E Gadreva na Lotu na Veiwatini Qase Matua ka Kila Ka

Me sala vata kei na kena sa levu cake na iwiliwili ni daukaulotu gone ena kena vakalailaitaki sobu na yabaki ni kaulotu, sa gadrevi talega vakalevu sara ena veitabana ni kaulotu e vuravura raraba na veiwatini qase daukaulotu. Ena kena vakaduri vou e 58 tale na tabana ni kaulotu vovou, sa na gadrevi e vuqa tale na veiwatini qase daukaulotu me ra vakarautaka mai na kila ka vakaveiliutaki kei na veitokoni tale eso era sa gadrevi vakabibi me rawa vinaka kina na kaulotu.

Ena koniferedi ni Epereli 2013, a vosa kina o Peresitedi Thomas S. Monson ena vuku ni kena sa toso totolo tikoga na iwiliwili ni daukaulotu ka vakaraitaka na nona loloma ena vukudra era sa tu vakarau me ra veiqaravi vua na Turaga ena buturara ni kaulotu (raica na tabana e 4, 66). O Elder Russell M. Nelson ena Kuoramu ni iApositolo Le Tinikarua a veivakayaloqaqataki vei ira na veiwatini qase me ra veiqaravi. “Oi kemuni na veiwatini qase, ni tuvanaka na siga o ni rawa ni lako kina ki kaulotu. Keimami na vakavinavinakataka vakalevu na nomuni veiqaravi,” e kaya o koya (raica na tabana 45).

Ena itekivu ni koniferedi raraba ni Okotova 2012, e kaya kina o Peresitedi Monson: “Keitou tomana na gadrevi tiko ni so tale na mataveiwatini matua. Kevaka e rawa, ka sa gauna donu ni nomuni vakacegu, ka vakakina ke se tu donu tu na ituvaki ni nomuni bula, au sa veivakauqeti vei kemuni mo ni soli kemuni ki na veiqaravi vakadaukaulotu tudei. Erau na rawata ruarua na veiwatini na marau levu ena nodrau qaravi ira na luvei Tamada” (“Ni sa Kidavaki ki na Koniferedi,” Ensign se Liaona, Nove. 2012, 5).

Ena vuqa na yabaki, era sa dau veivakayaloqaqataki tiko na iliuliu ni Lotu vei ira na veiwatini qase me ra veiqaravi. E kaya kina o Elder M. Russell Ballard ena Kuoramu ni iApositolo Le Tinikarua: “Era gadreva na veitabana ni kaulotu ena veivanua kecega me levu cake na veiwatini. Na nodra sa matua kei na kila ka era sa yaco kina me ra noda daukaulotu vinaka duadua. Na nodra maqosa digitaki … sa rawa kina me ra tuberi ira vakavinaka na veiliutaki e veivanua, vaqaqacotaki ka vakabulabulataki ira na lewenilotu, ka kauti ira mai era sega ni lewenilotu vei Karisito” (“Missionary Couples—Trading Something Good for Something Better,” Ensign, June 1988, 9, 11).

Na veiwatini bula kilikili era gadreva me ra veiqaravi era sa vakayaloqaqataki me ra tukuna vei ira na nodra bisopi se peresitedi ni tabana na nodra gagadre me ra veiqaravi. E rawa ni duidui na balavu ni nodra veiqaravi mai na 6 ki na 23 na vula.

O ira e tiko na nodra taro me baleta na daukaulotu qase me ra qiri ki na 1-800-453-3860, isema 2-6741 (se 1-801-240-6741), se imeli SeniorMissionaryServices@ldschurch.orgmo ciqoma na isau ni dua na taro.

Na nodra sa matua vinaka kei na nodra kila ka na veiwatini qase sa rawa kina me ra tuberi ira vakavinaka na veiliutaki e veivanua, vaqaqacotaki ka vakabulabulataki ira na lewenilotu, ka kauti ira mai era sega ni lewenilotu vei Karisito.