Ua ite Au i te Hoê Auahi i Roto
Claudia Williams, Florida, Fenua Marite
Ua paari au i te haereraa i te Haapiiraa Sabati i te hoê fare pureraa i piha‘iho i te fare o to’u tamarii-rii-raa i Michigan, Fenua Marite. E orometua haapii faahiahia to’u tei faaî ia’u i te here no Iesu Mesia.
I te mau hebedoma atoa e opere oia i te mau tareta e faahoho‘a ra i te mau ohipa i tupu i roto i te oraraa tahuti o te Faaora e te mau haapiiraa Ta’na i haapii e te mau semeio Ta’na i rave. I te mau hebedoma atoa e tapiri au i te mau tareta i roto i te hoê buka e e tai‘o faahou vau i te mau aamu i roto i te Bibilia. A paari ai au, ua tamau noa vau i te tai‘o i te mau Evanelia i roto i te Faufaa Apî.
Mau matahiti i muri mai, i te tau ve‘ave‘a no te matahiti 1968, ua haere atu te mau misionare no te Ekalesia a Iesu Mesia i te Feia Mo‘a i te mau Mahana Hopea nei i te fare o te hoê melo no te utuafare. Aita oia i farii i te aniraa a te mau orometua ia haapii no ni‘a i te Ekalesia ua tono mai râ oia ia ratou i to’u nei fare.
I ta matou farereiraa matamua ua haapii mai te mau misionare ia’u e ua tupu te « hoê taivaraa » i te Ekalesia ta Iesu i haamau (a hi‘o 2 Tesalonia 2:3). Te mea ta raua i haapii mai ua tu‘ati ïa i ta’u iho tuatapaparaa, no reira a ani mai ai raua mai te mea e nehenehe anei ta raua e farerei faahou ia’u, ua farii au.
I to raua tere i muri mai, te vai ra ta’u tabula no te mau uiraa. Te bapetizo ra anei te Feia Mo‘a i te mau Mahana Hopea nei na roto i te utuhiraa ? Te ti‘aturi ra anei ratou i te mana no te autahu‘araa ? Te ti‘aturi ra anei ratou i te faaoraraa i te feia ma‘i ? Ua paturu ta raua mau pahonoraa i te mea ta’u i tai‘o i roto i te Faufaa Apî. I te hope‘a o te farereiraa, ua vaiiho mai raua i te hoê buka ia’u ma te parau mai e o te faaite papû ra no ni‘a ia Iesu Mesia.
Ua tuu vau i te buka i ni‘a i te Afata Teata e ua haere au e taoto. I te maororaa râ o te pô, ua faaarahia vau na te hoê mana‘o puai ta’u i ite i muri iho e o te Varua Maitai ïa. Ua faaûruhia vau ia haamata i te tai‘o, no reira ua tai‘o vau e hoê hora e te afa hou a ho‘i atu ai e taoto. Tau taime poto noa i muri mai, ua ara faahou vau e taua iho mana‘o ra, no reira ua tai‘o faahou vau.
Ua tamau noa teie huru faanahoraa i na pô e piti i muri mai. Ua here au i te mea ta’u i tai‘o e ua ite au e ua faaite papû te Buka a Moromona no ni‘a ia Iesu Mesia.
Ua faaoti a‘era vau i te ani i te Atua no te arata‘iraa. E no te taime matamua mai to’u na‘ina‘iraa ei tamahine iti, ua tuturi vau no te pure. Ua ani au i te Metua i te Ao ra ia tauturu mai ia’u ia ite eaha te rave no te auahi ta’u i ite i roto ia’u. I to’u faaotiraa i ta’u pure, ua tura‘ihia vau ia tai‘o faahou i te aamu no te faafariu-raa-hia te mau Ati Lamana i roto i te 3 Nephi 9. Ua tai‘o vau e « ua bapetizohia ratou i te auahi e te Varua Maitai, aita râ ratou i ite i te reira » (irava 20).
Ua paraparau ti‘a mai te parau ra « aita râ ratou i ite i te reira » ia’u nei. Ua tae mai te mana‘o ia’u : « Tei ni‘a mau te Ekalesia a Iesu Mesia i te fenua ! » Ua anaanatae vau i te faaite i te mau misionare i te mea ta’u i tai‘o e te mea ta’u i ite i teie nei. I to raua râ pahonoraa i ta’u mau uiraa ma te hoê aniraa ia bapetizohia, ua parau vau ia raua e eita e nehenehe ia’u. Eita ta’u tane faaipoipo e maramarama i te reira.
A tamau noa‘i au i te feruri i ni‘a i taua irava ra, ua ite vau e tei roto i te reira te arata‘iraa maramarama no’u ia pûpû i te tusia no te hoê « aau paruparu e te varua oto ». Ua pure au e ua ani i to’u Metua i te Ao ra ia tauturu mai ia’u, Ta’na ïa i rave. I muri a‘e i to ta’u tane faaipoipo raveraa i te mau haapiiraa misionare, ua faati‘a oia ia’u ia bapetizohia.
Auê ïa vau i te mauruuru i te hoê Metua here i te Ao ra no taua ohipa faufaa rahi e te puai ra, tei tupu a riro ai au ei metua vahine apî, i te tai‘oraa i te Buka a Moromona. Ua arata‘i te reira ia’u i te evanelia a Iesu Mesia tei faaho‘ihia mai. Ei hope‘araa, te mana o te Varua Maitai ta’u i ite i taua mau pô ra i te matahiti 1968 e horo‘araa tamau ïa i teie nei, te tahi mea tei arata‘i ia’u hau atu e 40 matahiti ei melo no te Ekalesia.