Bonnie L. Oscarson
Peresitedi Raraba ni Goneyalewa
Ni veiqaravi tiko vakametereni ena Valetabu na Stockholm Sweden mai na 2009 ki na 2012, a raica o Bonnie Lee Green Oscarson na nodra solibula na Yalododonu Edaidai mai Sweden, Norway, kei Latvia me ra laki sokalou ena vale ni Turaga.
A sega ni kila ena gauna oya, ni veilesoni a vulica tiko mai vei ira na lewenilotu “yalomalumalumu, lomasoli ka dau yalodina vakalevu sara” oqo, ena veivuke me vagolea na nona rai vakaperesitedi raraba ni Goneyalewa.
“Me vaka ni sa levu sara na goneyalewa era sa digitaka tiko ena gauna oqo me ra laki kaulotu ka curu ki na valetabu ena dua na yabaki ni bula gone sobu, au nuitaka ni veika au sa sotava mai niu veiqaravi voli ena loma ni valetabu ena vukei au meu kila na ivakarau meu vukei ira kina me ra vakavakarau,” a kaya o koya.
A sucu o Bonnie Lee Green ena Okotova ni 1950 mai Salt Lake City vei Theo James kei Jean S. Green. Ni rau lewa na nona itubutubu me ra laki vakila na Lotu na luvedrau ena taudaku kei Utah, eratou sa toki o Bonnie yabaki ciwa kei na nona matavuvale ki Oklahoma e Amerika. Eratou a tiko talega ena dua na gauna mai Colorado kei Tennessee ni bera na toki ki Missouri, na vanua a laki sotavi Paul Kent Oscarson kina o Bonnie mai na vanua ni valetabu mai Far West, Missouri,—e dua na vanua bibi baleta ni ra a vakaitikotiko ena vanua vaka-Far West na tubudrau.
Ni oti nodrau vuli mai Brigham Young University, erau a vakamau na veiwatini ena 19 ni Tiseba, 1969, ena Valetabu e Salt Lake; era na qai tadu mai ki na matavuvale e vitu na gone.
Se qai yabaki 25 ga o Sisita Oscarson ena gauna e kacivi kina na watina—ka a veiqaravi tudei mai na 1965 ki na 1968 ena Tabana ni Kaulotu na Swedish—me vakatulewa ena Tabana ni Kaulotu na Sweden Göteborg.
Ni ratou lesu na Oscarson ki Amerika, eratou a vakaitikotiko mai Missouri, New Jersey, Massachusetts, kei Texas, ka a cakacaka kina o Baraca Oscarson vakaivukevuke ni peresitedi ena dua na sitoa levu. Me vakataki rau na nona itubutubu, e dau reki vakalevu o Sisita Oscarson ni tiko ena veivanua e lailai kina na lewe ni Lotu.
Sa veiqaravi oti vakatolu o Sisita Oscarson vakaperesitedi ni Goneyalewa, vakaqasenivuli ni semineri ena mataka lailai, kei na qasenivuli ni iVakavuvuli ni Kosipeli.