Toʻu Tupú
Naʻe Feʻunga Pē Paʻangá
Ne u fetaulaki mo e ongo faifekaú ʻi hoku taʻu 17. Ne ma nofo fakataha mo hoku taʻoketé he taimi ko iá. Ne mālōlō ʻema faʻeé he taʻu kimuʻa aí, pea naʻe faingataʻa e moʻuí. Ne lava ke u sio ʻi he taimi naʻe akoʻi ai au ʻe he ongo faifekaú ko e Siasí ʻa e meʻa ne u fekumi maʻu pē ki aí. Ka naʻe taki au ʻe hoku ngaahi kaungāmeʻá ʻo ʻikai ai ke u ʻalu ki he lotú he Sāpaté.
Ne u ʻalu ki ha ʻekitivitī ʻa e Siasí lolotonga ha uike ʻe taha. Ne u maʻu ha fiefia lahi ʻi heʻeku mamata ki he kakata mo e vaʻinga ʻa e toʻu tupú. Ne toʻo ʻe he ongo faifekaú, mo e toʻu tupú, ʻa e faingamālie ko iá ke akoʻi kiate au ha lēsoni ʻi he ongoongoleleí, pea ne u ongoʻi fiefia ʻaupito ai ʻo u fakapapauʻi te u papitaiso.
Ka ne u kei fehangahangai pē mo ha ngaahi faingataʻa hili ʻeku kau ki he Siasí. Ko au pē ʻi he feituʻu ko ia ʻo e koló naʻe kau ki he Siasí pea ne u nofo mamaʻo mei he falelotú. Ne ʻikai toe fie maʻu ʻe hoku ngaahi kaungāmeʻa taʻe Siasí ke mau feohi. ʻI he taimi ne u ongoʻi tuēnoa aí, naʻá ku lotu pea ne u ongoʻi e ʻofa ʻa e ʻEikí.
Ne u maʻu ha kiʻi paʻanga ʻi he māhina kotoa pē mei ha paʻanga naʻe tuku mai ʻe heʻeku faʻeé. Naʻe faingataʻa ke u moʻui ʻaki ha kiʻi paʻanga siʻisiʻi pehē. Ka naʻá ku fakapapauʻi pē ke u talangofua. Naʻá ku totongi vahehongofulu mo totongi ʻeku ʻalu ki he seminelí mo e ngaahi fakatahaʻanga ʻo e ʻaho Sāpaté. Naʻe ʻikai ke u ʻilo pe naʻe anga fēfē ʻene hokó, ka ʻi he fakaʻosinga ʻo e māhina takitaha, ne kei ʻi ai pē paʻanga feʻunga ke fai ʻaki e meʻa kotoa.
ʻOku ou ʻiloʻi kuo tāpuakiʻi au ʻe heʻeku totongi vahehongofulú. Ne tokoniʻi au ʻe heʻeku talangofua ki he fekaú ni ke toe mālohi ange ʻeku fakamoʻoní, ʻalu ʻo ngāue fakafaifekau, peá u ʻiloʻi ʻa e ngaahi tāpuakí koeʻuhí ke u lava ʻo fakamālohia ʻa e kāingalotu foʻou ʻoku fehangahangai mo e ngaahi faingataʻá.