Elōn̄ ippa Men ko n̄an Ajeji

Brent Fisher, California, USA

Aolep iien ikōn ļōmņak kōn kōppopo ilo idin̄ ilo wāween ko kōn kōjparok baam̧le eo aō im n̄a make. Bōtaab iaar katak n̄an kalimjōk kōppopo eo eoktak juon jibbon̄ in Jabōt ilo iturōk in Florida ilo 1992. Hurricane Andrew, juon iaan hurricane ko eļap an kar kakkure im ļap joļo̧k jāān n̄an e kar eotōk ilo United States, kar kakkure juon jōm̧m̧ar eaiboojoj ilo Miami, Florida.

Iaar make iaō ilo juon apartment turin lo̧jet, iaar pād ilo juon būrookram̧ in kaminene jilu allōn̄ kōn jerbal eo aō. Ke naan in kakkōļ eo an hurricane eo eaar itok im iaar katak kōmij aikuj in em̧m̧akūt jān apartment complex eo am ilo rāelep, juon eo ijeļa kajien eaar bōk ruum̧ in hotel ko ilo ijo ettoļo̧k jān lo̧jet n̄an emen rijerbal ro m̧ōttan im n̄a. Iaar dilaik bwilāwut ko ilo wūnto ko aō im kakoņi aolep men ko m̧weiō.

Kōn kōtmene kōn juon wiik eo aitok kōn lotok eo an lio ippa im ajri ro, ej kab m̧ōj aō kar wia ebwe m̧ōn̄ā im dān n̄an baam̧ļe eo aō jiljino uwaan. Iaar aenōm̧m̧an jeļā ewōr juon jikin ejokne ij ilo̧k n̄an e im ebwe m̧ōn̄ā n̄an bōk ippa ļo̧k n̄an jejjo wōt wiik ko.

Ke iaar kōppopo in em̧akūt ilo 10:30 jibbon̄., eaar em̧m̧an aō mour—aolep men raar pojak. Iaar bukwelōlō ilo jar, kam̧oolol Jemed Ilan̄ kōn kōjeram̧m̧an ko aō im kajjitōk kōn An jipan̄ ilo tōre eo ļan̄ ej itok. Ke iaar kōjem̧ļo̧k aō jar, Jetōb eo eaar im̧we eō bwe in ba, “Eļan̄n̄e ewōr jabdewōt ej pād ilo aikuj jipan̄, jouj im jipan̄ eō loe.”

Ilowan wōt jejjo minit ko, juon kōrā emej pāleen 80 an iiō eaar kōkōļļaļļaļ ilo kōjem eo aō. Eaar ba, “jolo̧k bōd.” “Ebōd ruum̧ eo. Ij pukot juon m̧ōtta.”

Eaar ikūm̧kūm̧. Ke iiar kajjitōk ippān eļan̄n̄e imaron̄ jipan̄, eaar jino̧ inepata im kar ba bwe ejjab jeļā ta eo n̄an kōm̧m̧ane ak ijo n̄an ilo̧k n̄an e. Iaar kajjitōk ia eo ej jokwe ie, im kōm̧ ar etetal ippān doon ļo̧k n̄an apartment eo an, kar etale jekjek eo an, im lale karōk ko an.

Iaar jiron̄ ļo̧k bwe company eo aō emaron̄ wōr juon jikin ilo juon iaan ruum̧ in hotel ko am, Im iaar karuwaineneik tok e n̄an pād ippān kumi eo am̧. Eaar bōk kūtuwōn ilo m̧ōņōņō. Kōm̧ ar m̧ōkaj in aini im kakoņ apartment eo an im aolep men ko m̧weien, im iaar kōm̧m̧an koņ n̄an an juon m̧ōtta ettōr ļo̧k kōn wa eo waan n̄an hotel eo.

Ke iaar kōppopo n̄an em̧akūt, bar ruo kōrā ro emej ļōm̧aro pāleer raar kajjitōk kōn jipan̄. Iaar kaenōm̧m̧an er bwe en alikkar aer ļōmņak im pukōt ia eo n̄an lo jikin kone. Ke iaar bōk kōban̄ eo jān juon iaan rijerbal ro m̧ōtta, bar juon kōrā emej pāleen erūtto eaar kajjitōk kōn jipan̄. Kōm̧ ar likūt aitōm ko repidodo ilo eria ko epen aer jorrāān im kar jipan̄ e kōppopo n̄an em̧m̧akūt.

Ilo tōre eo, rijerbal ro jet m̧ōtta raar kūr tok ruo rijikuul in college ro me rej jokwe ilo bukwon eo n̄an pād ippān kumi eo am̧ ilo hotel eo ettoļo̧k jān lo̧jet. M̧ōn̄ā eo de eo eaar wōr ippāer m̧ōn̄ā in kōtaan awa ko im juon quart (.95L) in aibōj. Jeram̧m̧an, elōn̄ ippa n̄an ajej, ejjab ippāer wōt ak ippān barāinwōt ro jet.

Eaar juon kōjeram̧m̧an n̄an pojak im kar tōl jen Irooj. Menin ekōm̧m̧an bwe in leļo̧k juon kareel in kaenōm̧m̧an ilo juon tōre apan̄ im jolo̧k enan̄in aolep aō iien jipan̄ ro jet ilo jab inepata kōn n̄an make. Iaar bōk juon jon̄ak in kam̧oolol kōn kapilōk eo jān ritōl ro ad ilo priesthood eo n̄an m̧aanjappopo.