ʻOku Ou Laukau ʻAki Koe
Lisiate Tomengi ʻAsanitei, Kana
ʻI heʻemau ngāue fakafaifekau ʻi Kaná, naʻa mau fō nusinusi pē he ʻaho teuteú. Naʻe teʻeki ai ke fō peheni ʻa ʻEletā Mosi, ko hoku hoa ne toki haʻu mei he ʻIunaiteti Siteití. Ka ko e tokotaha Kana foki au pea kuó u anga au ki ai.
Ko e ʻaho Mōnite kotoa pē naʻe nusi ai ʻe ʻEletā Mosi hono valá, ka ko ʻene vaeuá atu pē kuo kamata ke fetotoʻi hono ongo nimá mo e tukeʻi nimá. Naʻe fie maʻu leva ke u hoko atu ʻene foó ʻo toe fakalahi atu ia ki hono fakaʻosi ʻeku fō ʻaʻakú.
ʻI ha ʻaho Mōnite ʻe taha, naʻe hangē ʻoku kiʻi hohaʻá ʻa ʻEletā Mosi he hoko e taimi foó. Naʻe lavea hoku nimá he ʻaho kimuʻá, pea naʻá ne ʻiloʻi he ʻikai te u lava ʻo tokoni ange ki heʻene foó. He ʻikai te u lava ʻo fai mo ʻeku fō ʻaʻakú. Naʻe kamata ʻene foó, ka ko ʻene vaeuá pē kuó ne fie maʻu tokoni ʻo hangē ko ia ʻoku hoko maʻu peé.
Koeʻuhí naʻe ʻikai te u lava ʻo tokoni ki hoku hoá ʻi hono fai e foó, ne u fakalotolahiʻi ia ke ne kātaki—ke mālōlō hono nimá pea toe feinga pē. Naʻá ne mālōlō pea toe hoko atu. Ne u talaange te ne ʻilo pē ha founga ke fakaʻosi ʻaki. Naʻe kei mamahi pē hono ongo nimá mo e tukeʻi nimá, ka naʻá ne hoko atu pē. ʻI he ʻosi ʻa e foó, naʻá ne pehē mai, “ ʻOku ou laukau ʻaki au. ʻOkú ke laukau ʻaki au ʻe ʻEletā ʻAsanitei?”
Ne u taliange, “ ʻIo, ʻoku ou laukau ʻaki koe.”
ʻI heʻeku fakakaukau ki he meʻa ko ʻeni naʻe hokó, naʻá ku ʻilo ai ʻoku ʻafioʻi ʻe he Tamai Hēvaní ʻa e ngaahi meʻa te tau lavá, ka ʻokú Ne siviʻi kitautolu koeʻuhí ke tau lava ʻo fakatupulaki ʻa e ngāue faivelengá, kātakí, mo e faitotonú. ʻOkú Ne fiefia ʻi he taimi ʻoku tau fai ai e ngaahi fili totonú mo fakamahinoʻi ʻoku tau lava ke kātakiʻi hotau ngaahi faingataʻaʻiá.
ʻI he taimi ʻoku tau ngāue mālohi ai mo kātakiʻi e ngaahi ʻahiʻahi ʻoku tau fehangahangai mo iá, ʻoku lava ke tau lea ʻo pehē, “Tamai Hēvani, ʻokú Ke laukau ʻaki au?” ʻOku ou ʻilo ʻoku fiefia ʻa e Tamai Hēvaní mo Sīsū Kakaisi ʻi he taimi ʻoku tau kātaki aí pea te Na talamai ia kiate kitautolu ʻi ha ʻaho te Na talitali lelei ai kitautolu ki ʻapí.