Lea ʻOku Leleí

ʻE lava ʻe he ngaahi lea ʻoku tau fakaʻaongaʻí ke fakamoʻoniʻi ʻa Kalaisi, fakafiemālieʻi e faingataʻaʻiá, fakaongoongoleleiʻi ha kaungāmeʻa, pe fakahaaʻi ha ʻofa ki ha mēmipa ʻo e fāmilí. Te tau lava foki ʻo lea ʻaki ha ngaahi lea te ne fakatupu ha loto-mamahi fakaeongo, fakamafola ha lau, lea taʻe fakaʻapaʻapa, pe tukuhifo. ʻI hono tokoniʻi hoʻo fānaú ke nau fakaʻaongaʻi e lea ʻoku leleí te ne ʻomi ai e melinó mo e fakalotolahí ki homou ʻapí. ʻI he Liahona ʻo e māhina ní he peesi 60–61, ʻoku fakamatalaʻi ai ʻe Leulī M. Kipisoni ʻo e kau palesitenisī lahi ʻo e Kau Talavoú e mahuʻinga ʻo e lea ʻoku maʻá:

“Ko e meʻa ko ia ʻi hotau lotó ko e meʻa ia ʻoku tau fakakaukau ki aí, pea ko e meʻa ko ia ʻoku tau fakakaukau ki aí ko e meʻa ia ʻoku tau lea ʻakí. Ko ia ai, ʻoku moʻoni ko e ngaahi lea ko ia ʻoku tau fakaʻaongaʻí ʻokú ne fakaeʻa mai e ngaahi ongo ʻo hotau lotó pea ko hai moʻoni kitautolu. …

“Te tau lava kotoa ʻo fiefia ʻi he ngaahi tāpuaki ʻo ʻetau maʻu maʻu pē e Laumālié, ʻo hangē ko e talaʻofa ko ia ʻi heʻetau maʻu e sākalamēnití he ʻaho Sāpaté. Ka ʻe makatuʻunga pē ʻiate kitautolu—ʻi he anga ʻetau tōʻongá, meʻa ʻoku tau faí, ʻio, naʻa mo e meʻa ʻoku tau lea ʻakí.”

Ngaahi Fokotuʻu ki hono Akoʻi ʻo e Toʻu Tupú

Te ke lava ʻo lau mo ho fāmilí ʻa e konga ko ia ko e leá ʻi he Ki Hono Fakamālohia ʻo e Toʻu Tupú (peesi 20–21). Aleaʻi e meʻa ke faí ʻi he taimi ʻoku fakaʻaongaʻi ai ʻe he niʻihi ʻoku mou feohí e lea koví.
Lau e fakamatala ʻa Misa Kipisoni ʻi he peesi 60–61. Ngāue ʻaki e fakamatalá ni ke fokotuʻu ai ha ngaahi taumuʻa ke fai ha fetokoniʻaki ke ngāue ʻaki e lea ʻoku leleí.
Ako mo aleaʻi e ngaahi folofola ʻoku hiki he tafaʻaki toʻomataʻú.
Lau e “Fili ke ʻOua ʻe Ngutu Laú” he peesi 59 ʻo e Liahona ko ʻení pea talanoa kau ki he fakatuʻutāmaki ʻo e ngutu laú. Aleaʻi e ʻuhinga ʻoku fai ai e laú mo e founga ke fakaʻehiʻehi mei aí.
Sio he ngaahi vitioó mo lau e ngaahi fakamatala ʻa e toʻu tupú ki he mālohi ʻo e leá. ʻAlu ki he youth.lds.org pea lomiʻi ʻi he “For the Strength of Youth”. Lomiʻi he “Language.” ʻOku ʻi he fakatoʻomataʻu ʻo e pēsí ha konga “Fekauʻaki” ʻoku ʻi ai ha foʻi vitiō hangē ko e “No Cussing Club (Kalapu ʻOku Tapui ai e Lea Koví)” mo ha ngaahi fakamatala ʻa e toʻu tupú ke ʻoua ʻe tukuhifo e niʻihi kehé.

Ngaahi Fokotuʻu ki hono Akoʻi ʻo e Fānaú

Fakakaukau ke lau “Ko e Ngaahi lea ʻOku Tau Lea ʻAkí” (Rosemary M. Wixom, Liahona, Mē 2013, 81); “ʻA e Ngaahi Lea Ko Iá” (Liahona, Tīsema 2011, 60); pe “Ko ha Tali Fakavaivai” (Liahona, Sune 2011, 70). Talanoa ʻo kau ki he meʻa ʻoku tau ongoʻi he taimi ʻoku tau fepōtalanoaʻaki lelei aí.
Aleaʻi e ngaahi meʻa ʻoku ʻikai te ke lea ʻaki ʻi homou ʻapí. Fokotuʻu ha taumuʻa ke lahi ange hono lea ʻaki ʻo e “kātakí” mo e “māloó” mo e fakalāngilangiʻí.
Talanoa kau ki he fiefia ange ʻa e taha kotoa ʻi heʻetau fepōtalanoaʻaki leleí. Hivaʻi e “Ko e Angaʻofá ʻe Kamata ʻIate Au” (Tohi Hiva ʻa e Fānaú, 145) pe ko ha hiva ʻe taha ʻoku kau ki he angaʻofá.