Pōpoaki ʻa e Kau Palesitenisī ʻUluakí
Ko e Ngaahi Tāpuaki ʻo e Vahehongofulú
Ko e taumuʻa hono foaki mai ʻe he ʻOtuá e ngaahi fekaú ke faitāpuekina ai kitautolu. Ko Hono finangaló ke tau maʻu ʻa e moʻui taʻengatá, ʻa e meʻaʻofa mahuʻinga taha ʻi Heʻene ngaahi meʻaʻofá kotoa pē (vakai, T&F 14:7). Kuo pau ke tau moʻui ʻaki e ngaahi fono ʻo e puleʻanga fakasilesitialé ka tau maʻu ʻa e meʻaʻofa ko e nofo fakafāmili mo Ia ʻi ai ʻo taʻengata (vakai, T&F 88:22).
Kuó Ne foaki mai ha ngaahi fekau ʻi he moʻui ko ʻení ke tokoni ke tau malava ʻo fai ia. Ko e taha e fono ʻo e vahehongofulú ko ha taha ia ʻo e ngaahi fekau ke teuteuʻi ʻaki kitautolú. Ko e fonó ke tau foaki ki he ʻEikí ʻa e vahe hongofulu ʻe taha ʻo ʻetau paʻanga hū mai kotoa pē. ʻOku fuʻu faingofua pea naʻa mo ha kiʻi tamasiʻi ʻe lava pē ke mahino ia. Kuó u ʻosi mamata ki hono ʻoange ʻe he fānaú ki he pīsopé ha sila vahehongofulu ʻoku faʻo ai e vahe hongofulu ʻe taha ʻo e sēniti naʻa nau maʻú.
Ko e taha ʻo e ngaahi tāpuaki ʻoku maʻu mei he totongi vahehongofulu kakató ko hono fakatupulaki ʻo e tui ke moʻui ʻaki ha fono ʻoku toe māʻolunga angé. Kuo pau ke tau moʻui ʻaki ʻa e fono ʻo e fakatapuí ka tau nofo ʻi he puleʻanga fakasilesitialé. Kuo pau ke tau lava ʻo ongoʻi ai ʻoku ʻa e ʻOtuá ʻa ʻetau moʻuí mo e meʻa kotoa ʻoku tau maʻú.
ʻOku ʻikai toe siʻi hifo he founga ʻe tolú ʻoku teuteuʻi ai kitautolu ʻe he totongi vahehongofulu kakató ʻi he moʻuí ni ke tau ongoʻi ai ʻa ia ʻoku fie maʻu ke tau ongoʻí ka tau maʻu ʻa e meʻaʻofa ʻo e moʻui taʻengatá.
ʻUluakí, ʻi he taimi ʻoku tau totongi ai ʻetau vahehongofulú ki he Siasí, ʻoku lilingi hifo ʻe heʻetau Tamai Hēvaní ha ngaahi tāpuaki kiate kitautolu. ʻOku ʻiloʻi ʻe ha taha ʻokú ne totongi vahehongofulu maʻu pē ʻoku moʻoni ia. Taimi ʻe niʻihi ko e ngaahi tāpuaki fakalaumālie pea taimi ʻe niʻihi ʻoku fakatuʻasino. ʻOku foaki mai ia ʻi he taimi pē ʻa e ʻEikí pea fakatatau ki he meʻa ʻokú Ne ʻafioʻi ʻoku lelei taha maʻatautolú.
ʻI heʻetau maʻu e ngaahi tāpuaki ko iá, ʻoku tupulaki ai ʻetau tui ʻoku meí he ʻOtuá ʻa e meʻa lelei kotoa pē ʻi heʻetau moʻuí. ʻOku faingofua ange ke ʻiloʻi ʻoku fakahaaʻi mai ʻe he fakatapuí ʻa e foʻi moʻoni ko ia ʻoku ʻa e ʻOtuá ʻa e meʻa kotoa pē naʻá Ne fakatupú. ʻOkú ne ngaohi kitautolu ke tau ongoʻi loto houngaʻia ko e peseti pē ʻe 10 ʻokú Ne kole mei he ngaahi meʻa kuó Ne ʻosi foaki mai maʻatautolú. Ko ia ʻoku tau mateuteu lelei ange ke moʻui ʻaki e fono ʻo e fakatapuí ʻi he taimi ʻoku kole mai ai ke tau fai iá.
Uá, ʻoku ongoʻi ʻe kitautolu hono kotoa kuo tau totongi vahehongofulu kakato maʻu peé ha lotofalala ange ʻi heʻetau kole ki he ʻOtuá ʻa ʻetau fie maʻu mo hotau ngaahi fāmilí. Kuó Ne talaʻofa mai ha ngaahi tāpuaki lahi ange ʻi he meʻa ʻe lava ke tau maʻú ʻi heʻetau tauhi faivelenga ʻetau fuakava ke totongi ʻetau vahehongofulú (vakai, Malakai 3:10). Ko e taha leva ʻo e ngaahi tāpuaki maʻongoʻonga ʻo e vahehongofulú ko e falala fakatuʻamelie ko ia ki he kahaʻú. Ko e hā pē ha tūkunga ʻoku mou ʻi aí, ʻe lelei e meʻa kotoa pē. Te Ne fai ʻEne ngaahi talaʻofa ʻi he taimi ʻoku tau tauhi ai ʻetau ngaahi palōmesí. Ko e taha ʻo e ngaahi tāpuaki maʻongoʻonga ʻo e totongi vahehongofulu kakató ko e ongoʻi melinó. ʻE lava ke fakamoʻoni ʻa kinautolu kuo nau tauhi e fekau ʻo e vahehongofulú ki hono moʻoni mo mahuʻinga ʻo e tāpuaki ko e melinó.
Tolú, ʻoku ongoʻi ʻe kinautolu ʻoku totongi vahehongofulú ʻoku lahi ange ʻenau ʻofa ki he ʻOtuá mo e fānau kotoa ʻa e ʻOtuá. ʻOku haʻu e tupulaki ʻo e ʻofa ko iá mei he mahino kiate kitautolu e founga fakaʻaongaʻi ʻe he Tamaí ʻa e vahehongofulu ʻoku tau foakí ke faitāpuekina ʻaki e kakaí ʻi he māmaní pea mo e taʻengatá.
ʻOkú Ne tokanga lahi ʻi hono fakaʻaongaʻi ʻo e ngaahi vahehongofulú ʻo fakafou ʻi Heʻene kau tamaioʻeiki kuo fakamafaiʻí. ʻOku tokoni e tokotaha totongi vahehongofulú ki he ʻEikí ʻi hono langa ʻo e ngaahi temipalé ke lava ʻo silaʻi ai e ngaahi fāmilí ki he taʻengatá. ʻOku tokoni e tokotaha totongi vahehongofulú kiate Ia ke ʻoatu ʻaki e ongoongoleleí ki he kakai ʻi he feituʻu kotoa pē. ʻOku tokoni ʻa e tokotaha totongi vahehongofulú kiate Ia ʻi hono fakafiemālieʻi ʻo e fiekaiá mo e faingataʻaʻiá ʻi Heʻene founga pē ʻAʻana ʻo fakafou ʻi Heʻene kau tamaioʻeikí. ʻE lava ke tala atu ʻe ha taha pē ʻo e kau tamaioʻeiki ko iá ʻa e tupulaki ʻo e ʻofá koeʻuhi he naʻe fakaʻaongaʻi ʻa e vahehongofulú ke faitāpuekina ʻaki e kakaí. Pea ʻe lava pē ke fai pehē mo e tokotaha totongi vahehongofulu faivelengá.
ʻOku toe ha ngaahi māhina ʻi he kahaʻú pea toki fai ʻa e fakamāʻopoʻopo vahehongofulú. ʻOku ou lotua te ke kamata he taimí ni mo ho fāmilí ke palani mo teuteu ke fakafeʻungaʻi kimoutolu ki he ngaahi tāpuaki ko ia ʻoku lilingi hifo ʻe he ʻOtuá ki he kakai kotoa pē ʻe lava ke nau fakahā kiate Ia ʻoku nau totongi vahehongofulu kakató.
Ngaahi faitā ʻa Robert Casey
Ngaahi tā fakatātā ʻa Steve Kropp