Ko Hono Teuteuʻi ʻo e Kau Faifekau ki he Kahaʻú
ʻI heʻeku hoko ko ia ko ha mēmipa ʻo e Uooti Miliuoki Uisikoní, naʻe tataki au ʻe ha kau taki moʻui līʻoa. Naʻe hoko ʻemau ngaahi ʻekitivitií ko ha maʻuʻanga tokoni lelei ʻaupito ki hono fakatupulaki ʻo e ngaahi poto ʻi he fengāueʻaki fakasōsialé, tokoniʻi kimautolu ke mau ikunaʻi ʻa e ongoʻi feifeiʻavale ʻo e kei ʻi he ngaahi taʻu hongofulu tupú. Neongo ia, naʻe ʻi ai ha meʻa ʻe taha naʻe hoko ʻi he Mutualé naʻá ne fakafōtunga ʻeku moʻui kei talavoú. Naʻe hoko ʻeni ʻi he 1956, ko e taʻu ʻe 54 kuo hilí! Ka ʻoku ou kei manatuʻi lelei pē ia he ʻahó ni.
Lolotonga e Mutualé, he Pulelulu kotoa, ne ngāue fakataha ʻa kimautolu kau talavoú ke langa ha puipui fute ʻe fā (1.2-m) ʻo e Temipale fakaʻofoʻofa ʻo Sōlekí. Naʻa mau faʻu foki mo ha pousitā lahi ʻo fakaikiiki ai e taumuʻa mo e talanoa ʻo e Tohi ʻa Molomoná.
Naʻe maʻu foki ʻe heʻemau kau Sikauti ʻa e Fānau Tangata homau uōtí ha palepale ki he fakaʻaliʻali fakataʻu ʻo e ngaahi poto faka-Sikautí ʻi homau koló. Naʻe laungeau ha kau ʻaʻahi naʻa nau ʻahia homau palepalé ʻo mamata ʻi he ngaahi meʻa naʻa mau fakaʻaliʻalí. Naʻe tuʻu ha tokolahi. Naʻa nau fakaʻekeʻeke e fānau ʻi he Lakanga Taulaʻeiki Faka-ʻĒlone ne teunga sikautí ʻo fekauʻaki mo e taumuʻa ʻo e temipale naʻa mau fakaʻaliʻalí. Hili iá ne fakaʻekeʻeke ha tokolahi fekauʻaki mo e Tohi ʻa Molomoná. Ne fai ʻe kimautolu kau maʻu Lakanga Taulaʻeiki Faka-ʻĒloné ʻa homau lelei tahá ke fakamatalaʻi ia pea ne mau foaki ange leva haʻanau tatau takafi molū ʻo e Tohi ʻa Molomoná.
Ne ma ongoʻi mo haku kaungā Sikauti (naʻá ma ʻi he kōlomu tatau pē ʻo e kau akonakí) ʻo hangē ha ongo faifekau taʻu 20! Naʻá ma fakatou tukupā fakalongolongo pē te ma moʻui taau pea te ma ngāue fakafaifekau taimi kakato. Naʻe iku pē ʻo ma fakatou fakahoko ia—pea ʻokú ma fakamālō ai ki he Mutualé pea ki he kau taki moʻui mateaki ʻo e toʻu tupú.