2014
Eļan̄n̄e Mejam̧ Ej Iook ļo̧k Wōt Aiboojoj eo Aō
Eprōļ 2014


Eļan̄n̄e Mejam̧ Ej Iook ļo̧k Wōt Aiboojoj eo Aō

Katherine Nelson ej jokwe ilo Utah, USA. Heidi McConkie ej jokwe ilo Delaware, USA.

Ekōjkan mour karbōb ilo kajin, m̧wil, im paoktok ejipan̄ kōj kōrommakļo̧k meram im aiboojoj eo an Anij?

Ilo Ko̧o̧njeļ eo Ilan̄ ilo mour eo m̧okta, ke Jisōs Kraist eaar baļentier bwe en ad Rilo̧mo̧o̧r, Eaar ba n̄an Jemen bwe Ankilan (Jemen) aikuj in dedeļo̧k, im bwe aiboojoj eo ej aikuj an Jemen indeeo (lale Moses 4:2).

Irooj eaar aolep iien kōm̧m̧ane waanjon̄ak eo n̄an kaiboojoj eo Jemān. Ilo tōre in jerbal in kwaļo̧k eo An ilo mour in, Rilo̧mo̧o̧r eaar jab nōbar E make bōtaab kar kwaļo̧k n̄an rikaļoor ro An n̄an eo Jemen, katakin “Eo ej lōke Eō, e jab lōke Eō a eo ear jilkintok Eō” (Jon 12:44). Ilo m̧wil, paoktok, naan, im kōm̧m̧an, Rilo̧mo̧o̧r eo eaar katakin kōj kōn aorōk eo an karbōb.

Ilo wujlepļo̧k eo aer n̄an ļoor Rilo̧mo̧o̧r eo, rūm̧m̧an ded ro raar kout ilo bwebwenato in ej kwaļo̧k m̧wil ko aer itulowa im itulik kōn karbōb im kwaļo̧k ekōjkan an kallim̧ur eo aer n̄an kaiboojoj Anij eaar ļam m̧wil eo aer im tōl m̧akūtkūt ko aer.

Kaiboojoj Anij im Kōromaakļo̧k Meram eo

Em̧m̧an ļo̧k ad kile ekōjkan an karbōb kaiboojoj Anij n̄e jej meļeļe ta lukkuun meļeļe in karbōb. True to the Faith ej kōmeļeļe: “Karbōb ej juon m̧wiļ an ettā im jejjet ilo nuknuk, erreeo, kōnono, im m̧wil. Eļan̄n̄e kwoj erreo, kwojjab aikuj kūnōōr waj men ko ejjeļo̧k tokjeer n̄an kwe make. Ijelo̧kin, kom̧in pukot n̄an ‘kaiboojoj Anij ilo āinbwinnemi, im ilo am jetōb’ (1 Korint 6:20).”1

Ilo ad katak n̄an kwaļo̧k karbōb āinwōt an kar Rilo̧mo̧o̧r kwaļo̧ke, jej karuwaineneik tok Jetōb eo n̄an mour ko ad, eo ej kakūrm̧ool kallim̧ur eo me eļan̄n̄e māj eo mājed rej kalimjōk wōt aiboojoj eo an Anij, aolepen ānbwinnid enaaj obrak kōn meram (lale D&C 88:67). Ilo ami riiti ekōjkan an rūm̧m̧an ded ro jet meļeļe karbōb, kom̧ maron̄ ļōmņak kōn ekōjkan kōļapļo̧k meram ilo jetōb eo ami make jān kōm̧m̧ani oktak ko n̄an kōkm̧anm̧anļo̧k kallim̧ur eo itulowa n̄an im kwaļo̧k karbōb eo itulik.

Erom Karbōb ilo Kajin im M̧wiļ

“Naan ko am̧ im m̧akūtkūt ko remaron̄ wōr kareel eo eļap ilo kwe im ilo ro jet. Kwaļo̧k eok make kōn erreo, em̧m̧an im kajin eo ekōbōkakkak im ilo m̧akūtkūt ko me rej bōktok lem̧ōņōņō n̄an ro ipeļakūm̧. Kijejetok ko am̧ kōn karbōb ilo naan im kōm̧m̧an ej tōl ļo̧k n̄an ļapļo̧k tōl im kaenōm̧m̧an jān Jetōb Kwojarjar.”2

Dar’ja Sergeevna Shvydko jān Volograd, Russia, ej kōmeļeļeik bwe jej aikuj karbōb ilo ad kōnono āinwōt ad kōm̧m̧an n̄an ro jet kōn jeļā ņae im kōjerbal “ainikien emera im ine em̧m̧an kwaļo̧k kōn ļōmņak ko ad ilo ejjeļo̧k kōjerbal naan ko relej ak jekkar.” Kajin eo erreeo ej deeor jān ruruwe, kakkure, kajirere, im kakkure. Ejjamin kōm̧m̧an bwe ro jet ren metak ak kōm̧m̧an bwe eo ej kōnono ej en̄jake em̧m̧an ļo̧k jān jabdewōt; ej kwaļo̧k jouj n̄an im kile kwojarjar eo an aolep ajri ro nejin Jemedwōj Ilan̄.

Ad kōnono aikuj barāinwōt kwaļo̧k jeļā ņae eo n̄an Doulul in Anij: “Joļo̧k kajin eo ettoon im ejekkar, kōjerbal etan Irooj me ekanooj emakijkij kōjerbale ilo laļ in rainin. … Kōnkōm̧m̧an ilo jekjek eo an kain kajin rōt in … ekakkure maron̄ eo [ad] n̄an bōk im̧we ko an Jetōb Kwojarjar.”3

Ejja āinwōt kōnono eo ejjab karbōb āinwōt ruruwe im kajirere maron̄ kakkure kadkad ko, kōnono karbōb ej kōketak juon kallim̧ur em̧wilaļ n̄an Anij im, āinwōt an Kelly Prue jān Utah, USA, kōmeļeļeik, “ej kōļapļo̧k maron̄ eo ad n̄an kalōk kadkad ko rem̧m̧an ippān ro jet. Ad kōnono erreeo ejipan̄ kōj bōktok ijo em̧m̧antata ippān ro jet.”

Erreeo ilo kōnono im karbōb ilo m̧wil rej jerbal ippān doon. “Elukkuun aorōk n̄an erreeo ilo kōnono im m̧wil kōnke rej kwaļo̧k wōn kwe im ta eo kwoj kaorōke,” Mike Olsen jen Utah ej ba. Armej rōkile n̄e naan ko im m̧akūtkūt ko rejjab jokkun wōt juon. Ad kōnono en kōbōkkak ro jet im en kaiboojoj Anij eaikuj dedeļo̧k jān m̧akūtkūt rej rejtake. Kōn jerbal in jipan̄ im jouj, jej kwaļo̧k bwe kallim̧ur eo ad n̄an kōbōkkak ro jet im kautiej Anij rem̧wilaļ ļo̧k jān naan ko ad. Waanjon̄ok ko ad an rikaļoor ilo naan im kōm̧m̧an remaron̄ in kareel n̄an em̧m̧an.

“Ij lukkuun kam̧oolol karbōb ilo m̧wil im kōnono,” Carrie Carlson ilo Colorado, USA ej ba. “Ewōr juon men elukkuun in em̧m̧an ippān juon eo ettā im ejjab kōm̧m̧ani men ko n̄an bōk nōbar. Ro ekarbōb aer kōnono rej erom jepe ko rekajoor n̄an Irooj.”

Erom Karbōb ilo Nuknuk im Paotokin

“Karbōb [ilo nuknuk] ejipan̄ kwaļo̧k ijo em̧m̧antata ilo kōj kōn jipan̄ kōj kalimjōk wōt jetōb ijelo̧kin armej ilo lukkuun pikitokin,” Paul Cave jen Utah ej ba. Kōn karbōb ilo nuknuk, jej kōketak ro jet n̄an jeļā kajied im kam̧oolol kōj kōn piktokid im m̧wilid ijelo̧kin ekōjkan aer kalimjōk kōj.

Wāween ad nuknuk ejjab kwaļo̧k wōt n̄an ro jet ekōjkan aer aikuj kōm̧m̧an n̄an ro jet, bōtaab ebarāinwōt jelet ekōjkan ad kalimjōk im kōm̧m̧an n̄an kōj make. “Jej ekkatak jān ko̧jpeļ eo bwe ānbwiinid ej juon menin letok jān Anij,” Luis Da Cruz Junior jen Brazil ej ba. “Ānbwiin ko ad rej jipan̄ kōj eddōk ļo̧k im erom̧ļo̧k āinwōt Jemed. Kōn wun in ej aorōk bwe jen karbōb ilo nuknuk. Kōn kōm̧m̧ane āindein, jej kwaļo̧k n̄an Anij im ro jet bwe jej kautiej menin letok in im n̄an ro jet.”4

Carrie ej kōmeļeļeik, “Jab karbōb ilo nuknuk ej jibadbad eo an n̄an pijaik ānbwiin eo āinwōt juon men me ejeno̧lo̧k jān jetōb eo me ewōr juon piktokin im m̧wilin. Karbōb, men̄e ekōm̧m̧an bwe in jolo̧k eļap jāān jet iien im em̧ool eļap iien, eaar jipan̄ eō bwe in katak bwe ānbwinū epād ie juon jetōb eaorōk kōn kōjatdikdik ekwojarjar im jibadbad eo, ejaak im karūttoļo̧k jān ro Jined im Jemedwōj Ilan̄. Ejejjet bwe en ļap ļo̧k kea kake im kautiej e ijelo̧kin an naaj kar laļ in leļo̧k.”

True to the Faith ej katakin: “Ilo kakobaba n̄an bōbrae [jab karbōb ilo nuknuk], kwoj aikuj in bōbrae kōņak nuknuk rekanooj jekkar, paotokūm, im m̧wijbar. Ilo nuknuk, erreo, im m̧wil ko, aolep iien kwon karbōb im erreeo, jab n̄an jidik jab kea ak jekkar.5 Ilo wāween ad nuknuk im kwaļo̧k kōj make, jej kwaļo̧k ad kautiej n̄an Anij, n̄an kōj make, im n̄an ro jet.

Kallim̧ur n̄an Jab Bar Oktak

Ilo ad kajieon̄ n̄an ļoor jon̄ak ko an ko̧jpeļ eo kōn karbōb, jej kwaļo̧k ad kallim̧ur n̄an jab oktak, ekkeijel kōn kien ko an Irooj ilo iien otemjeje ijello̧kin n̄e em̧m̧an.

Kallim̧ur m̧ool ej iien otemej etōt okran ilo pedped ko an ko̧jpeļ eo. Anthony Roberts jen Utah ej kōmeļeļeik, “Karbōb ej juon m̧ōttan wōn kwe, juon ikirelel n̄an etetal aolep raan ilo juon meļeļe kōn ko̧jpeļ eo im karōk in lo̧mo̧o̧r eo.” N̄e jej kajieon̄ mour kōn ko̧jpeļ eo ilo aolep jekjek an mour ko ad, oktak eo ad emaron̄ kam̧wilaļļo̧k im kōļapļo̧k ikdelel eo ad n̄an mour kōn pedped ko an ko̧jpeļ eo.

Meļeļe kōn Mour Kwojarjar eo Am̧

Jab oktak ilo kōjerbal karbōb ejipan̄ kōj meļeļe im kam̧oolol bwe jej ajri ro nejin Jined im Jemed ilo Lan̄, im jeļāļo̧kjeņ eo ad kōn mour kwojarjar emaron̄ im̧we kōj n̄an karbōb ļo̧k. Raffaella Ferrini jen Florence, Italy, ej kōmeļeļeik, “Karbōb eaar kōjeram̧m̧an mour eo aō kōnke ejipan̄ eō en̄jake āinwōt juon leddik eo nejin Jema Ilan̄ eaorōk, im bwe jeļāļo̧kjeņ, āinwōt juon uwaak, ekōm̧m̧an bwe in karbōb ļo̧k.

Kōtļo̧k an laļ in kōmeļeļeik wōn kōj emaron̄ in kakkure lōke eo ad make. Juliana Auna jen Utah ej kōmeļeļeik en̄jake eo an: “M̧okta jen aō bōk juon naan in kam̧ool kōn pedped in katak eo kōn karbōb, iaar jab m̧ōņōņō im mour in jetōb eaar jab jokne. Kōtļo̧k an laļ in kōmeļeļeik eō eaar kabūrom̧ōjm̧ōj im mour in jetōb eaar jako kōnke jum̧ae ko an laļ in kōn men pata, men ko an mour in renana im jekkar. Ke iaar kālet n̄an jab ron̄jake laļ in im kōtļo̧k bwe kadkad eo aō ippān Anij n̄an kwaļo̧k kadkadiū, mour eaar pidodoļo̧k, anemkwoj, im m̧ōņōņōļo̧k.” N̄e jej pukot mālim jān Jemed Ilan̄ ijjelo̧kin laļ in, jenaaj lo eļap ļo̧k lan̄lōn̄ ilo mour in im eļap ļo̧k im̧we n̄an karbōb.

Mour juon Mour Ekarbōb

“Karbōb ej waļo̧k ilo jabdewōt men jej kōm̧m̧ane: Ad kōnono, paotokid, m̧antid, im em̧ool jikin ko jej lolo̧k,” Galina Viktorovna Savchuk jen Novosibirsk, Russia ej ba. Mour karbōb ej ekeijel ļo̧k wōt ippān kallim̧ur eo ad n̄an ko̧jpeļ eo im kadkad eo ad ippān Anij.

Karbōb m̧ool ej juon koba in jim̧or m̧wil im kōm̧m̧an. Jerbal n̄an kōkōm̧anm̧an ļo̧k jim̧or m̧wilid ak ad ļōmņak naaj jipan̄ kōj kōkōm̧anm̧an ļo̧k ro jet. Karbōb ilo m̧wilid im ilo ejjeļo̧k ejaake juon kallim̧ur to̧o̧n wōt ad mour ej bōbrae kōj jān bōk tarlep in kōjeram̧m̧an ko an mour karbōb. Im tōmak bwe jej karbōb ilo jab kōtļo̧k bwe karbōb n̄an kareel m̧akūtkūt ko ad n̄an kapo kōj make.6

Ilo jekjek eo an karbōb, n̄an ba mājed rej kalimjōk wōt aiboojoj eo an Anij ej meļeļe in bwe jej itulik im itulowa kallim̧ur n̄an mour karbōb. Ejja āinwōt an māj aikuj kalimjōkļo̧k wōt Anij, paotokid im m̧akūtkūt ko ad rej aikuj jokkuun wōt juon ippān pedped ko an karbōb. Bōtaab kalimjōkļo̧k wōt Anij ejjab kōm̧m̧ane kalimjōk aiboojoj eo An; ej aikuj kalimjōk wōt E. Barāinwōt, nuknuk erreeo im karbōb eaikuj in kōm̧m̧an kōn juon pedped in katak ko indeeo.

Ilo ad kōro̧o̧l ļo̧k mājed n̄an Anij, jenaaj maron̄ in kapidodoļo̧k ad kalimjōk erreilo̧k eo ad n̄an E. Ejja āinwōt, ilo ad kalimjōk erreilo̧k eo ad ilo Anij, mājed enaaj kalimjōkļo̧k ilo iaļ eo An.

Ilo ad kajieon̄ mour karbōb, jenaaj en̄jake kareel eo an Jetōb eļapļo̧k ilo mour ko ad. Elder Robert D. Hales jen Doulul eo an Jon̄oulruo Rijilōk ro eaar katakin: “Karbōb ej pedped eo n̄an erom erreo eo an Jetōb. N̄an erom karbōb ej n̄an ettā, im erom ettā ej kūr tok Jetōb eo n̄an pād ippā.”7 Kōn an Jetōb tōl ļōmņak ko im m̧akūtkūt ko ad, mejād enaaj erom kalimjōk wōt aiboojoj eo an Anij im jenaaj obrak kōn meram.

Kakeememej ko

  1. True to the Faith: A Gospel Reference (2004), 106.

  2. True to the Faith, 108.

  3. True to the Faith, 108.

  4. lale True to the Faith, 107.

  5. True to the Faith, 107.

  6. Lale Lynn G. Robbins, “Kain Em̧m̧aan im Kōrā rot Kwokōņaan bwe Kwōn Āinwōt?” Ensign or Liahona, May 2011, 103.

  7. Robert D. Hales, “Karbab: Reverence for the Lord,” Ensign, Aug. 2008, 34; Liahona, Aug. 2008, 18.