Ngaahi Ongoongo Nounou mei Māmaní
Foaki ki he Palēmia ʻo e ʻOtu Motu Solomoné ʻa e Fanongonongo ki Māmaní
Naʻe foaki ʻe he Siasí ha tatau ʻo e “Ko e Fāmilí: Ko ha Fanongonongo ki Māmani” (Liahona mo e Ensign, Nōvema 2010, 128) ki he palēmia ʻo e ʻOtu Motu Solomoné, ko Teni Filipe, ʻi he ʻaho Falaite, 21 ʻo Sānuali 2011.
Naʻe fakataha ʻa ʻEletā Teki Simaipeeti ko ha Fitungofulu Fakaʻēlia, mo e kau fakafofonga kehe ʻo e Siasí ʻi he ʻapi ʻo e palēmiá ʻo foaki kiate ia ʻa e fanongonongó pea mo e ʻīmisi fakatātā foki ʻo ha fāmili.
Fanongonongo e Ngaahi ʻAho ki he Temipale ʻEle Salavatoá
Kuo fakaafeʻi ʻe he Kau Palesitenisī ʻo e Siasí ʻa e kāingalotú mo e kakaí fakalūkufua ke nau ʻaʻahi ki he Temipale Seni Salavatoa ʻEle Salavatoá lolotonga ʻa e ʻoupeni hausi ʻe fakahoko mei he ʻaho Falaite, 1 ʻo Siulai 2011, ʻo aʻu ki he Tokonaki, 23 ʻo Siulai 2011, tuku kehe ʻa e ʻaho Sāpaté.
ʻE fakahoko ha fakafiefia fakafonua ʻi he ʻaho Tokonaki, 20 ʻAokosi 2011, pea hoko atu ai hono fakatapui ʻo e temipalé ʻi he ʻaho hono hokó.
Fakangofua ʻe he Saití ʻa e Kāingalotú ke Vahevahe Ngaahi Talēnití ki hono Langa Hake ʻo e Siasí
Ko e tokoni ʻi he uepisaiti foʻou ʻa e Siasí ko e Vineyard kuo fokotuʻu ke tauhi ai e ngaahi ngāue ʻoku fakautuutu hono lahí ʻa ia ʻoku lava ke tokoni taʻetotongi ai e kāingalotu ʻo e Siasí. ʻOku kau he ngaahi ngāué ʻa e liliu leá, fakahokohoko fakamotuʻalea ʻi he FamilySearch, faitaá, fakahingoa ʻo e ʻū vitioó mo e ngaahi ʻatá, mo e ngāue fakaʻētitá pea ʻoku ala maʻu kinautolu mei ha faʻahinga feituʻu pē ʻoku lava ai ʻo hū ki he ʻInitanetí.
ʻOku ʻamanaki ʻa kinautolu ʻoku nau faʻufaʻu ʻa e Vineyard ke lesisita mo kau mai ha kau ngāue taʻetotongi ʻe toko 10,000 ʻi he ʻInitanetí lolotonga e taʻu 2011. ʻE lava ke lesisita e kāingalotú ke kau ki ai ʻi he vineyard.lds.org, pea ko e lea faka-Pilitāniá pē ʻoku lolotonga maʻu aí.
Fakaava ʻi he Musiumé ʻa e Fakaʻaliʻali Foʻou maʻá e Fānaú
Kuo tatala ʻe he Musiume Hisitōlia ʻo e Siasí ʻi Sōleki Sití ha ʻufiʻufi ʻo ha ongo fakaʻaliʻali foʻou ʻe ua ʻoku kau ki he ngaahi ʻātakai ʻokú ne fakatupu e akó mo e ngāue fakaʻaati ʻa e fānaú.
ʻOku fakaʻaliʻali ʻe he The Gospel Blesses My Life (ʻOku Faitāpuekina ʻe he ʻOngoongoleleí ʻEku Moʻuí) ha ngaahi ngāue fakaʻaati ʻa ha fānau mei ha fonua ʻe 42 ʻi māmani ʻoku nau fakatātaaʻi hono faitāpuekina ʻetau moʻuí ʻi heʻetau ʻiloʻi ʻa e ongoongolelei ʻo Sīsū Kalaisí
ʻOku kau ʻi he A Book of Mormon Fiesta: A Latin American Celebration (Kātoangaʻi e Tohi ʻa Molomoná: Ko Hano Fakamanatu Faka-ʻAmelika Latina) ha ngaahi konga ʻoku fakamanatu ai ʻa e tukufakaholo faka-Latiná ʻi he lotoʻi Siasí mo ʻomai ha ngaahi talanoa kau ki he kāingalotu ʻAmelika Latiná.
Ki ha fakamatala lahi ange kau ki he ngaahi fakaʻaliʻalí, hū ki he churchhistorymuseum.org.