Na Tuvakawa e Veisautaka na Yalo
E vuqa na valenivolavola ni tuvakawa ena veisiga mai muri era na tu e veivale, e yalataka o Elder Bradley D. Foster ena Vitusagavulu ena dua na nona vosa ena ika 23 ni Maji salavata kei na Koniferedi ni Tuvakawa kei na Tekenolaji na RootsTech 2013 mai Salt Lake City, Utah, Amerika.
O Elder Foster, e dua na iVukevuke ni Dairekita Liu ena Tabacakacaka ni Tuvakawa, a kaya ni na sega ni dede sa na 9 na bilioni na tamata e vuravura ka sa vakarautaka na Turaga na tekenolaji ena rawa kina me “vauci ka semati vata na veimatavuvale kece oqori.”
E vakabibitaka na kena caka na tuvakawa, vulici na kedra italanoa na tubuda—sega ni ituvatuva ni kawa walega, na kunei ni yaca kei na tikinisiga. Na vatu ni ibulubulu ena ibulubulu kece sara e vuravura e toka kina e dua na yaca, na siga ni sucu, dua na itoqa, kei na dua na siga ni mate, e kaya o koya. “Na itoqa lailai ena maliwa ni siga ni sucu kei na siga ni mate, ia na keda itukutuku kece sara e koto e loma,” e tukuna o koya. “Ia ni da sa dau vakanamata ga vakalevu ena kena raici vakadua na tikinisiga oqori, na noda lomani ira na tubuda—na vukici ni yaloda vei ira na noda qase—ena rawa mai na noda raica ka kila na itoqa.”
Dau kauti keda vata mai na tuvakawa ni da wasea vata na italanoa ka da cakacaka vata, e vakamacalataka o koya. “O koya gona, na tuvakawa e veisautaka noda ivolakabi; na tuvakawa e veisautaka na yaloda.”