Usa ka Tinuod nga Higala

Ni Sarah Chow

Gibase sa usa ka tinuod nga istorya

“Ang imong mga higala makig-unong kanimo” (D&P 121:9).

Ang mubo nga sulat gisulat sa blue nga papel nga dunay mga zigzag nga gi-drawing palibut sa mga kilid, mao nga bisan og si Jeremy ang mitunol niini ngadto kaniya, nahibalo si Melanie nga ang mubo nga sulat gikan ni Rachel. Milingi-lingi si Melanie. Nahuman na ang oras sa pagbasa, ug gipanghipos na sa iyang mga classmate ang ilang mga libro.

Nahibalo si Melanie kon unsay sinugdanan sa mubo nga sulat: “Minahal Kong Suod nga Higala.” Mipahiyom siya sa iyang kaugalingon. Siya ug si Rachel managhigala na sukad sa grade two. “Managhigala kaayo gihapon kami, bisan og kami managlahi kaayo,” naghunahuna si Melanie samtang giablihan niya ang sulat.

Minahal Kong Suod nga Higala,

Manigarilyo ka ba?

—Rachel

Nakalitan si Melanie. “Ako ug si Rachel managkauban sa tanang panahon,” naghunahuna siya. “Wala ba siya kahibalo nga dili ko manigarilyo?”

Gisulatan niya ang ubos sa papel:

Dili. Nagtuo ko nga dili kini maayo. Nganong gusto kang mahibalo?

—Melanie

Gihatag og balik ni Melanie ang mubo nga sulat ngadto kang Jeremy. Wala madugay gibalik kini og pasa ngadto kaniya. Gibasa ni Melanie:

Nangubit ko og usa ka putos sa sigarilyo gikan sa balay sa akong tiya. Gusto ka bang mosulay niini uban nako human sa klase?

—Rachel

Mitutok si Melanie sa mubo nga sulat. Dayon misulat siya:

Rachel! Nganong gusto man ka nga manigarilyo? Makadaot kini kanimo! Nahibalo kong ganahan kang mosulay og bag-ong mga butang, apan dili ko gustong makakita nga masakitan ka.

—Melanie

Misulat og balik si Rachel:

Ang diyutay nga sigarilyo dili makasakit kanako. Dili gani ni nako mahurot ang tanan.

—Rachel

Ingon og kahilakon si Melanie. Misulat siya:

Higala ko ikaw ug gihigugma ko ikaw. Ayaw panigarilyo.

—Melanie

Gibantayan ni Melanie si Rachel samtang gibasa ang sulat. Karon si Rachel ingon og kahilakon nga tan-awon. Gikuptan niya og dugay ang mubo nga sulat. Dayon misulat siya og balik. Pagkadawat ni Melanie sa mubo nga sulat, gibasa niya:

Salamat. Gimahal ko usab ikaw. Dili ko manigarilyo.

Nalipay si Melanie nga gipili niya nga mahimong usa ka ehemplo. Nahupay siya nga si Rachel mihimo og husto nga pagpili.

“Dili ko moambit og mga butang nga makadaot kanako.”

Ang Akong mga Sumbanan sa Ebanghelyo

Usa ka adlaw didto ko sa balay sa akong higala, ug dunay beer sa ilang refrigerator. Miinom og gamay ang akong higala ug midalit kanako. Miingon ko nga dili ko moinom og beer. Nangutana siya kon ngano, ug giingnan nako siya nga ang akong Simbahan nag-ingon nga kinahanglang dili kami moinom tungod kay dili kini maayo sa atong lawas. Nalipay kong wala ko moinom sa beer. Nalipay sab kong duna kitay Pulong sa Kaalam aron himsog ug luwas kanunay.

Sarah C., edad 8, Nevada, USA

Paghulagway pinaagi ni Matt Smith