Mga Pangutana ug mga Tubag
“Usahay mobati ko nga nabug-atan kon maghunahuna ko mahitungod sa tanang butang nga angay nakong buhaton sa pagsunod sa ebanghelyo. Asa man ko magsugod?”
Mamahimong lisud ang kinabuhi kon sulayan nimo pagbuhat og daghan kaayo sa usa ka higayon. Sama pananglit, kon gisulayan nimo ang pag-adto sa seminary, eskwelahan, trabaho, ang templo, ug ang Mutual tanan sa usa ra ka adlaw, maglisud ka gayud. “Apan kon himoon nimo nga prayoridad ang mga kalihokan sa ebanghelyo ug planohon ang oras alang niini, magmalamboon ka. Ang mga kalihokan sa ebanghelyo sama sa seminary, pag-ampo, ug ang Katungdanan ngadto sa Dios o ang Personal nga Kauswagan mao ang pipila sa pinakaimportanting mga butang nga imong mabuhat isip batan-on. Oo, gahinan kini og ekstra nga panahon, apan mapanalanginan ka sa matag sakripisyo nga imong gibuhat sa pagkamasulundon.
Aron sa pagkat-on kon unsaon sa paggahin og panahon alang niini nga mga kalihokan, tinguhaa ang inspirasyon pinaagi sa pag-ampo ug pinaagi sa paghunahuna kon unsaon sa paggamit ang imong panahon. Ang Dominggo usa ka maayong adlaw sa pagplano sa mga kalihokan sa ebanghelyo ug ubang importante nga mga butang alang sa semana. Makatabang usab ang paghisgot niini nga pangutana kauban sa imong mga ginikanan ug mga lider sa Simbahan.
Kon maghunahuna ka mahitungod sa tanang butang nga kinahanglan nimong buhaton, hinumdumi nga ang mga klase sa Simbahan, mga programa, ug mga kalihokan mga dinasig—makatabang kini nga malig-on ang imong pagpamatuod, makasunod sa mga sugo, ug makaandam alang sa pagserbisyo og misyon ug maminyo sa templo.
Kon paningkamutan nimo ang pagmatinud-anon sa ebanghelyo, ang Ginoo “moandam og paagi” (1 Nephi 3:7) sa pagtabang kanimo nga masunod ang Iyang mga sugo, bisan kon mobati ka og kalisud. Ang pagsunod sa mga sugo modapit sa Espiritu nganha sa inyong kinabuhi. Ug ang pagbati sa Espiritu mopahibalo kanimo nga nagsubay ka sa espirituhanon nga dalan.
Buhata ang Gagmay ug Yano nga mga Butang
Ang Ginoo wala magtinguha nga mahingpit dayon kita sa tanang mga butang, apan gusto Niya nga mobuhat kita kutob sa atong mahimo. Kon nagpasabut kana nga magsugod sa mga sukaranan sama sa inadlaw nga pagtuon sa kasulatan ug pag-ampo, ikalipay Niya ang atong mga paningkamot. Kon andam kita nga mosunod sa ebanghelyo ug mohimo sa ginagmay ug yano nga mga butang nga gikinahanglan ngari kanato, ang tanan nga daw malisud nga mga butang nga Iyang gipabuhat kanato dili na kaayo malisud.
Hunter D., edad 17, Tennessee, USA
Sunda ang Ebanghelyo kauban sa Inyong Pamilya
Importante kaayo ang pagsunod sa ebanghelyo kauban sa atong pamilya. Makasugod kita sa pagsunod niini uban kanila pinaagi sa pag-ampo sa pamilya, pagtuon sa kasulatan sa pamilya, family home evening, ug paghimo sa kasaysayan sa pamilya. Kining sukaranan nga mga baruganan usa ka dako nga tabang sa pagsabut gayud kon unsay mahimo sa ebanghelyo ni Jesukristo sa atong kinabuhi.
Cherry O., edad 19, Davao, Philippines
Buhata ang Imong Pinakamaayo
Akong nakat-unan nga kon maningkamot ka sa paghimo sa tanang butang, maluya ka. Kon maningkamot ka lamang sa paghimo sa pinakamaayo matag adlaw, maayo kini. Kon maminaw ka sa Espiritu Santo ug magpaduol sa Ginoo pinaagi sa pag-ampo ug pagtuon sa kasulatan, mapahimutang ra ang tanan ug sa dili madugay mamahimo ka nga tawo nga mao ang gusto sa Ginoo kanimo. Akong gipaningkamutan nga maduol sa pagkahingpit ug ako nabalaka nga dili kaayo ko maayo, apan dili kana maoy gusto sa Ginoo. Ang pagbati og kakulang ug pagpakaubos sa kaugalingon dili iya sa Ginoo. Busa ihatag lamang Kaniya ang imong pinakamaayo, ug makakita ka og kalinaw ug hingpit nga kalipay sa imong kinabuhi.
Zandi C., edad 16, Wyoming, USA
Tinguhaa ang Tabang sa Ginoo
Basaha ang mga kasulatan ug mag-ampo matag adlaw. Tinguhaa kanunay nga mahiangay sa Espiritu Santo. Ang Langitnong Amahan motabang kanimo sa pagsunod sa ebanghelyo. Kanunaya ang pagtinguha sa Iyang tabang. Pangayoa ang Iyang direksyon aron imong mahimo kon unsay gilauman Niya nga imong buhaton. Sa matag husto nga pagpili nga imong gibuhat, bation nimo ang presensya sa Espiritu. Makahimo kini kanimo nga magtinguha sa paghimo og dugang pa nga husto nga mga pagpili.
Thaís S., edad 15, Rio Grande do Sul, Brazil
Salig sa Ginoo
Ania ang ebanghelyo aron sa pagtabang kanato, dili sa paghasol kanato. Kon may pagsalig man kita sa Ginoo, niana makabaton kita og pagsalig sa Iyang ebanghelyo. Kon may pagsalig ka, ang pagsunod sa ebanghelyo dili kaayo malisud tungod kay nakasabut ka nganong gisunod nimo kini.
Charlotte R., edad 14, Utah, USA
I-focus ang mga Buluhaton nga Anaa
Ayaw hunahunaa ang mga butang nga angay nimong humanon sa tibuok nimong kinabuhi; hunahunaa kon unsay gikinahanglan nga buhaton karon. Buhata ang kutob sa imong mahimo, ug ang Langitnong Amahan mopahinabo niini. Sama pananglit, samtang nangandam ko sa pagtudlo og leksyon sa seminary mahitungod ni Presidente Thomas S. Monson, naglibug ko kon unsaon kaha nako nga ang pito ka bata (tanan sila mas magulang kay nako) padayon nga maminaw, magkat-on, ug mainteresado. Mihukom ko nga maningkamot ug mopaapil gayud kanila kutob sa akong mahimo. Maayo ang resulta! Busa buhata lang ang pinakamaayo niana nga buluhaton nga gisangon kanimo.
Bethany F., edad 15, Kentucky, USA
Anam-anam nga Paglambo
Ang Ginoo miingon nga mohatag Siya og doktrina “pagtulun-an human sa usa ka pagtulun-an, lagda human sa usa ka lagda, diyutay dinhi ug diyutay didto” (2 Nephi 28:30). Dili kita makalaum nga masabtan ang ebanghelyo diha-diha dayon, apan kon magsugod kita sa mga sukaranan—gugmang putli, hugot nga pagtuo, ug paglaum—ug kon magtuon kita sa mga kasulatan, gamiton kini sa matag adlaw, ug mag-ampo kanunay, anam-anam kitang molambo ug magkaduol kita kang Kristo.
Riley C., edad 16, Utah, USA