Ko ha Kalisitiane Au

Kefi Fesulu Kuleiki, ʻAlesona, USA

Ko ha faiako kalasi ua au ʻi ha komiunitī ʻoku ʻiloʻi lelei ai e Kāingalotú. Ne u ʻohovale ʻi ha ʻaho ʻe taha ʻi hano talamai ʻe haku kaungā ngāue ha lau ʻa ha faiako ʻe taha kau kiate au. Naʻe pehē ʻe he faiako, “ʻOkú ke ʻiloʻi koā ʻoku ʻikai ko ha Kalisitiane ʻa Misisi Kuleiki?”

Ne u fuʻu loto-mamahi. Ne toki mālōlō atu pē hoku husepāniti ne ma mali he taʻu ʻe 28, pea ne u toe ofi ange ki he Fakamoʻuí mo ʻeku Tamai Hēvaní ʻi ha toe taimi kimuʻa heʻeku moʻuí. Ne u ʻilo ʻoku totonu ke fai haʻaku fakamoʻoni ki he faiako ko ʻení, ka naʻe ʻikai ke u fakapapauʻi e founga ke fakahoko ʻakí. Naʻe ʻikai ke u loto ke fakaʻitaʻi ia, ka naʻá ku toe loto ke ne ʻiloʻi ko e Kāingalotú ko e kau Kalisitiane.

Ne fanafana mai kiate au ʻa e Laumālie Māʻoniʻoní he pongipongi hono hokó e meʻa ʻoku totonu ke u lea ʻakí. ʻI heʻeku tokoto he mohengá, ne u fakakaukau ki he ngaahi tā valivali kotoa ki he moʻui ʻa Sīsū Kalaisí ʻoku ʻi hoku ʻapí. ʻOku ou ʻofa makehe ʻi he tā valivali takitaha he naʻe fekauʻaki ia mo ha taimi makehe ʻi heʻeku moʻuí. Naʻe ʻomi ʻe he fakakaukau ki he ngaahi tā valivali ko iá ha ngaahi ongo māfana ki he ʻofa ʻoku ou maʻu ki he Fakamoʻuí.

ʻOku ʻi ai ha tā valivali ʻe taha ʻokú ʻasi ai hono fakatokalelei ʻe he Fakamoʻuí e tahi hoú. ʻOkú ne fakamanatu mai kiate au ʻEne ikunaʻi e meʻa kotoa pea te u lava ʻiate Ia ʻo ikunaʻi e meʻa kotoa, kau ai ʻeku loto-mamahi he mole hoku husepānití.

ʻI he hokohoko atu ʻeku fakakaukau ki he ngaahi tā valivalí, ne lomekina au ʻe ha ongoʻi houngaʻia ki he ngaahi tāpuaki ne u maʻu ʻi heʻeku kau ki he Siasi ʻo e Fakamoʻuí.

ʻI he pongipongi ko iá ʻi ʻapiako ne u ʻalu ki he lokiako hoku kaungā ngāué ʻo talaange ki ai ke ne ʻiloʻi ko ha Kalisitiane au. Ne u ʻeke ange ki ai, “Ko e ngaahi tā valivali ʻe fiha ʻo e Fakamoʻuí ʻoku ʻi homou ʻapí?” Naʻá ne talamai ʻoku ʻikai ke ʻi ai ha fakatātā ʻi hono ʻapí ka ko ha ongo kolosi pē.

Ne u talaange ki ai e ngaahi fakatātā ʻo e Fakamoʻuí ʻi hoku ʻapí mo e ʻuhinga ʻo e ngaahi fakatātaá kiate aú. Ne u fai ʻeku fakamoʻoni kia Sīsū Kalaisi mo ʻEne Fakaleleí.

Ne u toe talaange ki hoku kaungā ngāué naʻe makatuʻunga ʻeku kei kātaki mai he taʻu kuo hilí mei heʻeku ʻilo kia Sīsū Kalaisí. Ne u talaange ki ai e anga hono tokoniʻi au mo ʻeku fānaú Heʻene ʻaloʻofa ongongofuá ke mau kātekina e taimi faingataʻa ʻo e mole ʻa ha tamai mo ha husepānití.

Ne u fāʻofua ki ai ʻi he ʻai ke u mavahé, pea naʻá ne kole fakamolemole fakamātoato mai. Naʻe ʻikai ha toe veiveiua ʻi hoku lotó naʻá ne ʻiloʻi ko ha mēmipa au ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, pea ko e Kalisitiane au.