lewaj ļalem meļeļe ko n̄an ami kōļmenļo̧kjeņ kaki kōn unin kōnono in eaorōk.
1. Anij Ewōr juon An Karōk n̄an Jipan̄ Kōj Bōk Mour Indeeo
Jemedwōj Ilan̄ eaar kōm̧anm̧an jim̧or kōrā ro im em̧m̧aan ro, ro rej leddik im ļaddik ro rej jetōb Nejin. Meļeļe menin bwe m̧aan ak kōrā ej indeeo. Ewōr juon An karōk kar kōm̧anm̧ane n̄an jipan̄ aolep ro rej kālet n̄an ļoor E im Nejin, Jisōs Kraist, bōk mejān kajjik eo aer āinwōt rijolet an mour indeeo.
Eļan̄n̄e mour ippān Anij ej kōttōpar eo Aer āliktata eaorōk im jibadbad eo im eļan̄n̄e Rej aolep jeļā im wāppen, āinwōt ad jeļā bwe Rej, innām Rej meļeļe ijo em̧m̧an tata n̄an m̧aanjebpopo, katakin, im tōl kōj bwe en wōr ad iien n̄an kōkkare kōj n̄an mour ippān Anij.
Enan̄in aolep ewōr juon an baam̧le ak ro jerā er, ro raar po ilo elōn̄ jorrāān in ikōtōltōl ko. Aitwerōk kōn unin kōnono ko ejjab bōk jabdewōt uwaak im, ilo m̧ool, maron̄ kōm̧m̧an akweel. Ewōr jet kajjitōk ko kōn ijo Kabun̄ ej rie kōn unin kōnono ko rem̧wilaļ reppen n̄an uwaaki n̄an kaju būruwōn jabdewōt armej. Mekarta, n̄e jej pukōt Irooj ilo jar kōn wāween n̄an en̄jake im ta n̄an kōm̧m̧ane ilo jekjek kein, m̧ool eo ej itok: “Kwoj ke tōmak ilo Jisōs Kraist im kwoj ke ļoor E im Jemān?” Ij tōmak bwe enan̄in aolep armej ilo Kabun̄ ilo juon iien ak bar juon naaj bwilōn̄ eļan̄n̄e remaron̄ kōm̧m̧ane aolep men kar kajjitikin er n̄an kōm̧m̧ane. Ak eļan̄n̄e jej lukkuun tōmak ilo Irooj, kam̧ool eo ej itok: “Ij tōmak Jisōs Kraist, im ij m̧ōņōņō in kōm̧m̧ane jabdewōt men Ej aikuji eō n̄an kōm̧m̧ane.” Kōn menin jen etal m̧aan ļo̧k. Ekōjkan an kajoor naan kein “Ij tōmak Jisōs Kraist”!
Naan in kam̧ool eo ad im ad jokne ilo kōļmenļo̧kjeņ im ad ājmour ej ijjino kōn m̧ōņōņō n̄an tōmak bwe Jemād ilo Lan̄ em̧ool ejeļā ijo em̧m̧an tata.
2. Kabun̄ in Ej Tōl Kōn Kii ko an Priesthood eo
Kabun̄ eo an Jisōs Kraist im Armej ro Rekwojarjar ilo Raan-ko Āliktata, im Kabun̄ eo An ej tōl jen im kōn mālim eo an priesthood im kii ko an priesthood eo. “Kii ko an Priesthood rej mālim eo Anij eaar liļo̧k n̄an ritōl ro an priesthood eo n̄an kōtōpalpal, kōjeikik, im tōl jerbal eo an Priesthood eo an ioon laļ.”1
Ro ewōr ippāer kii ko an priesthood eo—men̄e emaron̄ juon tikōn eo ewōr kii ko ippān n̄an doulul eo an ak juon bisop eo ewōr ippān kii ko n̄an ward eo an ak juon stake būreejtōn eo ewōr ippān kii ko an stake eo an ak Būreejtōn eo an Kabun̄ in eo ej kabwijer aolep kii ko an priesthood eo—ej lukkuun kōmaron̄ an aolep ro rej jerbal ak tiljek in jerbal ium̧win tōl eo aer n̄an kōjerbal mālim eo an priesthood im n̄an bōk kajoor an priesthood eo.
Aolep em̧m̧aan im aolep kōrā ro rej jerbal ium̧win tōl eo an ro ewōr kii ko ippāer. En̄in ej wāween an Irooj tōl Kabun̄ eo An.
In āliji juon men eo iaar kwaļo̧k ilo Eprōļ 2013 kweilo̧k eo eļap: “Ilo karōk eo an Jemedwōj Ilan̄ me ej leļo̧k n̄an em̧m̧aan ro kajoor an priesthood eo, em̧m̧aan ro ewōr eddo eo ejej uwaan n̄an tōl priesthood eo, bōtaab rejjab priesthood eo. Em̧m̧aan ro im kōrā ro ewōr oktak ak aorōk in jerbal ko rej juon wōt. Ejja āinwōt an juon kōrā ban keotak juon ajri ilo an ejjeļo̧k juon em̧m̧aan, kōn menin juon em̧m̧aan ejjab maron̄ lukkuun kōjerbal kajoor eo an priesthood eo n̄an ejaake juon baam̧le indeeo ilo an ejjeļo̧k juon kōrā. … Ilo jekjek ko an indeeo, jim̧or kajoor in tum̧ wōņ in orļo̧k eo im kajoor an priesthood eo rej ajije jān ļeo im lio pālele.”2
Etke em̧m̧aan ro raar ekkapit n̄an opiij ko an priesthood im jab kōrā ro? Būreejtōn Gordon B. Hinckley (1910–2008) eaar kōmeļeļeiki bwe eaar Irooj, jab em̧m̧aan, “eo kar jitōn̄e bwe em̧m̧aan ro ilo Kabun̄ eo An rej aikuj kabwijer priesthood eo” im bwe eaar barāinwōt Irooj eo eaar kōkwojarjar e kōrā ro kōn “maron̄ ko n̄an kam̧ōj doulul in eļap im aiboojoj, eo ej Kabun̄ in im aelōn̄ an Anij”…3 Ke aolep men kar ba im kōm̧m̧an, Irooj eaar jab kwaļo̧k etke E eaar ejaake Kabun̄ in An āinwōt Eaar.
Jen jab meļo̧kļo̧k bwe enan̄in juon m̧ōttan in aolep katak ko rej bōk jikin ilo Kabun̄ in ej kōm̧m̧an jen sister ro. Wāween tōl eo eļap kar letok ej jān sister ro ad. Elōn̄ jerbal in jipan̄ ko im m̧akūtkūt ko rej karōk im tōl jen kōrā ro. Ko̧o̧njeļ eo im jipan̄ ko jet an kōrā ilo ward im stake ko̧o̧njeļ ko im ilo ko̧o̧njeļ ko routiej ilo opiij ko reļļap an Kabun̄ in rej letok im̧we eo emenin aikuj, māletlet, im jokkun wōt juon.
Ebōk jim̧or em̧m̧aan ro, ro rej kautiej kōrā ro im men in letok ko roktak jen doon an jetōb ippāer im kōrā ro rej kautiej kii ko an priesthood kabwijer jen em̧m̧aan ro n̄an karuwaineneik tok kōjeram̧m̧an ko relikio jen lan̄ ilo jabdewōt kijejeto ilo Kabun̄ in.
3. Em̧m̧aan ro im Kōrā ro Rej Aorōkier Wōt Juon
Em̧m̧aan ro im kōrā ro rej jon̄āer wōt juon imejān Anij im ilo imejān Kabun̄ eo, ak jon̄an wōt juon ej jab meļeļein bwe rej āinwōt doon. Eddo ko im menin letok ko rekwojarjar an em̧m̧aan ro im kōrā ro roktak jen doon ilo piktok ko aer ak jab ilo aorōk ko aer ak kareel ko. Katak ko an Kabun̄ eo ad ej likūt kōrā ro jon̄an wōt juon em̧m̧aan ro im barāinwōt rej oktak jen em̧m̧aan ro. Anij ej jab ļōmņak bwe em̧m̧aan ak kōrā rej em̧m̧an ak aorōk ļo̧k jen eo juon. Būreejtōn Hinckley eaar kwaļo̧k n̄an kōrā ro bwe “Jemed Indeeo … ej jan̄in kar ļōmņak bwe kwoj aikuj dik ļo̧k jen ribōk aiboojoj an kōm̧anm̧an ko An.”4
Em̧m̧aan im kōrā ro ewōr menin letok ko roktak ippāer, kajoor ko roktak, im meļeļe ko roktak im en̄jake ko. En̄in ej juon iaan unin pedped in katak ko etke jej aikuji doon. Ebōk juon em̧m̧aan im juon kōrā n̄an ejaake juon baam̧le, im ebōk em̧m̧aan ro im kōrā ro n̄an kōm̧m̧ane jerbal eo an Irooj. Juon ripālele em̧m̧aan im kōrā rej jerbal jim̧we ippān doon n̄an kalikio doon. Jen jojo kōjparok bwe jen jab kajjieon̄ in ukōt karōk eo an Jemedwōj Ilan̄ im jibadbad ko ilo mour ko ad.
4. Aolep Rej Jeram̧m̧an jen Kajoor an Priesthood eo
N̄e em̧m̧aan ro im kōrā ro rej etal n̄an tampeļ eo, rej jim̧or bōk menin letok eo jen ejja kajoor eo wōt, eo ej kajoor eo an priesthood eo. Tōre in me mālim eo an priesthood eo ej tōl jen kii ko an priesthood, im kii ko an priesthood eo rej kabwijer wōt jen em̧m̧aan ro rewānōk, maron̄ bōk kajoor im kōjeram̧m̧an ko an priesthood ej pojak n̄an aolep ajri ro nejin Anij.
“Jemedwōj Ilan̄ ej m̧ōņōņō kōn kajoor in An. Aolep em̧m̧aan im kōrā ro ewōr aer maron̄ n̄an kajoor in n̄an jipan̄ ilo mour ko aer make.” Aolep ro raar kōm̧m̧an bujen ko rekwojarjar ippān Irooj im ro rej kautiej bujen ko rej ekkar n̄an bōk m̧adenļo̧k ko an juon make, n̄an maron̄ kōjeram̧m̧an jen enjeļ ro rej kwaļo̧k, n̄an kōnono ippān Anij, n̄an bōk tarlep in ko̧jpeļ eo, im, eļap tata, n̄an erom rijolet ro ippān ļo̧k Jisōs Kraist aolep men ko ewōr ippān Jemen.
5. Jej Aikuj in Jeļā im Kwaļo̧k Naan in Kam̧ool eo an Katak ko
Jej aikuji kōrā ro an Kabun̄ in n̄an jeļā katak ko an Kraist im n̄an kwaļo̧k naan in kam̧ool eo an Jepļaaktok eo ilo aolep wāween komaron̄. Ej jan̄in kar wōr juon iien eļap ilo bwebwenato in laļ in. Satan im rikaļoor ro an rej kōkōm̧anm̧an ļo̧k kein jerbal ko aer, kōl ko aer m̧ae taujin iiō ko, im rej imminene ilo kakkure tōmak im lōke ilo Anij im ilo Irooj Jisōs Kraist ilubwilijin baam̧le in armej.
Kōj aolep—em̧m̧aan ro, kōrā ro, rūm̧m̧an ded ro, jodikdik ro, im ļaddik im leddik ro—epād ippāer Irooj im Kabun̄ eo An n̄an dāpij, n̄an kōjparok, im n̄an ajeded ipeļaakin laļ in. Jej aikuji eļap ļo̧k ainikien ko reļļap, kajoor im tōmak an kōrā ro. Jej aikuj in katak katak ko im n̄an meļeļe ta eo jej tōmak e bwe kwon maron̄ kwaļo̧k naan in kam̧ool eo am̧ kōn m̧ool in men otemjej—men̄e naan in kam̧ool ko remaron̄ waļo̧k ipeļaakin juon campfire ilo juon kāām an Doulul eo an Jiron̄ ro, ilo juon kweilo̧k in naan in kam̧ool, ilo juon blog, ak ilo Facebook. Kwe wōt komaron̄ kwaļo̧k n̄an laļ in bwe kōrā ro an Anij, ro raar kōm̧m̧ani bujen ko rej āinwōt doon im tōmak.
Sister ro, am̧ maron̄ kareel ej juon kareel ejenolo̧k—juon men ejjab maron̄ bar kōm̧m̧an jen em̧m̧aan ro. Ejjeļo̧k juon emaron̄ bōbrae ad Rilo̧mo̧o̧r kōn jabdewōt kareel eļap ļo̧k ak kajoor jen kom̧, leddik ro nejin Anij, maron̄—kom̧ ro ewōr kajoor im kam̧ool ilowaer. Kajoor in ainikien juon kōrā eaar oktak jab maron̄ būne, im Kabun̄ in ej aikuji ainikiem̧ kiiō eļap ļo̧k jen kar m̧okta.
Ij lewaj aō kam̧ool n̄an kom̧ im aō naan in kam̧ool bwe jej pād ilo juon iien eo jej aikuj jutak ippān doon. Jej aikuj jutak ippān doon—em̧m̧aan im kōrā ro, likao ro im jiron̄ ro, ļaddik im leddik ro. Jej aikuj jutak n̄an karōk eo an Jemedwōj Ilan̄. Jej aikuj kōjparok E. Emōj iuun ļo̧k e. Jej jab maron̄ jutak aiperper āinwōt membōr ro an Kabun̄ eo an Jisōs Kraist im Armej ro Rekwojarjar ilo Raan-ko Āliktata im kōtļo̧k bwe menin en wōnm̧aan ļo̧k im waļo̧k ilo an ejjeļo̧k rōjan̄ ko rebwe n̄an bwe ainikied en maron̄ ron̄.
Anij en kōjeram̧m̧an kom̧ bwe kom̧in peran n̄an katak im n̄an jeļā m̧ool ko relam̧ waan an ko̧jpeļ eo im n̄an kwaļo̧ki aolep iien kwoj būki.