2011
O Le Tala o le Tusi a Mamona
Oketopa 2011

O Le Tala o le Tusi a Mamona

O le a le mea na tupu i le Tusi a Mamona? Faaaoga nei ata e aoao ai e uiga i perofeta ma tala i lenei tusi paia ofoofogia.

  1. O le Tusi a Mamona e amata i se perofeta e igoa ia Liae. Sa ia lapatai atu i tagata amioleaga i Ierusalema ina ia salamo, ae le’i faalogo ia tagata. Sa fetalai atu le Alii ia Liae e ave lona aiga, e aofia ai lona toalua, o Sarai, ma ona atalii o—Lamana, Lemuelu, Sama, ma Nifae—i le vao. (Tagai i le 1 Nifae 1–2.)

  2. Na toe auina atu e Liae ona atalii e aumai ia tusitusiga paia na tusia i papatusi apamemea. Sa i ai i nei papatusi le talafaasolopito o o latou augatama ma isi mea na faatonuina ai i latou e le Alii e tusia. Na tausia lelei e Liae ma Nifae nei papatusi. Sa laua tusitusia foi mea na tutupu i lo latou aiga i papatusi apamemea. (Tagai i le 1 Nifae 3–5.)

  3. Na tuuina atu e le Alii ia Liae se tapasa ua taua o le Liahona e taiala ai lona aiga i le vaomatua e agai atu i le nuu o le folafolaga. (Tagai i le 1 Nifae 16.)

  4. Na fetalai atu le Alii ia Nifae e fau se vaa e ave ai lona aiga i le nuu o le folafolaga. Sa usitai Nifae i lona tama faapea ma le Alii, ae e le’i usiusitai Lamana ma Lemuelu. (Tagai i le 1 Nifae 17.)

  5. Na folau atu Liae ma lona aiga i le nuu o le folafolaga i le vaa na latou fausiaina. (Tagai i le 1 Nifae 18.)

  6. Na faaauau pea le le usiusitai o Lamana ma Lemuelu i lo laua tama faapea ma le Alii. Ua iloga ē na tupuga mai ia i laua o tagata sa Lamana. Ae na faaauau pea ona usiusitai ia Nifae i lona tama faapea ma le Alii. Ua taua ē na tupuga mai ia te ia o sa Nifae. (Tagai i le 2 Nifae 4–5.)

  7. Ina ua maliliu Liae ma Nifae, sa vaaia e isi tagata, e pei o le uso o Nifae o Iakopo, le tusiaina o aoaoga taua ma mea na tutupu i luga o papatusi. (Tagai i le Iakopo 1.)

  8. Sa tatalo Enosa ina ia faamagaloina ana agasala, ma sa faamagaloina o ia. (Tagai i le Enosa 1.)

  9. Na fau e le Tupu o Peniamina se olo e aoao atu ai le talalelei i lona nuu. (Tagai i le Mosaea 2–6.)

  10. Na fasiotia e le tupu amioleaga e igoa ia Noa le perofeta o Apinati. Peitai na faaliliuina e aoaoga a Apinati se tasi o faitaulaga sili a Noa e igoa ia Alema. (Tagai i le Mosaea 11–17.)

  11. Na solaese Alema mai le lotoa a le Tupu o Noa, aoao atu le talalelei i isi tagata, ma papatisoina i latou. (Tagai i le Mosaea 18.)

  12. E le’i usiusitai le atalii o Alema o Alema le Itiiti. Na amioleaga o ia ma ana uo, o atalii o Mosaea. Ona fai atu lea o le agelu ia i latou e salamo. Na salamo Alema ma atalii o Mosaea ma faaaoga vaega o totoe o o latou olaga e talai ai le talalelei. (Tagai i le Mosaea 27–28.)

  13. Na faaliliuina e Amona le atalii o Mosaea le toatele o sa Lamana ina ua uma ona puipuia e Amona le lafu a le Tupu o Lamonae ma maua ai e ia le faatuatuaga o le tupu. (Tagai i le Alema 17–19.)

  14. Na tusia e Taitai Au Moronae le tagavai o le saolotoga ma tau e puipuia le saolotoga o ona tagata. (Tagai i le Alema 46, 48.)

  15. Na taitaiina e Helamana le autau e 2,000 o alii talavou amiotonu. (Tagai i le Alema 53, 56–58.)

  16. Na valoia e le perofeta sa Lamana o Samuelu le fanau mai o Iesu Keriso. (Tagai i le Helamana 13–16.)

  17. Na fanau Iesu Keriso, i se mea mamao i Peteleema. Na Ia aoao atu Lana talalelei, faamalolo ma faamanuia i tagata, ma faatuina Lana Ekalesia. Ona faasatauroina lea o Ia ma toetu mai. (Tagai i le 3 Nifae 1, 8–10.)

  18. Ina ua mavae Lona Toetu, na Ia asiasi atu i tagata amiotonu o sa Nifae ma sa Lamana. Na Ia aoao atu ia i latou Lana talalelei, faamalolo ma faamanuiaina i latou, e pei lava ona Ia faia i le laueleele i Ierusalema. (Tagai i le 3 Nifae 11–28.)

  19. Na filifilia se tamaitiiti e 10 tausaga le matua e igoa ia Mamona e tusi ia papatusi pe a matua o ia. I le 24 o ona tausaga na amata ai ona ia tuufaatasia ni tala sili ona taua mai faamaumauga uma i se seti o papatusi apamemea. (Tagai i le Mamona 1.)

  20. A o le’i maliu Mamona, na ia tuuina atu papatusi i lona atalii o Moronae. O Moronae sa avea ma taitai au i le vaegaau. O ia o le tagata sa Nifae mulimuli lea na sao mai i se taua maoae i le va o tagata sa Lamana ma sa Nifae. (Tagai i le Mamona 6, 8.)

  21. A o le’i maliu Moronae, na ia tanuina ia papatusi i se nofoaga ua taua o Kumora. Pe tusa ma le 1,400 tausaga talu ona tanuina e Moronae ia papatusi, sa tatalo ai se alii e 14 tausaga le matua e igoa ia Iosefa Samita ina ia iloa po o fea o lotu e moni. (Tagai i le Talafaasolopito—Iosefa Samita 2:5–16.)

  22. Na asiasi atu le Tama Faalelagi ma Iesu Keriso ia Iosefa Samita ma tau atu ia te ia e leai ni lotu e moni ma atoatoa. O le a fesoasoani Iosefa i le toefuataiina mai o le Ekalesia moni a Iesu Keriso. (Tagai i le Talafaasolopito—Iosefa Samita 2:17–20.)

  23. Na asiasi atu Moronae ia Iosefa Samita ma tau atu ia te ia ia papatusi o loo tanumia. Pe a matua ia Iosefa Samita, o le a ia aumaia papatusi ma faaliliuina. (Tagai i le Talafaasolopito—Iosefa Samita 2:27–54.)

  24. Ina ua atoa le 21 o Iosefa Samita, sa alu o ia i le Mauga o Kumora ma aumai papatusi mai le nofoaga lea na tanumia ai e Moronae. (Tagai i le Talafaasolopito—Iosefa Samita 2:59.)

  25. Sa faaliliuina e Iosefa Samita ia tusitusiga i luga o papatusi, e ala i le mana o le Atua. Sa ia lolomiina lenei faaliliuga. Ua taua o le Tusi a Mamona. (Tagai i le itulau autu ma le faatomuaga o le Tusi a Mamona.)

Agavale: ata na tusia e Robert Casey; faamatalaga auiliili mai ia Liae o loo Malaga e Latalata i le Sami Ulaula, saunia e Gary Smith; Sa Ou Usitai i le Leo o le Agaga, saunia e Walter Rane: O Liae ma le Liahona, saunia e Joseph Brickey; O Nifae o Loo Aoaoina Ona Uso Lē Usiusitai, saunia e Arnold Friberg © 1951 IRI; taumatau: O Liae ma Lona Aiga ua Taunuu i le Nuu o le Folafolaga, saunia e Arnold Friberg© 1951 IRI; Sa Laua Tofotofoina A’u ma le Tele o Sauaga, saunia e Walter Rane; O Nifae o loo Tusitusi i Papatusi Auro, saunia e Paul Mann © 1988; Sa Ou Sii A’e Lo’u Leo Lea na Oo atu ai i le Lagi, saunia e Walter Rane; I Le Galuega a Lou Atua, saunia e Walter Rane; faamatalaga mai le O Apinati o loo Tu i Luma o le Tupu o Noa, saunia e Arnold Friberg © 1951 IRI; Sau i le Lafu a le Atua, saunia e Walter Rane; Ua Tulai Alema, saunia e Walter Rane; atavali na saunia e Walter Rane o le faaaloaloga a le Falemataaga o Talafaasolopito a le Ekalesia

Agavale: O Loo Puipuia e Amona le Lafu a le Tupu o Lamonae, saunia e Arnold Friberg © 1951 IRI; Sau i Luma, saunia e Walter Rane, faaaloaloga a le Falemataaga o Talafaasolopito a le Ekalesia; Lua Afe Alii Talavou o loo Tau le Taua, saunia e Arnold Friberg, faaaloaloga a le Falemataaga o Talafaasolopito a le Ekalesia; Ua Vavalo ia Samuelu le sa Lamana, saunia e Arnold Friberg © 1951 IRI; Otootoina e Mamona ia Papatusi, saunia e Tom Lovell © IRI; Sa Oo Lava ina Ou Nofo Na o A’u, saunia e Walter Rane, faaaloaloga a le Falemataaga o Talafaasolopito a le Ekalesia; O Moronae o loo Tanumia ia Papatusi, saunia e Tom Lovell © IRI; O Manaoga o Lo’u Loto II, saunia e Walter Rane; taumatau: Ua Toetu o Ia, saunia e Del Parson; O Keriso ma Tamaiti o le Tusi a Mamona, saunia e Del Parson © 1995; O Le Agelu o Moronae o loo Faaali atu ia Iosefa Samita, saunia e Tom Lovell © 2003 IRI; Mauga o Kumora, saunia e Jon McNaughton; O Iosefa Samita o loo Faaliliuina le Tusi a Mamona, saunia e Del Parson © 1996 IRI