Ko Hono ʻOmi ʻo e Palaimelí ki ʻApi

ʻOku Fanongo Mai e Tamai Hēvaní mo Tali ʻEku Ngaahi Lotú

ʻE lava ke ke fakaʻaongaʻi e lēsoni mo e ʻekitivitī ko ʻení ke lahi ange ai hoʻo ʻilo ki he kaveinga ʻa e Palaimelí ki he māhina ní.

Kuo ʻi ai haʻo palopalema kuó ke fuʻu hohaʻa ki ai? Naʻe hoko ʻeni kia ʻAlamā mo hono ngaahi hoa ngāue fakafaifekaú. Naʻa nau feinga ke akoʻi e kakai Sōlamí kau kia Sīsū Kalaisi, ka naʻe ʻikai ke tui e kau Sōlamí ia kiate kinautolu. Naʻe fakakaukau e kau Sōlamí ia ʻoku nau lelei ange kinautolu he kakai kehé. ʻI he taimi ʻoku nau lotu ai he falelotú, ʻoku nau kaka ki ha tuʻunga māʻolunga naʻe ui ko Lameiumitomi pea nau fai e lotu tatau he taimi kotoa pē.

Naʻe loto ʻa ʻAlamā ke ne lotua ha tokoni. Naʻá ne fakahā ki he Tamai Hēvaní ʻene loto-mamahi ʻi he fuʻu fielahi mo taʻe tui ʻa e kau Sōlamí. Naʻá ne kole ki he Tamai Hēvaní ke Ne fakafiemālieʻi ia mo hono ngaahi hoá pea foaki ange ha mālohi kiate kinautolu ʻi heʻenau ngāue fakafaifekau faingataʻá.

Naʻe tali ʻe he Tamai Hēvaní e lotu ʻa ʻAlamaá. Naʻá Ne fakafiemālieʻi ʻa ʻAlamā mo hono ngaahi hoá pea tokoniʻi ke nau ongoʻi mālohi. (vakai, ʻAlamā 31.)

ʻOku fanongo mai maʻu pē e Tamai Hēvaní ki heʻetau lotú, pea ʻokú Ne tali ia ʻi ha ngaahi founga kehekehe. Mahalo he ʻikai maʻu ʻEne talí he taimi pē ko iá pe ʻi he founga ʻoku tau ʻamanaki ki aí, ka ʻokú Ne tali maʻu pē ʻetau lotú koeʻuhí he ʻokú Ne ʻofa ʻiate kitautolu.

Tau Talanoa

Ko e hā mo ha ngaahi talanoa kehe ʻi he folofolá ʻokú ke ʻilo naʻe lotu ai e kakaí ʻo maʻu ha tali? Te ke lava ʻo lau fakafāmili ha taha ʻo e ngaahi talanoá ni pea talanoa ki ha niʻihi ʻo e ngaahi founga ʻoku tali mai ai ʻe he Tamai Hēvaní ʻetau lotú.

Naʻe founga fēfē hono tali ʻe he Tamai Hēvaní hoʻo lotú, pea naʻe founga fēfē hoʻo ʻilo ko ʻEne talí ia? Ko e hā haʻo ngaahi palopalema he taimí ni te ke lava ʻo lotua?

Hivá mo e Folofolá

• “Lotu ʻa ha Kiʻi Tamasiʻi,” Tohi Hiva ʻa e Fānaú, 6.

• Tokāteline mo e Ngaahi Fuakava 112:10.

Ngaahi Lotu ʻi he Folofolá

ʻOku ʻoatu ʻi lalo ha ngaahi sīpinga ʻo ha kakai mei he folofolá ne nau lotua ke maʻu ha tokoni ki ha ngaahi palopalema kehekehe pea nau maʻu e ngaahi talí. Kumi e ngaahi puha ʻoku ʻalu fakatahá mei he kōlomu takitaha. Ngāue ʻaki e ngaahi fakafekauʻaki folofolá he tafaʻaki ʻo e fakatātā takitaha ke tokoni atu kiate koe.

Ko e Tokotaha naʻe Lotú	Ko e hā e ʻUhinga ne Lotu aí	Ko e hā e meʻa ne Hokó
Kuini ʻĒseta (ʻĒseta 4–7)	Naʻa nau ilifia naʻa liliu ʻenau lea fakafonuá pea he ʻikai ke nau toe lava ʻo femahinoʻaki.	Naʻe fakahā kiate ia ʻe he Tamai Hēvaní e founga ke ngaohi ai ha ngaahi meʻangāue ke foʻu ʻaki ha vaká.
Nīfai (1 Nīfai 17:7–17; 18:1–4)	Naʻá ne fie maʻu ke ʻilo e siasi ʻe kau ki aí.	Naʻe fakangofua ia ʻe he tuʻí ke ne moʻui, pea naʻá ne fakalotoʻi ia ke fakahaofi hono kakaí.
Siosefa Sāmita Hisitōlia—Siosefa Sāmita 1:10–19	Naʻá ne fie maʻu ke fakalotoʻi e tuʻí ke maluʻi hono kakaí mei hono fakaʻauhá, ka naʻe mei lava ke tamateʻi ia koeʻuhí ko ʻene ʻalu taʻe fakaafeʻi ki he tuʻí.	Naʻe ʻaloʻofa e ʻEikí kiate kinautolu ʻo ʻikai ke liliu ʻenau lea fakafonuá.
Ko e tokoua ʻo Sēletí mo hono fāmilí (ʻEta 1:33–37)	Naʻe fie maʻu ke ne foʻu ha vaka ke ʻave ai hono fāmilí ki ha fonua foʻou, ka naʻe ʻikai ke ne ʻiloʻi e founga ke foʻu ai ha vaká pea ʻikai ke ne maʻu e ngaahi meʻangāue naʻá ne fie maʻú.	Naʻe hā ʻa e Tamai Hēvaní mo Sīsū Kalaisi kiate ia pea fakahā kiate ia ke ʻoua naʻá ne kau ki ha taha ʻo e ngaahi siasí.