Elder Timothy J. Dyches
Ena Vitusagavulu
E dua na nona itavi taleitaki ena bula o Elder Timothy John Dyches sai koya me “ivakadinadina bula” ka vakadinadinataka vei ira tale eso, ka vukei ira me ra lako mai vei Karisito. Se veiqaravi tiko vakadaukaulotu, veimaliwai tiko ga ena nona matavuvale, se cakacaka tiko ena cakacaka e saumi kina, ena ciqoma ena marau na itavi kei na ilesilesi ka tovolea me vukei ira na tani me ra kitaka talega vakakina.
A sucu ena Janueri 1951 mai Murray, Utah e Amerika, vei Milo Fredrick kei Mary Katherine Dyches, e ikarua o koya vei iratou na vitu na gone. Ni se dikoni gone voli, eratou a toki na nona matavuvale ki Elko mai Nevada, ka dau cakacaka kina ni suka na vuli ena kemesi nei tamana. Ni rau cakacaka veitikivi, a vakavulica vua na tamana na bibi ni cakacaka vakaukauwa—e dua na ka qai yaga sara vakalevu vua ni daukaulotu voli ena Tabana ni Kaulotu na Germany South mai na 1970 ki na 1972.
“A dua na kaulotu dredre, ia sa kaulotu cecere vei au,” e kaya o koya. “Au vulica na yaga ni cakacaka vakaukauwa kei na talairawarawa ka tabu soro.”
Na cakacaka vagumatua oya a tomani tiko ni oti mai nona kaulotu ena gauna ni nona vuli, nona cakacaka, kei na ilesilesi vaka-Lotu. A sotava o Elder Dyches na marama ena qai watina e muri, o Jill Dudley, ni vuli tiko ena Brigham Young University. Erau a vakamau ena 26 ni Epereli, 1974, ena Valetabu mai Manti Utah. E tolu na luvedrau.
A rawata o Elder Dyches e dua na diqiri ni bejila mai na Brigham Young University ena vulici ni veika vakaunivesiti qai toso yani me rawata e dua na diqiri ni veiqaravi vakavuniwai mai na Washington University Medical School. Na nona gauna ni bula vakacakacaka a cicivaka e dua na nona tabana ni veisele ni daliga, ucu, kei na itilotilo mai Reno e Nevada.
Ena gauna e kacivi kina ki na iKarua ni Kuoramu ni Vitusagavulu, a veiqaravi voli o Elder Dyches ena isoqosoqo ni Cauravou vakadaunivakasala ena kuoramu ni dikoni. Sa veiqaravi oti o koya ena vuqa tale na veikacivi, oka kina na Vitusagavulu ni iWasewase, peresitedi ni Tabana ni Kaulotu na Oregon Portland, peresitedi ni iteki, daunivakasala ena dua na mataveiliutaki ni iteki, lewe ni matabose e cake, liganicakacaka ni valetabu, peresitedi ni Matawilivola ni Sigatabu, ka vunivola ni tabanalevu.