Walay Paglubad nga mga Istorya sa Ebanghelyo
Kabubut-on ug Inspirasyon
Si Bruce R. McConkie natawo niadtong Hulyo 29, 1915, sa Michigan, USA. Siya gipaluyohan ngadto sa First Council of the Seventy niadtong 1946 ug gi-orden isip Apostol niadtong 1972. Siya namatay niadtong Abril 19, 1985. Kini nga pamulong gihatag sa Brigham Young University niadtong Pebrero 27, 1973.
Gipaabut nga kita mobuhat kutob sa atong mahimo diha sa atong gahum ug dayon magtinguha og tubag gikan sa Ginoo, usa ka silyo sa pagmatuod nga atong nakab-ut ang saktong konklusyon.
Sa dihang kita nagpuyo sa presensya sa Dios atong Langitnong Amahan, kita gitugahan sa kabubut-on. Kini naghatag kanato og oportunidad, pribelihiyo, sa pagpili unsa ang atong buhaton—sa paghimo og libre, dili pinugos nga pagpili. … Kita gipaabut nga gamiton ang mga gasa ug talento ug abilidad, ang balatian ug paghukom ug kabubut-on diin kita natugahan.
Apan sa lain nga bahin, kita gisugo sa pagsunod sa Ginoo, sa pagtinguha sa Iyang Espiritu, sa pag-angkon sa diwa sa pagpadayag ug inspirasyon sa atong kinabuhi. Kita nagpamiyembro sa Simbahan ug ang tawo nga may awtoridad mopandong sa iyang mga kamot sa atong ulo ug moingon, “Dawata ang Espiritu Santo.” Kini naghatag kanato sa gasa sa Espiritu Santo, nga mao ang katungod sa kanunay nga panag-uban niana nga sakop sa Dios nga Kapangulohan, basi sa pagkamatinud-anon.
Ug karon kita nag-atubang og duha ka proposisyon. Ang usa mao nga kita kinahanglan nga magiyahan pinaagi sa diwa sa inspirasyon, ang diwa sa pagpadayag. Ang lain mao nga kita ania dinhi ubos sa mando sa paggamit sa atong kabubut-on, sa pagdeterminar kon unsa ang atong kinahanglang himoon nga kita-kita lang; ug kinahanglan nga mobalanse gayud kita niining duha. …
Nan, ganahan ko, kon mahimo, mopresentar og tulo ka mga case study, nga gikan diin, tingali, makakat-on kita og pipila ka matuod ug masaligang konklusyon kon unsa gayud ang angay nga maanaa sa atong kinabuhi. Akong buhaton kining mga paghulagway gikan sa mga pagpadayag nga gihatag sa Ginoo ngari kanato.
“Kamo Wala Makasabut”
Case study numero 1: Adunay usa ka tawo nga ginganlan og Oliver Cowdery. … Iyang gisulat ang mga pulong nga gidiktar sa Propeta samtang ang Espiritu anaa kaniya sa proseso sa paghubad (gihubad pa ang Basahon ni Mormon nianang higayuna). Si Brother Cowdery maingon og linghod pa lang sa espirituhanon nianang higayona, ug siya nangita ug nagtinguha sa pagbuhat og usa ka butang nga labaw pa kaysa iyang espirituhanong kapasidad kaniadto. Siya mismo gusto nga mohubad. Ug mao nga iyang [gihangyo] ang Propeta, ang Propeta nangamuyo niini ngadto sa Ginoo, ug sila nakadawat og pagpadayag. Ang Ginoo miingon, “Oliver Cowdery, sa pagkatinuod, sa pagkatinuod, Ako moingon nganha kanimo, nga sa pagkatinuod ingon nga ang Ginoo buhi, kinsa mao ang imong Dios ug ang imong Manunubos, gani sa pagkatinuod ikaw makadawat og kahibalo sa bisan unsa nga mga butang nga imong pangayoon sa hugot nga pagtuo, uban sa matinuorong kasingkasing, nagtuo nga ikaw makadawat.” Ug dayon ang usa ka butang nga mahimo niyang madawat gihatagan og kahulugan nga usa ka “kahibalo mahitungod sa mga kinulit sa daan nga mga talaan, nga mga karaan, nga naglakip niadto nga mga bahin sa akong kasulatan nga gipamulong pinaagi sa pagpadayag sa akong Espiritu.”
Human matubag kadtong piho nga problema, ang Ginoo mipadayag og baruganan nga magamit niini ug sa uban pang mga sitwasyon: “Oo, tan-awa, Ako mosulti kanimo diha sa imong hunahuna ug sa imong kasingkasing, pinaagi sa Espiritu Santo, nga moabut diha kanimo ug nga mopuyo diha sa imong kasingkasing. Karon, tan-awa, kini mao ang espiritu sa pagpadayag. (D&P 8:2–3). …
… Ug mao nga siya mihangyo. Ug sama sa inyong nahibaloan, siya napakyas; siya wala gayud makahubad. … Kini gipangamuyo na usab ngadto sa Ginoo, kansang saad ilang gisulayan sa pagsiguro; ug ang tubag miabut, ang rason miabut, nganong dili siya makahubad: “Ikaw wala makasabut; ikaw nagdahum nga Ako mohatag niini nganha kanimo, samtang ikaw wala maghunahuna gawas sa pagpangutana kanako” (D&P 9:7).
Karon, ingon og mao lang kana ang gitudlo nga iyang buhaton, sa pagpangayo nga may hugot nga pagtuo; apan lakip nianang pagpangayo nga may hugot nga pagtuo mao ang nag-unang kinahanglanon nga atong buhaton ang tanan kutob sa atong mahimo sa pagkab-ut sa tumong nga atong gitinguha. Atong gamiton ang kabubut-on nga gituga ngari kanato. Gamiton nato ang tanang balatian ug kapasidad ug abilidad nga anaa kanato sa pagpahinabo sa unsa ang posible nga mahitabo. Karon, kini magamit sa paghubad sa Basahon ni Mormon, sa pagpili og asawa, sa pagpili og trabaho, sa pagbuhat sa usa sa 10,000 ka importanting mga butang nga mahitabo sa atong kinabuhi. …
“Nganong Nangutana Kamo Kanako?”
Karon, case study numero 2: … [Ang mga Jaredite] miabut sa mga katubigan nga kinahanglan nilang latason, ug ang Ginoo miingon ngadto sa [igsoong lalaki ni Jared], “Paghimo og mga kasko.” …
[Ang mga kasko] gamiton sa talagsaon ug lisud nga mga sirkumstansya, ug [ang igsoong lalaki ni Jared] nagkinahanglan og usa ka butang nga mas labaw pa kay sa unsa ang anaa kanila sa kasamtangan: nagkinahanglan siya og hangin. Ug kini usa ka problema nga dili niya masulbad nga siya-siya lang. Busa nangamuyo siya sa Ginoo, ug tungod kay dili gyud ni niya masulbad nga siya-siya lang, ang Ginoo misulbad niini alang kaniya ug miingon, “Buhata kini ug kamo makaginhawa.”
Apan ang igsoong lalaki ni Jared—nga may pagsalig tungod kay siya nakig-istorya sa Ginoo, tungod kay siya nangamuyo ug gitubag—nangutana pa og lain: … “Unsa ang among buhaton sa pagpahayag sa mga kasko?”
Ug ang Ginoo nakig-istorya kaniya og gamay kabahin niini, ug dayon miingon Siya niini: “Unsa ang buot nimo nga Ako kinahanglan mobuhat nga kamo makabaton og kahayag diha sa inyong mga sakayan? (Ether 2:23). Buot ipasabut, “… Gihatagan Ko kamo og kabubut-on; kamo gitugahan og kapasidad ug abilidad. Lakaw ug sulbara ang problema.”
Hinoon, nakasabut ang igsoong lalaki ni Jared. Misaka siya sa usa ka bukid nga ginganlan og Shelem, ug anaa sa rekord nga siya “mitunaw gikan sa usa ka bato og napulo og unom ka gagmay nga mga bato; ug sila mga puti ug tin-aw, gani ingon sa sihag nga bildo” (Ether 3:1). …
Ug gibuhat sa Ginoo unsa ang gihangyo sa igsoong lalaki ni Jared, ug kini mao ang higayon nga iyang nakita ang tudlo sa Ginoo; ug, samtang siya takus, siya nakadawat og pagpadayag nga labaw pa sa bisan unsang butang nga naangkon sa bisan kinsang propeta hangtud nianang higayona. Ang Ginoo mas mipadayag kaniya kabahin sa Iyang kinaiya ug personalidad kay ni bisan kinsa hangtud nianang higayona, ug kining tanan nahitabo tungod kay iyang gibuhat ang tanan nga iyang mahimo ug tungod kay nakigtambag siya sa Ginoo.
Adunay maayo nga pagkabalanse tali sa kabubut-on ug inspirasyon. Gipaabut nga kita mobuhat kutob sa tanan natong mahimo ug dayon magtinguha og tubag gikan sa Ginoo, usa ka silyo sa pagmatuod nga atong nakab-ut ang saktong konklusyon; ug usahay, uban sa kalipay, isip dugang, makaangkon kita og dugang kamatuoran ug kahibalo nga wala nato damha.
“Sila Magtinambagay sa Usag Usa ug Kanako”
Karon, case study numero 3: Sa sayong kasaysayan sa Simbahan, ang Ginoo misugo sa mga Santos sa pagpundok sa usa ka piho nga lugar sa Missouri. … Karon bantayi unsa ang nahitabo. Ang Ginoo nagsulti:
“Samtang ako namulong mahitungod sa akong sulugoon nga si Edward Partridge, kini nga yuta mao ang yuta nga iyang pinuy-anan, ug niadto kinsa iyang gitudlo nga iyang mga magtatambag; ug usab ang yuta nga pinuy-anan kaniya kinsa Ako mitudlo sa pagbantay sa akong balay tipiganan;
“Busa, himoa nga sila modala sa ilang mga banay ngadto niini nga yuta, [ug kini mao ang punto] ingon sa ilang gikauyunan tali sa ilang mga kaugalingon ug kanako” [D&P 58:24–25; empasis gidugang]. …
Tan-awa, ang Ginoo miingon “pagpundok” sa Zion. Ang mga detalye ug mga kasabutan, hinoon, ang unsaon ug kanus-a ug ang mga sirkumstansya, madeterminar pa pinaagi sa kabubut-on niadtong gitawag sa pagpundok, apan sila kinahanglang makigtambag sa Ginoo. …
Karon, human nga ang Ginoo mipadayag niini ngadto sa Presiding Bishopric sa Simbahan, Siya mihatag sa baruganan nga nagdumala niana nga sitwasyon, ug kini magdumala sa tanang sitwasyon. Ug kini usa sa atong mahimayaong mga kamatuoran nga napadayag. Siya miingon:
“Kay tan-awa, kini dili maayo nga Ako magsugo diha sa tanan nga mga butang; kay siya nga gipugos diha sa tanan nga mga butang, ang mao usa ka tapulan ug dili maalamon nga sulugoon; busa siya dili makadawat og ganti.
“Sa pagkatinuod Ako moingon, ang mga tawo kinahanglan nga matinguhaon nga moapil diha sa usa ka maayo nga katuyoan, ug mobuhat og daghan nga mga butang diha sa ilang kaugalingon nga gawasnon nga kabubut-on, ug magpahinabo sa daghan nga pagkamatarung” [D&P 58:26, 27; empasis gidugang]. …
Karon, mao kadto ang tulo ka mga case study; atong kat-unan ang gipadayag nga konklusyon. …
… Kon inyong nakat-unan unsaon paggamit sa kabubut-on nga gihatag sa Dios kaninyo, ug kon kamo naningkamot nga magdesisyon sa inyong kaugalingon, ug kon kamo nakahimo og konklusyon nga matarung ug eksakto, ug kamo nakigtambag sa Ginoo ug nakakuha sa Iyang silyo sa pagtugot sa konklusyon nga inyong nahimo, dayon nakadawat kamo og pagpadayag, sa usa ka butang; ug sa lain nga butang, maangkon nimo ang talagsaong ganti sa mahangturong kinabuhi, ug pagabayawon sa katapusang adlaw. …
Ang Dios naghatag kanato og kaalam niining mga butanga. Ang Dios naghatag kanato og kaisug ug abilidad sa pagbarug sa atong kaugalingong mga tiil ug mogamit sa atong kabubut-on ug mga abilidad ug mga kapabilidad nga anaa kanato; dayon kita igong mapainubsanon ug masunuron sa Espiritu sa pagtugyan sa atong kabubut-on ngadto sa Iyang kabubut-on, aron maangkon ang Iyang nagpanghimatuod nga silyo sa pagtugot, nga maanaa sa atong kinabuhi, niana nga paagi, ang diwa sa pagpadayag. Ug kon ato kining buhaton, walay pagduha-duha sa resulta: kini ang kalinaw sa kinabuhi; kini ang himaya ug dungog ug dignidad sa sunod nga kinabuhi.
PAGHULAGWAY SA LITRATO PINAAGI NI David Stoker; LITRATO SA MGA KAHOY © Plainpicture/Hasengold