Mālō e lelei! Ko Uili au mei Taiuani

Mei ha ʻinitaviu mo ʻEimi Seini Liviti

ʻOku ʻi ai ha faʻahinga ʻekitivitī fakafāmili ʻokú ke saiʻia ai? ʻOku fiefia ʻa Uili mo hono tokoua ko ʻĀlaní ʻi he nofo mo hona fāmilí he ngaahi ʻaho Tokonakí ʻo takaiʻi holo e ngaahi feituʻu foʻou he motu ko Taiuaní, ʻa ia ʻokú na nofo aí.

ʻOku lahi ha ngaahi ʻaho mālōlō mo ha ngaahi kātoanga fakafiefia ʻi Taiuani. ʻOku mau fakamanatu ʻi Sepitema e Kātoanga ʻo e Māhiná. ʻOku fakataha kotoa mai homau fāmilí ʻo mau kai e keke ifo ʻoku hangē ha foʻi māhiná, ʻoku fakafonu ʻaki e piini kulokulá pe tengaʻi lotusí.

ʻOku mau faʻa maʻu ha faingamālie ʻi Taiuani ke fai ha ngāue fakafaifekau. Ne u akoʻi ki heʻeku kalasi ʻi he ʻapiakó ha meʻa kau ki he faitotonú. Ne u akoʻi ke nau hivaʻi e hiva ʻa e Palaimelí ko e “Tuʻu ʻi he Totonú.”

Kimuʻa pea mau mohé, ʻoku mau lau fakafāmili e folofolá. ʻOku saiʻia ʻa ʻĀlani he talanoa ʻo Mōsesé mo e ngata palasá. Ko e talanoa ʻoku ou manako aí e taimi ne fakatokanga ai e ʻEikí kia Līhai ke mavahe mei Selusalemá mo tala kia Nīfai ke ne foʻu ha vaka ke nau ʻalu ai ki he fonua ʻo e talaʻofá.

ʻI he tuku ʻa e akó, ne u lue mo hoku tokouá mo ʻema kui tangatá ki ʻapi. ʻOku fai ʻema ngāue mei ʻapí pea maʻu meʻatokoni efiafi mo ʻema faʻeé mo e tamaí. Ko ʻeku meʻakai manakoá ko e nūtolo pulu, pea ko ʻĀlani ko e laise fakapaku. ʻOkú ma fakatou saiʻia he meʻakai ʻoku melié.