Naminaw Ko sa Ikaduhang Higayon
Matthew D. Flitton, Mga Magasin sa Simbahan
Katulgon nako anang gabii sa wala pa ang biyahe sa dihang nakadawat ko og impresyon nga magpalit og yantas ug ligid para sa among 15 ka tuig nga minivan, nga walay reserbang ligid. Pagkabuntag nagkapuliki ko ug nakalimot sa impresyon. Among gipasakay sa sakyanan ang among tulo ka anak ug mga gamit ug mipaingon sa balay sa akong papa nga mga upat ka oras ang gilay-on.
Diha sa dalan, usa ka ligid sa van ang mibuto. Among gipaguyod [towed] ang van sa labing duol nga lungsod aron sa pag-ilis og ligid. Mikantidad kini og tulo ka pilo sa ipalit og yantas ug ligid ikumpara sa bili sa yantas ug ligid sa didto pa mi sa amoa, ug kami nalangay pa og 90 ka minuto. Nakabaton ko og kamapasalamaton sa mga pagdasig sa Espiritu ug mihukom nga mas maayong sundon kini sa sunod.
Upat ka tuig ang milabay ug nadugangan og duha ka bata, nagplano na usab mi nga mobisita sa akong papa, nga karon nagpuyo na og 13 ka oras ang gilay-on. Karon lahi na ang among van, kanang 14 na ka tuig. Mga usa ka semana sa wala pa mobiya, mibati ko nga kinahanglan nakong ilisan ang reserbang ligid sa van. Nakahinumdom sa akong nangaging kasinatian, gisunod nako ang pagdasig. Sa sunod nga mga adlaw mibati ko og impresyon nga mopalit og pipila ka ratchet tie-downs aron ipugong sa butang nga sa una amo lang higtan og pisi. Nagkinahanglan ko og duha apan upat ang akong gipalit. Gibutang nako ang sobra nga duha sa among emergency kit.
Sa among pagpamauli gikan sa pagbisita sa akong papa, mihapit mi og palit para sa panihapon. Samtang nagkuha ko og pipila ka gamit sa sudlanan nga naa sa atop sa van, ang akong tres anyos nga anak nga babaye mihikap sa sliding door. Natagak kini sa yuta! Kami mapasalamaton nga wala siya maigo sa pultahan. Hapit 500 ka milya (805 km) nami ka layo gikan sa balay sa Biyernes sa gabii, busa akong gigakutan ang pultahan aron kami makapadayon, apan dili na kini masirado ug kami makadungog sa gawas samtang nagdagan ang sakyanan. Mihunong ko pag-usab ug migamit sa usa sa sobra nga mga tie-down strap sa pag-ayo sa pultahan.
Pipila ka oras ang milabay misugod sa pag-uyog og kusog ang van. Adunay kusog nga tingog sa paglamba gumikan sa pagtay-og sa pultahan, apan ang strap mipugong niini. Mihunong ko ug nakita nga napudpod na ang usa ka ligid. Dali-dali nakong giilisan kini sa reserba nga akong gipalit mga pipila ka semana ang milabay ug nagpadayon na usab kami sa pagpauli.
Mapasalamaton ko sa mga pagdasig sa Espiritu Santo, nga naghimo kanamo nga luwas atol sa among pagbiyahe. Nasayud ko nga ang Langitnong Amahan nagbantay kanato kon kita maminaw sa “ligdong hinay nga tingog” (1 Mga Hari 19:12; tan-awa usab sa 1 Nephi 17:45; D&P 85:6), mosunod sa Iyang mga pagdasig, ug mangayo og panabang kon kita nagkinahanglan niini.