Elder Adrián Ochoa
Ena Vitusagavulu
Ni veiqaravi tiko vaka-Vitusagavulu ni iWasewase mai Mexico, a tiko ena vica na siga ena siti o Chihuahua o Elder Ochoa ena veivosaki vata kei na peresitedi ni iteki kei na so tale, qai vodoka e dua na waqavuka ena ilakolako ki vale. Ia ni sa laki dabe, a ciqoma e dua na veivakauqeti kaukauwa sara vakayalo ni se bera ni oti na nona cakacaka mai Chihuahua.
Era sa vakayacora tiko na kaimua ni waqavuka na iotioti ni vakavakarau ni bera na vuka. “Ia,” e kaya o Elder Ochoa, “Au kila ni dodonu meu sobu mai na waqavuka oqori.” Sa mani sobu yani. A basika eso na itukutuku bibi sara ni oti e vica na veivakatarogi ka wali rawa kina e dua na leqa dredre ka mani toso kina na bula vakayalo ni dua na matavuvale.
Ia se bera ga ni oti na cakacaka nei Elder Ochoa mai Chihuahua. A kauti koya talega na Yalotabu ki na nona itikotiko vakaloloma e dua na tavalena ka rau sega tu ni sota ena vica vata na yabaki. A raica na tavalena—sa luluqa tu vakalotu—kei na nona matavuvale lailai ena ituvaki vakaloloma ni bula. “Au kila ni iwali ni nona leqa na Lotu kei Karisito. Au kerea na tavalequ me lesu mai ki lotu,” e kaya o koya.
A lesu tale mai ki lotu na tavalena, ka vakalesui tale e dua na isema vakamareqeti vakamatavuvale. A rawa vua na Turaga me vueta e vica vata na bula mai Chihuahua baleta ni a rogoca na veivakauqeti ni Yalotabu e dua na tamata.
O keda kece e baleti keda na veivakauqeti vakayalo dau veisautaka na bula vakaoya, e vakadinadinataka o Elder Ochoa, sa veiqaravi oti ena vuqa na veikacivi vaka-Lotu ni cakacaka voli ena buturara ni kacivaki ivoli. A vakatulewa ena Tabana ni Kaulotu na Honduras San Pedro Sula mai na 2004 ki na 2007 vakakina, mai na 2009 me yacova na nona mai kacivi ki na iKarua ni Kuoramu ni Vitusagavulu, a veiqaravi vakaikarua ni daunivakasala ena mataveiliutaki raraba ni Cauravou.
A sucu ena Maji ni 1954 mai San Francisco, California e Amerika, vei Eduardo kei Consuelo Ochoa,a tubu cake mai California vakakina e Mexico. Ni se cauravou voli a kacivi me qarava e dua na itavi digitaki vakaulotu ena tabana ni veiqaravi raraba e Mexico. Erau a vauci vata kei na watina o Nancy Villareal, ena Valetabu na Mexico City. Erau nodra itubutubu e lima na gone.