Na Tautala Mai le Tusi a Mamona ia te Au
Gina Baird, Iuta, ISA
Ina ua lua tausaga le matua o le ma uii, o Amanda, sa ma’i o ia i le kanesa o le toto. Sa faigata lona tulaga, ma sa le’i tuuitiitia lona kanesa ina ua uma togafitiga e faaaoga ai le leisa. Ona faia ai lea o sona taotoga e sui ai ga’o o se ivi.
A o i ai lo’u toalua ma le ma fanau tama e toalua i le fale i Iuta, sa ma nonofo ma Amanda i se isi setete mai ia Setema e oo i le amataga o Ianuari. Sa matou misia le faamanatuina faatasi o le Kerisimasi, ae o le maea ai o le togafitiga tulitatao, sa ma foi ai loa i le fale.
O le ma asiasiga muamua i le falemai mo lana siaki ina ua ma foi mai mai le matou aiga, na toe maua ai e fomai ni sela o le kanesa i le toto o Amanda. Sa le manuia le taotoga sa fai. O le faalogoina o le tala, sa ou lagonaina ai le pei na ou magoto ifo i le fola. Sa tele le atuatuvale, galuega, vavamamao, ma taimi faigata na oo i ai lo matou aiga. Ae o lenei o le a mamulu atu lava si a ma tama.
Sa ou toe foi atu i le fale i lau fanau tama e toalua. A o matou faatalitali i le taimi e manava mai ai lou toalua, sa matou aumaia a matou kopi o le Tusi a Mamona ma amata loa ona faitau. Sa oo le matou faitau i le 2 Nifae 9. A o matou faitau, na tautala mai upu nei ia te au:
“Ua ou fai atu ia mea ia te outou ina ia outou olioli ma faaea i luga o outou ulu e faavavau, ona o manuia e foai mai e le Alii le Atua i a outou fanau.
“Aua ua ou iloa ua outou suesue lava, o nisi o outou e toatele, ina ia iloa mea e oo mai; o lea ou te iloa ai ua iloa foi e outou e vaivai ma oti o tatou tino; ae ui lava i lea, tatou te iloa atu le Atua i o tatou tino. …
“Aua e pei ona oo le oti i tagata uma lava ina ia faataunuu le ala alofa o Le na faia mea uma, e tatau ona i ai le mana o le toe tu mai. …
“E ua sili naua le agalelei o lo tatou Atua, o Le sauniuni le ala ina ia sao ai i tatou ai lima o lenei faaiteite matautia; ioe, o lena faaiteite o le oti. …
“E afio mai foi o ia i le lalolagi ina ia faaolaina e ia tagata uma, pe afai latou te faalogo atu i lona siufofoga; aua faauta, e onosai o ia i tiga o tagata uma, e moni, o tiga o tagata ola uma, o tane ma fafine, atoa ma le fanau i le aiga o Atamu.
“Ua onosai o ia i nei mea uma ina ia oo le toe tu mai i tagata uma lava, ina ia latou tutu mai i ona luma i le aso tele ma le faamasinoga” (2 Nifae 9:3–4, 6, 10, 21–22).
A o ou faitau i nei upu, sa faatumulia le potu i le Agaga Paia. Sa ou lagonaina na silafia e lo’u Tama Faalelagi le tala na ou mauaina i lena aso. Na ou lagonaina o upu a le perofeta o Iakopo sa tusia i le silia ma le 2,000 tausaga ua mavae sa tusia foi mo au i lena aso ma na aumai tonu lava mai le Faaola. Sa Ia silafiaina le tiga ma le faanoanoa sa ou lagonaina ina ua ou faalogo o le a maliu le ma tama. Ma sa i ai o Ia iina e faamafanafana lo matou aiga i Lana folafolaga ua Ia saunia se ala ma e i ai se aso, e ala i le mana o le Toetu, “tatou te iloa atu le Atua i o tatou tino.”
Sa ola pea Amanda mo se isi tausaga, ae e lei galo lava ia te au lena aso ina ua tautala mai upu o le Tusi a Mamona ia te au i le taimi na ou manaomia ai, ma na tuuina mai ai e le Alii ia te au le faamoemoe, faamafanafanaga, ma le malamalama i Lana fuafuaga.