Te mau Haapiiraa no to Tatou nei Tau
Te haapii mai nei tatou na roto i te mau peropheta tahito e te vai nei i roto i te Buka a Moromona e rave rahi mau « mea papû ra e te faufaa » (a hi‘o 1 Nephi 13:40; 19:3). Te horo‘a mai nei teie mau parau mau i te maramarama e te ite rahi atu â no ni‘a i te îraa o te evanelia a Iesu Mesia e te tauturu nei te reira i te mau piahi no te Buka a Moromona ia tere na roto i te mau tamataraa o te oraaa ma te ti‘aturi e te puai. I roto i te mau faahitiraa i muri nei, te faaite papû nei te mau peropheta e te mau aposetolo no teie anotau no ni‘a i teie mau haapiiraa faufaa rahi roa.
Te Haapa‘o nei te Fatu ia Tatou
« Te haamana‘o nei au i te mau parau a te Fatu tei itehia i roto i te Buka a Etera i roto i te Buka a Moromona. Ua parau te Fatu, ‘Aita e au ia haere outou i tera pae mai o taua moana rahi nei, maori râ e paruru vau ia outou i te mau are o te miti ra, e te mau mata‘i i reva’tu na, e te mau pape pue te haere maira’[Etera 2:25]. To’u mau Taea‘e e Tuahine, ua faaineine Oia ia tatou. Mai te mea e faaroo tatou i Ta’na mau parau e e haapa‘o i te mau faaueraa, e ora mai ïa tatou i teie tau e faati‘ahia ai te mau mea atoa e te ino— te hoê taime e nehenehe e faaauhia i te mau are e te mau mata‘i e te mau pape pu‘e o te nehenehe e haamou. E haapa‘o noa â Oia ia tatou. Te here nei Oia ia tatou e e haamaitai mai Oia ia tatou a rave ai tatou i te mea ti‘a ».
Peresideni Thomas S. Monson, « Mau Mana‘o Opaniraa », Liahona, Novema 2009, 109.
O Iesu te Mesia
« Te Buka a Moromona o te iteraa papû puai roa‘e ïa te vai ra ia tatou nei tei papa‘ihia e o Iesu te Mesia. Eaha ta Nephi i parau tei riro ei niu no te fariiraa i te Varua Maitai ? Faaroo i te Fatu ra ia Iesu Mesia. E haapapû anei te tai‘oraa i te Buka a Moromona i teie nei e i muri iho i te faaroo i te Fatu ra ia Iesu Mesia ? Eita outou e nehenehe e ti‘aturi i ni‘a i te reira mai te mea e tai‘o maitai outou ia Nephi. Ua parau oia e teie ‘te horo‘a… i te mau taata o te imi Ia’na ma te itoito.‘Te auraa no te itoito o te tamau-noa-raa ïa. O te feruriraa hohonu e te pureraa ïa. E i roto i te pure o te taparuraa u‘ana ïa no te ite i te parau mau. Te mau mea atoa tei iti mai i te reira e ere ïa i te mea itoito. E te mau mea atoa tei iti mai e ere ïa i te mea nava‘i no outou e no’u nei ».
Peresideni Henry B. Eyring, Tauturu Matamua i roto i te Peresideniraa Matamua, « Going Home », in Brigham Young University 1986–87 Devotional and Fireside Speeches (1987), 77–78.
Te Hoê Parau Faararaa no te Evanelia
« E itehia te mau tufaa tumu o te poro‘i a te evanelia i roto i te mau papa‘iraa mo‘a atoa e ua horo‘a maramaramahia te reira ia tatou i roto i te Buka a Moromona e i roto i te mau heheuraa i te Peropheta Iosepha Semita. Te faaite papû nei Iesu iho i ônei i Ta’na haapiiraa e Ta’na evanelia e ti‘a i te mau tamarii a te Atua ia haapa‘o ‘ia noaa ia ratou te ora mure ore’ (PH&PF 14:7) ».
Peresideni Dieter F. Uchtdorf, Tauturu Piti i roto i te Peresideniraa Matamua, « Aita anei e Tumu no Tatou ia Oaoa ? » Liahona, Novema 2007, 19.
Bapetizoraa no te mau Tamarii rii
« Te tiaturi nei [te tahi mau taata] e ua hamanihia te mau tamarii rii i roto i te hara e ua tomo mai ratou i roto i te oraraa tahuti nei i roto i te hoê huru viivii. E mea hape taua haapiiraa ra !
Ua papa‘i Moromona e « ‘E parau mau hoi tei faaitehia mai ia’u ra, ua tupu a‘enei te mârô i rotopu ia outou i te bapetizoraa i ta outou mau tamarii rii’ (Moroni 8:5).
« Ua pii oia i ta ratou mârôraa e ‘hape rahi’ e ua papa‘i :…
« ‘A faaroo mai i te mau parau a te Mesia, o to oe Faaora, to oe Fatu e to oe Atua hoi. Inaha, aore au i haere mai i nia i te fenua nei e parau i te feia parau-tia, i te feia parau ino râ ia tatarahapa : e ere no te feia ora te taote, no te feia ma‘i râ, e te tamarii rii ua ora ïa ratou, aita hoi e tia ia ratou i te rave i te hara ; e te hara a Adamu ra, ua faaorehia ïa e au, e aita to reira e mana i nia ia ratou…
« ‘E i na reira mai te Varua Maitai i te faaite mai i te parau a te Atua ia’u; no reira, e ta’u tamaiti here, te ite nei au e, i ta outou bapetizoraa i te tamarii rii ra ua vahavahahia te Atua’ (Moroni 8:7–9)…
« A tai‘o i te taatoaraa o ta’na episetole. E haapiiraa mau te reira ».
Peresideni Boyd K. Packer, Peresideni no te Pŭpŭ no te Tino Ahuru ma Piti Aposetolo, « Te mau Tamarii rii », Ensign, Novema 1986, 17.
Te mau Faaararaa a te Buka a Moromona
« I roto i te mau haapiiraa ta tatou e haapii mai i roto i te Buka a Moromona o te tumu e te hope‘a ïa no te tama‘i e te mau huru e faati‘ahia‘i te reira. Te parau nei te reira i te mau ino e te mau pe‘ape‘a no te mau faanahoraa huna, tei faati‘ahia no te titau i te mana e te moni i ni‘a i te nunaa. Te parau nei te reira e te vai mau nei Satane e te faaite mai nei i te tahi o te mau rave‘a ta’na e faaohipa nei. Te a‘o mai nei te reira no ni‘a i te faaohiparaa ti‘a i te tao‘a. Te parau mai nei te reira ia tatou no ni‘a i te mau parau mau papû e te faufaa no te evanelia e te oraraa e te hanahana o Iesu Mesia e Ta’na tusia Taraehara no te taata atoa. Te haamaramarama mai nei te reira no ni‘a i te haaputuputuraa o te utuafare o Iseraela i te mau mahana hopea nei. Te parau mai nei te reira no ni‘a i te tumu e te mau haapiiraa no te ohipa misionare. Te faaara mai nei te reira ia tatou no ni‘a i te te‘ote‘o, te tau‘a ore, te faataimeraa, e te mau ati no te mau peu tumu hape, te faahua e te viivii.
« Teie nei, tei ia tatou ra ïa te ti‘araa no te tai‘o i te Buka a Moromona e no te haapii i ta’na mau haapiiraa e no te faaohipa i te reira i roto i to tatou iho mau oraraa ».
Elder L. Tom Perry no te Pŭpŭ no te Tino Ahuru ma Piti Aposetolo, « Mau Haamaitairaa e Noaa mai na roto i te Tai‘oraa i te Buka a Moromona », Liahona, Novema 2005, 8.
E Faaho‘ihia mai ïa te mau Mea Atoa
« Ua faaite puai hia te natura mau no te ti‘a-faahou-raa no te taata atoa i roto i te Buka a Moromona. Ua haapii te peropheta Amuleka :
« ‘E na roto i te poheraa o te Mesia e matara‘i te tapea o taua pohe tino ra, ia faatia-ana‘e-hia mai te taata i teie pohe tino nei.
« ‘E tuati-faahou-hia te tino e te varua hoi i to’na huru mau; e faaho‘ihia te mau melo e te mau tiaatiraa atoa hoi i to’na vahi mau, mai tei to tatou nei â huru…
« ‘E tae mai taua faaho‘iraa ra i te mau taata atoa, i te taata paari e te taata apî, te tîtî e te tiamâ, e te tane e te vahine, te feia ino e te feia parau-tia ; e ore roa te hoê io rouru iti a‘e o to ratou upoo ra e moe ; e faaho‘i-tino-hia te mau mea atoa i to’na iho huru mau’ (Alama 11:42–44).
« Ua haapii atoa Alama e i te ti‘a-faahou-raa ‘e faaho‘ihia râ te mau mea atoa ra i to ratou iho vahi mau’ (Alama 40:23)…
« Auê ïa tamahanahanaraa ia ite e te feia atoa tei ore i haamaitaihia i roto i te oraraa… e ti‘a faahou mai ïa ratou ‘i to ratou iho vahi mau.’ »
Elder Dallin H. Oaks no te Pŭpŭ no te Tino Ahuru ma Piti Aposetolo, « Te Ti‘a-faahou-raa », Liahona, Tiurai 2000, 17.
Te mau Ati no te mau Faanahoraa Huna
« Te haapii mai nei te Buka a Moromona e ua riro te mau faanahoraa huna e rave ra i te ohipa iino e tamataraa fifi, eiaha noa no te mau taata iho e te mau utuafare no te mau nunaa atoa râ. I roto i te mau faanahoraa huna no teie mahana o te mau pŭpŭ taata iino ïa, te mau faanahoraa no te raau taero, e te mau utuafare faanahonahohia no te ohipa iino. Te ohipa nei te mau faanahoraa huna no to tatou nei tau mai te feia eiâ no Gadianotona no te tau o te Buka a Moromona. … I roto i ta ratou mau opuaraa o te ‘taparahi taata ïa, te haharu, te eiâ, te faaturi e te mau huru ohipa ino atoa ra, o tei ore i au i te mau ture a to ratou fenua, e i te mau ture atoa hoi a to ratou Atua’ [Helamana 6:23].
« Ia ore ana‘e tatou e haapa‘o maitai, e nehenehe e noaa oioi roa e hope roa te mana e te puai i te mau faanahoraa huna no teie mahana mai ta ratou i rave i te tau o te Buka a Moromona ».
Elder M. Russell Ballard no te Pŭpŭ no te Tino Ahuru ma Piti Aposetolo « Te Ti‘araa no te Parau Mau e te Ti‘a », Ensign, Novema 1997, 38.
Tatararaa i te mau Tamataraa no te Oraraa
« Te vai nei i roto i te Buka a Moromona te mau poro‘i tei tuuhia e te Atua i reira no te faaite nahea ia faatitiaifaro i te mana o te peu tumu hape e nahea ia farii i te îraa o te oraraa. Te haapii nei te reira nahea ia tatara i te mau fifi e te mau tamataraa ta tatou e faaruru nei i teie mahana. … Ua horo‘a mai [te Fatu] i te rave‘a no te faatitiaifaro i te mau hape rahi no te oraraa, aita râ e faufaa no teie arata‘iraa mai te mea e vai ponao-noa-hia i roto i te hoê buka tei tapirihia ».
Elder Richard G. Scott no te Pŭpŭ no te Tino Ahuru ma Piti Aposetolo, « Te mau Hoa Mau o te Faateitei », Ensign, Novema 1988, 76.
E Hoê Faahaamana‘oraa i ta Tatou mau Fafauraa
« Ua faahaamana‘ohia tatou mai roto mai i te Buka a Moromona e ua riro to tatou bapetizoraa e hoê fafauraa ia ‘tia ei ite o te Atua e To’na basileia] i te mau mahana atoa, e i te mau mea atoa, e i roto i te mau vahi atoa ta outou e parahi ra, e tae noa’tu i te poheraa, ia faaorahia outou e te Atua, e ia amuihia i roto i to te tia-faahou-raa matamaua, ia noaa te ora mure ore ia outou’ (Mosia 18:9 ;amuihia te haapapûraa) ».
Elder Robert D. Hales Elder Robert D. Hales no te Pŭpŭ no te Tino Ahuru ma Piti Aposetolo, « Te Fafauraa no te Bapetizoraa: Te Tomoraa i roto i te Basileia e no te Basileia », Liahona, Tenuare 2001, 7.
Te mau Haamaitairaa no te Haapa‘oraa
« Ua fafauhia i te nunaa i roto i te mau vahi e rave rahi i roto i te Buka a Moromona, e e manuïa ratou i ni‘a i te fenua mai te mea e haapa‘o ratou i te mau faaueraa [a hi‘o 1 Nephi 2:20; 2 Nephi 4:4]. E mea pinepine teie fafauraa i te apeehia e te faaararaa e mai te mea eita ratou e haapa‘o i te mau faaueraa a te Atua, e tapu-ê-hia’tu ratou i mua i To’na aro [a hi‘o Alama 36:30] ».
Elder Quentin L. Cook no te Pŭpŭ no te Tino Ahuru ma Piti Aposetolo, « Te Ti‘aturi nei au e ua Ite Oe, ua Fifi Matou » Liahona, Novema 2008, 104.