O Se Tautinoga, o se Feagaiga, ma se Molimau
Ou te molimau atu o le Tusi a Mamona o se feagaiga fou, o se molimau fou mai le Lalolagi Fou i le lalolagi atoa.
O faamautinoaga paia na ou maua e uiga i le Faaola ma Lana Ekalesia toefuataiina na oo mai ia te au mo le taimi muamua a o ou talavou ina ua ou faitau i le Tusi a Mamona. O le taimi na ou faitauina ai lenei faamaumauga paia na ou lagonaina ai—pea lava pea—musumusuga e le mafaafitia a le Agaga Paia na tautino mai ai i lo’u agaga lona moni.
O le faitauina o le tusi o le amataga lea o lo’u malamalama. O le punavai lea o lo’u mautinoa muamua faaleagaga o loo soifua le Atua, ma o Ia o lo’u Tama Faalelagi, ma sa faataatiaina se fuafuaga o le fiafia i le faavavau mo a’u. Na taitaiina atu ai au e fiafia i le Tusi Paia ma isi tusi faavae o le Ekalesia. Na aoaoina ai au ia ou alofa i le Alii o Iesu Keriso, ia iloa atu Lona alofa mutimutivale, ma mafaufau i le agalelei ma le maoae o Lana taulaga togiola.
Ona sa ou aoaoina mo a’u lava o le Tusi a Mamona o se molimau moni—o se tasi molimau ma se feagaiga fou—o Iesu o le Keriso, ua ou iloa ai foi o Iosefa Samita o se perofeta a le Atua. E pei ona fai mai le tamā o le tamā, o le tamā o lo’u tamāmatua i aso popofou o le Toefuataiga, “E leai se tagata leaga e mafai ona tusia se tusi faapenei; ma e leai se tagata lelei e mafai ona tusiaina, vagana e moni ma na poloaiina ai o ia e le Atua.”1
Ua faaopoopo i o’u uluai talitonuga maumaututu ia isi taimi musuia uma ma faaaliga faapaiaina, lea ua aumaia i le asō ni uiga loloto i o’u aso, faamoemoega i lo’u olaga, ma se faavae mautu i la’u molimau.
Ia, ma te le’i folau faatasi ma le uso o Iareto. Ou te lei faalogo i le Tupu o Peniamina o tuuina atu lana lauga maoae. Ou te lei i ai i le motu o tagata sa Nifae o e na fetagofi i manua o le Alii toetu, pe na matou fetagisi ma Mamona ma Moronae i le faatafunaga o se malo. Ae o lau molimau i lenei tusi ma le filemu na te aumaia i le loto o le tagata—ua tuuina mai ia te au e ala i le musumusuga a le Agaga Paia, e pei foi ona tuuina atu ia te outou—e pei lava le tumau ma le manino e pei foi o a latou [molimau]. Ou te molimau atu e uiga i lenei tusi, e pei moni lava, na matou vaai faatasi ma Molimau e Toatolu, i le agelu o Moronae, po o le, faapei foi o Molimau e Toavalu, na uuina papatusi auro.
Ou te molimau atu foi e leai se tasi o i tatou e mafai ona maua le faatuatua atoa i lenei galuega i aso e gata ai, ma faapea ona maua ai le fuataga atoa o le toafilemu ma le mafanafana i o tatou aso, sei iloga na te taliaina le paia o le Tusi a Mamona ma le Alii o Iesu Keriso, o lē o loo molimau ai. E pei ona fai atu Mamona ia Moronae i se tasi o o laua taimi sili ona faigata, ou te fai atu foi i o tatou aso faigata: “Ia e faamaoni ia Keriso. … Ia ia te oe ma mafuta ma oe e faavavau le alofa tunoa o le Atua le Tama, o Le ua maualuga i le lagi lona afioaga, ma lo tatou Alii o Iesu Keriso, o loo tietie i le itu taumatau o lona mana” (Moronae 9:25–26).
O le Tusi a Mamona o le faaaliga paia o le feagaiga maoae ma le tupito a Keriso i tagata. O se feagaiga fou, o se molimau fou mai le Lalolagi Fou i le lalolagi atoa. O le malamalama ou te savali ai o Lona malamalama lea. O Lona alofa mutimutivale ma le matagofie e taitaiina ai a’u —ma oe—i la tatou molimau ia te Ia i le lalolagi atoa.
E molimau le Tusi Paia ma le Tusi a Mamona ia Keriso, na saunia e Greg K. Olsen