Mga kabatan-onan
Salamat sa Akong Magtutudlo sa Sunday School
Ang akong klase sa Sunday School dili sa kanunay seryuso. Ganahan kaayo ko nga maminaw sa mga leksyon matag semana, apan usahay ingon og ang akong mga kauban sa klase dili. Kanunay silang mag-istoryahanay o magdula og mga electronic device samtang ang among magtutudlo naningkamot sa pagtudlo kanamo. Makaguol lang, usahay makita nako ang akong kaugalingon nga naapil sa problema.
Usa ka Dominggo grabe kaayo mi kasaba kaysa naandan, ug sa pagtapos sa klase, ang among magtudtudlo mihilak tungod kay walay usa nga naminaw sa iyang leksyon. Sa among paggawas sa klasehanan, naluoy ko kaniya.
Pagkasunod Dominggo ang among magtutudlo mipasabut nga nag-ampo siya kadaghan niadtong semanaha, nagtinguha og giya, ug iyang naamguhan nga kinahanglan niya nga mopakita kanamo og usa ka salida sa Simbahan. Iyang gisugdan ang salida, nga kabahin sa kinabuhi ni Jesukristo ug sa mga milagro nga Iyang gipanghimo.
Pagkagabii samtang naghunahuna ko kabahin sa salida, mibati ko og usa ka talagsaon nga butang. Sa kalit lang akong naamguhan nga ang akong gibati mao ang Espiritu, mas kusog kaysa sa una. Diha-diha dayon mihukom ko nga gusto nakong usabon ang akong kinabuhi nga mas mahisama sa Manluluwas, ug nakaamgo ko nga ang kasinatian sa Sunday School nianang adlawa nakapalig-on kaayo sa akong pagpamatuod. Mapasalamaton kaayo ko sa akong magtutudlo sa Sunday School ug sa tanan nga iyang gibuhat sa among klase matag semana.