Neill F. Marriott
iKarua ni Daunivakasala ena Mataveiliutaki Raraba ni Goneyalewa
Ni se bera mada ga ni curu ki na Lotu, a vulica o Neill Foote Marriott ni se goneyalewa lailai ni tiko e dua na Kalou ka lomani koya.
“Na tamaqu e vaka na Tamada Vakalomalagi,” e kaya na ikarua ni daunivakasala ena mataveiliutaki raraba ni Goneyalewa. “Na nona loloma kei na veiciqomi ena vukudra na tani e sega ni yalani. E rawarawa ga ka sega ni vakilai na tokitaki ni noqu loloma kei na veivakabauti vua na tamaqu vakavuravura meu lomana ka vakabauta na Tamaqu Vakalomalagi.”
A sucu vei George kei Antonia Foote ena Okotova ni 1947 mai Alexandria, Louisiana e Amerika, o koya duadua ga na ganedratou e ono na tagane gone sobu. Ni oti nona tauriivola mai na Southern Methodist University mai Dallas e Texas, ena dua na diqiri ni volavola vakavavalagi kei na vuli ena ikarua ni itaba, a toki ki Cambridge e Massachusetts, ka laki cakacaka kina vakasekeriteri ena Harvard University. E kea rau sota kina kei David Cannon Marriott, ka tukuna vua, “E tiko eso na noqu itokani au vinakata mo sota vata kei ira.” A kauti ira mai na daukaulotu me vakavulici koya kei ira na nona lewe ni bure.
Ni vakarorogo vei rau na daukaulotu, e kaya kina, “na lesoni e vakalewena na veitikina lala ni noqu kila ka vakosipeli.” Ni oti na nona papitaiso ena Me ni 1970, rau se veitokani tikoga kei David; ni oti e dua na yabaki rau sa tekivu veigadivi ka rau vakamau ena June ni 1971 ena Valetabu e Salt Lake.
Ni rau cakacaka vata vakaveiwatini, a tiko e vale kei iratou na luvedrau lewe 11 o Sisita Marriott ena nona qarava tiko na nona cakacaka vakabisinisi. Erau sa veiqaravi oti ena vuqa na veikacivi vaka-Lotu. A veiqaravi vata kei koya ena nona vakatulewa ena Tabana ni Kaulotu na São Paulo Interlagos mai na 2002 ki na 2005, ka sa veiqaravi talega o koya vakaliganicakacaka tabu ena Valetabu e Salt Lake, peresitedi ni iSoqosoqo ni Veivukei ena iteki kei na tabanalevu, peresitedi ni Goneyalewa ena tabanalevu, qasenivuli ni iVakavuvuli ni Kosipeli, ka kenadau ni maroroi kakana.
Ena nona ilesilesi vou, e nuitaka o Sisita Marriott me na rawa ni wasea na ivakadinadina vata a ciqoma ni se goneyalewa. E vinakati ira na goneyalewa me ra kila ni ra “lomani mai vei Tamadra Vakalomalagi ena loloma titobu ka lagilagi duadua.”