Ko ha Tali ki Heʻene Lotú
Linisī Līveti, Nevata, USA
Naʻe ʻikai ke u ongoʻi ʻe au e laumālie ʻo e Kilisimasí. Ko e Tīsema ia ʻo hoku taʻu fakaʻosi he ako māʻolungá, pea ne u hanga atu ki heʻeku tohi kole hū ki he kolisí mo ʻeku ngāue fakaʻosi ke fai ʻi he Loumailé. Naʻá ku fakaʻamu ke maʻu ha faingamālie ngāue tokoni ke fokotuʻu heʻeku tohi kole hū ki he kolisí mo toe fakaʻaongaʻi heʻeku ngāue he Loumailé. Meʻa mālie he naʻe kole ʻe heʻeku ʻetivaisa he kau taki ʻo e fānau akó pe te u lava mo hoku kaungāmeʻa ko Sēsiká ʻo fokotuʻutuʻu ha feinga tānaki meʻavaʻinga ʻa e akó maʻá ha kautaha tokoni ʻofa he feituʻú.
Naʻá ku vahe ʻa e konga lahi ʻo e ngāué ki he kōmiti ngāué. Naʻá ku ʻai ke nau faʻu ha papa fanongonongo (bulletin board) ʻokú ne fakahaaʻi ha fuʻu meʻafua lahi ʻoku ʻasi ai e lahi ʻo e ngaahi meʻavaʻinga kuo foakí. Naʻa mau fakakaukau kuo feʻunga e tuʻuaki ko iá, pea mau fakamoleki leva e taimi maʻu meʻatokoni hoʻataá takitaha ki hono tānaki ʻo e ngaahi foakí. Neongo ia, naʻe foaki ʻe he fānau akó ha fanga kiʻi meʻa vaʻinga siʻi pē, pea kei nofo ai pē meʻafuá ʻi lalo.
Kae ngali kehe, he naʻe kamata toʻo mavahe ʻe he ʻetivaisá ha ngaahi meʻavaʻinga ʻe niʻihi. Ko e taimi naʻá ku ʻeke ange ai mo Sēsikā pea ko e hā ʻene palani ki aí, naʻá ne talamai ʻoku ʻi ai ha faiako ʻi he ʻapiakó ne toki ʻilo kimuí ni ʻoku kanisā. Kuó ne pehē ke mālōlō fakataimi ā mei he ngāué hili haʻane fāifeinga ke kei faiako lolotonga ʻoku fai pē hono faitoʻó. ʻI he ofi ʻa e ngaahi ʻaho mālōloó pea fokotuʻuna mo e moʻua fakafaitoʻo ke totongí, he ʻikai maʻu ʻe hono fāmilí ha meʻa ki he Kilisimasí. Naʻe fokotuʻu ai heʻemau ʻetivaisá ke mau kofukofu e ngaahi meʻaʻofa kuo tuku mavahé maʻanautolu.
Naʻe ongo ki hoku lotó. Naʻá ku lau ʻe au ʻeku ngāue tokoní ko ha founga ke tokoniʻi ʻataʻatā pē au, kae ʻikai ko e niʻihi kehé. Naʻá ku fakakaukau leva ke liunga tolu ʻemau taumuʻa ki he ngaahi meʻavaʻinga ʻe tānakí pea kamata mo ha tānaki paʻanga maʻá e faiakó mo hono fāmilí.
Naʻá ku ʻalu mo Sēsikā ki he ngaahi loki akó mo tuʻuaki ʻema ngāue ʻoku faí. Naʻe lahi fau ʻa e tokoní. Naʻe foaki ʻe he kau faiakó, kau ngāué, mo e fānau akó ha ngaahi meʻavaʻinga mo ha paʻanga ke tokoni ki he fāmilí. Naʻe ʻikai hano taimi kuo mau fakalaka heʻemau taumuʻa ki he ngaahi meʻavaʻingá, ʻa ia ne fakatumutumu ai e kautaha tokoni ʻofá. Naʻa mau toe tānaki foki mo ha $1,000 tupu maʻá e fāmilí.
ʻI heʻemau kofu fakalelei ʻa e ngaahi meʻaʻofa naʻe tānaki mo fakataú, naʻá ku fakatokangaʻi ko e fakamoʻoni ʻo e ngāue tokoni naʻá ku maʻú, naʻe maʻongoʻonga tatau pē ia mo e ngaahi meʻaʻofa ne mau foakí. ʻOku ʻikai ke u lava ʻo fakamatalaʻi ʻa e fiefia naʻá ku ongoʻi ʻi heʻemau vakai atu ki hono maʻu ʻe he fāmilí ʻa e ngaahi meʻaʻofa ne mau tuku fakapulipuli ʻi honau falefakatoló.
Hili ha ngaahi māhina siʻi mei ai, naʻe kole mai kiate au mo Sēsika ke ma akoʻi ha fakatahaʻanga ʻo kau ki he ngāue tokoni ʻofá. Naʻá ma fakamatalaʻi ʻa e meʻa naʻá ma fakahokó ka naʻe ʻikai ke ma lave ki he hingoa ʻo e faiakó. Naʻe hiki ʻe ha taʻahine hono nimá pea tuʻu ki ʻolunga. Naʻe tafe hono loʻi matá ʻi heʻene leá. Ko e faiakó, ko ʻene faʻētangata, peá ne fakamatalaʻi leva hono mahuʻinga fau ʻema ngāue tokoní ki aí. Naʻá ne pehē ko ha tali ia ki heʻene ngaahi lotú.
Ko ha fiefia lahi ʻi he faʻahitaʻu mālōlō ko iá ke fetākinima ʻi ha ngāue tokoni faivelenga mo ʻiloʻi ne mau fai ha liliu.