Ngaahi Tukufakaholo Faka-Kilisimasi ʻo e Fitungofulú

ʻOku vahevahe ʻe he kau mēmipa ʻo e Kau Fitungofulú ʻa e founga ʻoku nau fakafiefiaʻi ʻaki e faʻahitaʻú mo manatua e ʻaloʻi ʻo e Fakamoʻuí.

ʻE lava fēfē ke tau fakafiefiaʻi e Kilisimasí ke mahuʻingamālie ki he mēmipa takitaha ʻo e fāmilí? Ko e hā e founga ʻe lava ke tau fakatefito ai e Kilisimasí ʻi he Fakamoʻuí? Ko e hā ha ngaahi tukufakaholo ʻe lava ʻo tokoni ke tau manatuʻi ai Ia mo Hono ʻaloʻí?

ʻOku vahevahe ʻe he kau mēmipa ʻo e Kau Fitungofulú mei he ngaahi fonua mo e ʻulungāanga fakafonua kehekehe ʻa e ngaahi founga kuo nau tali ai e ngaahi fehuʻí ni maʻanautolu pē mo honau ngaahi ʻofaʻangá. ʻOku nau vahevahe heni ha niʻihi ʻo ʻenau ngaahi manatu, fakamoʻoni, mo e ngaahi tukufakaholo mahuʻingamālie ʻo e Kilisimasí. (ʻOku haʻi atu ʻa honau ngaahi fonua tupuʻangá.)

Elder Marcos A. Aidukaitis

ʻEletā Marcos A. Aidukaitis (Palāsila): Ko ha faingamālie makehe ʻaupito e Kilisimasí kiate au mo hoku fāmilí ke mau talanoa ai kau ki ha ngaahi meʻa toputapu ʻe niʻihi ʻoku ʻikai ke mau talanoa ki ai ʻi he founga fakamātoato mo maau ʻo hangē ko e ngaahi taimi kehe ʻo e taʻú. Ko ha faingamālie ia ke fakahā ai ʻa e ʻofa ki he niʻihi kehé mo e fakafetaʻi ʻi he ngaahi meʻa kuo hoko ʻi heʻemau moʻuí.

Elder David S. Baxter

ʻEletā David S. Baxter (Sikotilani): ʻI he kei iiki ʻema fānaú, naʻa mau ō ʻo hiva Kilisimasi ʻi he Efiafi Kimuʻa he Kilisimasí, mo ʻave ha ngaahi meʻaʻofa ki he ngaahi fāmili māmālohi ʻi homau uōtí (ko ha ngaahi kupuʻi ʻakau fefie ko e Yule). ʻOku mau tutu teʻelango he Efiafi Kimuʻa he Kilisimasí, lau ʻa e talanoa ʻo e Kilisimasí, maʻu ha meʻatokoni fakafāmili makehe, pea mau fiefia fakataha leva ʻi he Kilisimasí.

Elder Gérald Caussé

ʻEletā Gérald Caussé (Falanisē): Kuo mau fakakaukau ko e Kilisimasí ʻi homau fāmilí, ʻoku ʻikai ko e fiefia fakataha pē, ka ko e tokanga taha foki kia Kalaisi mo e tokoni ki he niʻihi kehé. ʻI he taʻu ʻe 10 kuo hilí, ne mau fokotuʻu ai ha kuaea ʻa e kau mēmipa homau fāmilí. Naʻa mau ō ʻo hiva Kilisimasi ʻi he ngaahi falemahakí mo e ngaahi ʻapi ʻo e kau toulekeleká. Naʻe tokosiʻi pē ʻi he kamataʻangá. Naʻa mau fua pēpē mo fakaheka saliote e niʻihi. Ka kuo lalahi e fanga kiʻi pēpē ko ʻení he taimí ni, pea ʻoku nau taukei he hivá. ʻOku toko 44 ʻemau kuaeá pea naʻe ʻikai ke ngata pē heʻemau hivaʻi e ngaahi hiva Kilisimasi faka-Falaniseé, ka naʻe tānaki atu ki ai mo e ngaahi himi ʻa e Siasí, pea naʻe ola lelei ʻaupito. Hili ʻemau hivá, naʻe ʻalu e fānaú ʻo tufotufa atu ki he niʻihi naʻe puke pe toulekeleká ha ngaahi meʻaʻofa naʻa mau teuteuʻi fakafāmili pē. Naʻa mau feinga ke maʻu ha taimi mo e tokotaha takitaha ke mau talanoa ai ki he ʻuhinga totonu ʻo e Kilisimasí pea ke fanongo foki ki he tokotaha ko iá. ʻOku lahi maʻu pē ʻa e ngaahi meʻa ke vahevahe ʻe he tokotaha kotoa pē.

Naʻe hoko ʻemau ngaahi ʻaʻahí ko ha ngaahi polokalama makehe ke mau manatuʻi ai e meʻa ʻoku mau ʻilo fekauʻaki mo e hoko ko ha Kalisitiané pea mo ʻemau ʻai kiate kimautolu ʻa e huafa ʻo Kalaisí. ʻOku fakamanatu lelei mai ʻe he Kilisimasí ʻa e tōʻonga ʻoku fie maʻu ke mau ʻulungāanga ʻaki ʻi he taʻú kakato.

Elder Eduardo Gavarret

ʻEletā Eduardo Gavarret (ʻUlukuai): Ko ha taimi makehe ʻa e Kilisimasí ʻi heʻemau moʻuí. ʻOku fakafonu ʻaki maʻu pē kimautolu ha ongo māfana lolotonga e taimi ko iá. ʻI he aʻu pē ki he māhina ko Tīsemá, ʻoku mau ʻilo ko e Kilisimasí ko ha taimi ia ʻo e melino mo e fakataha ʻa e fāmilí. ʻOku ʻi ai ʻemau tukufakaholo ko e faitohi ki homau ngaahi kaumeʻá, ka ʻoku mau fiefia makehe ʻi hono fai ʻo ha ngaahi tohi ki he Fakamoʻuí pea tuku ʻi he fuʻu ʻakau Kilisimasí ko ha meʻaʻofa ʻoku mau fie foaki Maʻana.

Elder Carlos A. Godoy

ʻEletā Carlos A. Godoy (Palāsila): ʻOku mau hiki fakafāmili ʻemau ngaahi fakamoʻoní ʻi he ngaahi Tohi ʻa Molomona pea ʻave kinautolu ko e meʻaʻofa Kilisimasi ki homau ngaahi kaumeʻá mo e kāingá. ʻOku tali lelei maʻu pē ʻa e ngaahi meʻaʻofá he ko e taimi Kilisimasi. Pea ko ha founga lelei foki ia ke vahevahe ai ʻa e ongoongoleleí mo ha niʻihi kehe pea ke manatuʻi ko Kalaisi ʻa e konga mahuʻinga taha ʻo e ʻahó.

Elder Christoffel Golden Jr.

ʻEletā Christoffel Golden Jr. (ʻAfilika Tonga): ʻOku mau fiefia ke nofo hifo ʻo maʻu ha meʻatokoni lelei he Efiafi ki muʻa he Kilisimasí, hili pē iá ʻoku mau lau e fakamatala ʻa Luke ki hono ʻaloʻi ʻo e Fakamoʻuí. ʻOku mau tui homau vala Sāpaté he pongipongi Kilisimasí pea fakahoko ʻemau kiʻi fakataha faka-Kilisimasi nounou. ʻOku kau mai foki ki he fakataha ko ʻení ha niʻihi ʻoku teʻeki Siasi mo ha kāingalotu māmālohi. ʻOku mau toki talanoa kimui mo homau ngaahi kaumeʻá pea mo e kau mēmipa kehe ʻo e fāmilí ʻi ha ngaahi fakatahaʻanga fakafāmili pea ʻoku fakamālohia ai homau ngaahi haʻi fakafāmilí ʻi he laumālie totonu ʻo e Kilisimasí.

Elder Donald L. Hallstrom

ʻEletā Donald L. Hallstrom (USA): ʻI he ngaahi taʻu kuo hilí naʻa mau faʻa fakataha ʻi he Efiafi ki muʻa he Kilisimasí ʻo fai ʻemau fakamoʻoní pea naʻe fakafiefia mo fakangalongataʻa. Naʻe ʻoange ʻa e faingamālie ki he mēmipa takitaha ʻo e fāmilí ke ne fakahā e ngaahi ongo naʻá ne maʻu fekauʻaki mo e Fakamoʻuí pea mo ʻetau Tamai ʻi Hēvaní. Naʻe hanga leva ʻe he ngaahi ongoʻi ʻofa loloto ko iá ʻo ngaohi kimautolu ke mau feongoʻiʻaki pea naʻe ongo ʻaupito ki homau lotó ʻa e hā sino ʻa e feʻofaʻakí ʻi he kau mēmipa ʻo e fāmilí. Naʻe fakahā leva ʻe heʻeku tamaí ʻa ʻene vīsone ki he fāmilí pea naʻá ne poupouʻi ʻa e mēmipa takitaha ʻo e fāmilí ke nau tuʻu maʻu ʻi he tuí. Ne mau toki tūʻulutui fakataha leva ʻi he uouangataha ʻo fai ʻemau lotu tuku fakafāmilí.

Elder Paul V. Johnson

ʻEletā Paul V. Johnson (USA): Ko e taha ʻo ʻemau ngaahi tukufakaholó ko ʻemau ʻalu he taʻu kotoa ko ha fāmili ʻo fanongo ki hono hivaʻi ʻo e Mīsaia ʻa Hanitelí. ʻOku mau saiʻia ai. ʻOku mau taki taha pē tatau ʻo e tuʻungafasí mo e fakaleá, pea ʻoku mau maʻu ai ha faingamālie ke hivaʻi ʻa e ngaahi fakalea fakaʻofoʻofa naʻe fakafasi ʻe Hanitelí, pea manatu ai ki he ngāue fakafaifekau ʻa e Fakamoʻuí.

Elder Yoshihiko Kikuchi

ʻEletā Yoshihiko Kikuchi (Siapani): ʻOkú ma feinga mo hoku uaifí ke lau e ngaahi lea ʻa e kau palōfitá mei he folofolá ʻo kau ki hono ʻaloʻi ʻo e Fakamoʻuí ʻo kamata mei he ʻaho nai ʻe 30 ki muʻa ʻi he Kilisimasí. Kapau te ke lau ia ʻi he ʻaho takitaha ʻo aʻu ki he ʻaho 25 ʻo Tīsemá, te ke ongoʻi ʻa e kamata ke haʻu haʻu māmālie e laumālie ʻo e Kilisimasí, ʻa e talanoa ki he talanoa, ʻa e potufolofola ki he potufolofola. Ko e meʻa ia ʻokú ma feinga ke fakahoko ʻi homau fāmilí.

ʻOku ou manatuʻi maʻu pē ʻa e tali ʻa Nīfai ki he fehuʻi ʻa e ʻāngeló ʻo kau ki he ʻuhinga ʻo e ʻakau ʻi he misi ʻa ʻene tamaí. Naʻe pehē ʻe Nīfai, “ʻIo, ko e ʻofa ia ʻa e ʻOtuá, ʻa ia ʻoku aʻu atu ki he loto ʻo e fānau ʻa e tangatá” (1 Nīfai 11:22). Kiate au, ʻoku ʻuhinga ʻa e Kilisimasí ki he ʻofa ʻa e Tamai Hēvaní mo Sīsū Kalaisí.

Erich W. Kopischke

ʻEletā Erich W. Kopischke (Siamane): ʻOku ʻilonga e ngaahi liliu ʻi he falé kotoa lolotonga e faʻahitaʻu ko ʻení. ʻOku teuteuʻi ha ngaahi fuʻu paini, ʻoku teuteuʻi ʻaki e teʻelango ʻa e ngaahi matapā sioʻatá, pea tautau mo e ngaahi maama. ʻOku teuteuʻi ʻaki ʻe he fānaú honau ngaahi lokí ha ngaahi meʻateuteu faka-Kilisimasi, ʻoku taʻo e pisikete mo e mā sinisā, pea ʻoku nanamu lelei e falé kotoa—ko e nanamu ʻo e painí mo e sinamoní.

ʻOku mau manako ke fakaafeʻi mai ki homau ʻapí ʻa e fāmilí mo e kaungāmeʻá ʻi he Efiafi ki muʻa he Kilisimasí. ʻOku mau tutu e ngaahi teʻelango pea tafu mo e afi ʻi he tafuʻanga afí. ʻOku mau teuteuʻi e ngaahi tohi hiva makehe ʻoku ʻi ai e ngaahi hiva faka-Kilisimasi ʻoku mau saiʻia hono hivaʻí. ʻOku ou toʻo mai ʻeku ʻakōtioní pea fili ʻe he tokotaha kotoa pē ha foʻi hiva Kilisimasi pea mau hivaʻi fakataha ia. ʻOku ʻi ai ʻa e laumālie makehe ʻoku fakafiefia ki he tokotaha kotoa pē.

ʻOku mau fakaava leva ʻemau ngaahi meʻaʻofá. ʻOku kamata pē mei he fānaú. ʻOku sio pē mo kau he fiefiá ʻa e tokotaha kotoa ʻi hono toʻo e kofufoku ʻo e meʻaʻofa takitaha. ʻI he ʻosi kotoa hono fakaava ʻo e ngaahi meʻaʻofá, ʻoku puli fakavave atu leva ʻa e fānaú mo ʻenau fanga kiʻi koloá. ʻOku nofo pē ʻa e kakai lalahí ʻo talanoa. ʻOku hangē pē ia ko ha efiafi fakafāmili makehe ʻi ʻapí.

ʻOku mau fakaafeʻi mai he taimi ʻe niʻihi ʻi he Efiafi ki muʻa he Kilisimasí ha kakai ʻe ngalingali ʻoku nau taʻelatá. Ko e ngaahi Kilisimasi lelei moʻoni ia.

Elder Michael John U. Teh

ʻEletā Michael John U. Teh (Filipaini): Kiate au, ʻoku ʻuhinga ʻa e Kilisimasí kia Kalaisi mo hoku fāmilí. Ko ha faingamālie ia ke u tukupā ai ke toe lelei ange ʻeku fetuʻutaki mo ʻetau Tamai Hēvaní pea mo e Fakamoʻuí pea mo ʻeku hoko ko ha husepāniti mo e tamaí. ʻOku ou fakamālō ʻi he faingamālie ke u ʻalu ai ki he houalotu sākalamēnití he taʻu kakato he ko ha taimi ia ke u fakafoʻou ai ʻa e ngaahi fuakava ko iá mo manatuʻi ʻa e Kilisimasí. ʻE lava pē ia ke hangē ʻoku Kilisimasi ʻa e uike kotoa pē, ko ha taimi ke u toe fakatukupaaʻi ai au ke u manatuʻi ʻa e Fakamoʻuí.

Elder José A. Teixeira

ʻEletā José A. Teixeira (Potukali): Ko e founga lelei taha ke kei pukepuke mo tauhi ai ʻe homau fāmilí ʻa e laumālie ʻo e Kilisimasí, ʻo ʻikai ʻi he lolotonga pē ʻo e faʻahitaʻu ko iá ka ʻi he taʻú kotoa, ko hono lau ʻo e folofolá. ʻI heʻemau lau fakafāmili ʻa e folofolá, ʻoku mau fakamanatuʻi ai kiate kimautolu ʻa e Fakamoʻuí mo e laumālie totonu ʻo e Kilisimasí.

Kiate au mo hoku fāmilí, ko Sīsū Kalaisi ʻa e ʻuhinga moʻoni ʻo e Kilisimasí. Ko ha taimi ia ʻo e foaki atu, taimi ʻo e maʻu mai, ko ha taimi ʻo e fetuʻutaki mo hotau ngaahi fāmilí, pea ko ha taimi ke ʻoatu ai ha ʻofa ʻoku lahi angé kiate kinautolu ʻoku tau feohí.

Elder Francisco J. Viñas

ʻEletā Francisco J. Viñas (Sipeini): ʻOku ou fie vahevahe mo kimoutolu ha meʻa ne ma aʻusia lolotonga ʻeku hoko ko e palesiteni fakamisiona ʻi he 1989. Lolotonga ʻema ngāue ʻi he Misiona ʻĀsenitina Salataá, ne ma maʻu ha fakahinohino mei he Potungāue ki he Ngāue Fakafaifekaú ʻi ha ngaahi ʻaho siʻi pē kimuʻa ʻi he Kilisimasí, ʻoku fie maʻu ke nofo e kau faifekaú ʻi honau ngaahi fale nofoʻangá kae ʻoua kuo toe fai mai ha fanongonongo koeʻuhí ko e ʻohofi ʻo Panamā ʻe he ʻIunaiteti Siteití.

ʻI he pongipongi ʻo e ʻaho 24 ʻo Tīsemá, ne mau fakahekeheka e ongo kā ʻa e misioná pea vahevahe e misioná ki ha konga ʻe ua: naʻe ʻalu e ongo ʻasisitení ki he konga fakatokelau ʻo e misioná, peá u ʻalu au mo hoku foha taʻu valú ki he tafaʻaki faka-tonga ʻo e misioná. Ko e taumuʻá ke ʻaʻahi ki he ongo hoa takitaha ʻi hona nofoʻangá, ʻave ʻena meʻakai, pea vahevahe mo kinaua ha pōpoaki faka-Kilisimasi. Ko ha meʻa fakalata ʻeni ne ma fakahoko mo hoku fohá. Ko ha meʻa fakaʻofoʻofa ne ma fakatou aʻusia ʻi he fale nofoʻanga takitaha ʻo vahevahe mo e kau faifekaú—ko ha meʻa ʻokú ma tukulotoa maʻu pē ʻo lau ko ha manatu melie ki he Kilisimasí.

Naʻe nofo pē hoku uaifí mo ʻema ongo tamaiki fefiné ʻi he ʻapi fakamisioná, pea naʻá ma foki mo hoku fohá ʻi he hengihengi ʻo e ʻaho 25 ʻo Tīsemá. Ko e fuofua taimi ia naʻe ʻikai ke mau fakataha ai ko ha fāmili ʻi he Efiafi ki muʻa he Kilisimasí, ka ko e Kilisimasi fakangalongataʻa taha ia kiate kimautolú.

Elder Jorge F. Zeballos

ʻEletā Jorge F. Zeballos (Silei): ʻI he taimi ʻoku ʻi ai ai haʻo fakamoʻoni kia Sīsū Kalaisí—ʻokú Ne moʻui, Ko Ia ʻa hotau Fakamoʻuí, ʻa hotau Huhuʻí—ko e founga lelei taha ke fakahā ʻaki hoʻo ʻofa kiate Iá ko hoʻo talangofua ki Heʻene ngaahi fekaú. Ko ia kiate au, ko e founga lelei taha ke manatuʻi ai Iá, ʻo ʻikai ʻi he lolotonga pē ʻo e faʻahitaʻu Kilisimasí ka ʻi he ʻaho kotoa pē, ko e talangofua ki he meʻa kotoa pē kuó Ne kole ke tau fai.

Elder Claudio D. Zivic

ʻEletā Claudio D. Zivic (ʻĀsenitina): Kiate au mo homau fāmilí, ʻoku ʻuhinga ʻa e Kilisimasí ki hono fakafiefiaʻi ʻa hono ʻaloʻi ʻo Sīsū Kalaisi, ko hotau Fakamoʻui mo hotau Huhuʻí. ʻOku ʻuhinga ia ki he fakataha mai ʻa e fāmilí ʻi he Efiafi kimuʻa he Kilisimasí ke fakahoko ha efiafi fakafāmili ʻoku kau ki ai ʻa e tokotaha kotoa pē ʻi hono fakamatalaʻi, ʻi he laukonga, mo hono hivaʻi ʻo e ngaahi meʻa makehe naʻe hoko ʻi he ʻaloʻi ʻo e Pēpē ʻo Pētelihemá. Kuo hoko maʻu pē ʻeni ko e fakafiefia mahuʻinga taha ʻi homau ʻapí, pea ʻoku mau feinga ke tauhi e laumālie ʻo e faʻahitaʻú ʻaki ʻemau moʻui ʻaki ʻa e ongoongoleleí ʻi he ʻaho takitaha.

ʻŪ tā ʻo e ngaahi meʻa teuteu faka-Kilisimasí naʻe fai ʻe John Luke; kolopé naʻe faitaaʻi ʻe he Mountain High Maps © 1993 Digital Wisdom