Minahal nga Frieda
Ang mga young adult nagsulat og mga sulat nga nagtambag sa usa ka young adult nga babaye kinsa nangutana kon moipon ba siya sa iyang uyab.
Sa usa ka kalibutan nga nagkausab ang mga hiyas, ang pagpabilin nga matinuoron ngadto sa atong mga sumbanan mahinungdanon kaayo sa atong espirituhanon nga paglahutay. Ang tinuoray nga pagpasalig sa atong mga kaugalingon sa pagtamud sa atong mga pakigsaad makapalig-on kanato batok sa tintasyon.
Si Elder Neal A. Maxwell (1926–2004) sa Korum sa Napulog Duha ka mga Apostoles namulong mahitungod sa usa ka desisyon nga makatabang kanato sa pagpabilin nga matinuoron: “Si Josue wala magsulti nga magpili kamo sunod tuig kon kinsa ang inyong alagaran; siya namulong kabahin ‘niining adlawa,’ samtang aduna pay hayag sa adlaw ug sa dili pa ang kangitngit mag-anam-anam sa kagabhion. (Tan-awa sa Jos. 24:15.) … Lihok karon, aron inig ka liboan ka tuig sukad karon, kon molingi kamo og balik niining panahona, makaingon kamo nga kini mao ang usa ka panahon nga mahinungdanon—kini mao ang usa ka adlaw sa determinasyon.”1
Si Frieda,* usa ka young adult nga miyembro sa Simbahan sa Uropa, nag-atubang og ingon gayud nga panahon sa pagdesisyon. Siya nag-ingon nga gusto siya nga maminyo sulod sa templo inig abut sa panahon, apan naghunahuna siya nga moipon sa iyang uyab nga dili miyembro. Nagplano siya nga maghinulsol ug mobalik sa pagkaaktibo sa Simbahan human sa pipila ka tuig ug makigminyo og lain sulod sa templo, apan karon, nag-ingon siya, gusto lang niya nga maglingaw-lingaw.
Ang mga young adult sa Scandinavia gidapit sa pagsulat ngadto ni Frieda. Wala sila makaila sa tinuod niya nga pangalan o kon asa siya nagpuyo, apan sila nakigbahin og mga pagpamatuod ug tinuod nga mga kasinatian sa kinabuhi aron pagtabang kaniya sa paghimo og sakto nga pagpili. Ang mosunod mao ang mga kinutlo gikan sa mga sulat nga gisulat sa mga kaedad ni Frieda ug gikauyonan nga ipakigbahin.
Desisyoni ang Pagminyo sulod saTemplo
Sa wala pa ang akong higala nga si Erika* moipon sa iyang uyab, kinsa dili miyembro sa Simbahan, gipaniguro niya sa iyang pamilya nga magpabilin siyang duol sa ebanghelyo. Apan sukad nga si Erika nasulod sa mao nga sitwasyon, naglisud na siya sa paggawas. Naghunahuna siya nga sakit ug lisud na gayud kaayo ang pagbalik sa maayong dalan.
Walay swerte, ako adunay daghan nga mga higala kinsa, sama ni Erika, nahimong dili aktibo tungod kay naghunahuna sila nga makapabilin sila sa pagkontrolar sa ilang kaugalingon bisan og magpuyo sila gawas sa mga sumbanan sa Simbahan. Sa tinuoray, ang pagbaliwala sa mga lagda nakapahimong sayon alang ni Satanas sa pagkontrolar.
Nakakat-on ako gikan sa mga kasinatian sa akong mga higala. Sa dihang nag-edad ako og 17, nakahukom ako sa pagbaton og usa ka pagpamatuod nga dili gayud matarug tungod kay nasayud ko nga kinahanglanon ko kini kon gusto ko nga makalahutay sa espirituhanon nga paagi. Ang pagbaton og usa ka lig-on nga pagpamatuod ug ang kahibalo nga ang Langitnong Amahan adunay usa ka plano alang kanako mao ang nakaluwas kanako.
Adunay usa ka butang nga ako sigurado: Determinado ko nga magminyo sulod sa templo. Ang templo mao lamang ang paagi ngadto sa tinuod nga kalipay ug mao lamang ang paagi nga kita makapuyo uban sa Langitnong Amahan ug ni Jesukristo sa umaabut nga panahon. Kon gusto ko nga moadto sa templo, ako kinahanglan nga mosunod sa mga lagda sa ebanghelyo. Nakadesisyon ko sa pagsunod sa ebanghelyo tungod kay nasayud ko nga mao kini ang sakto nga butang nga angayng buhaton, bisan pa tingali og lisud kini.
Paggahin og panahon sa paghunahuna kon asa ka padulong, ug paghunahuna mahitungod kon asa ka dad-on ugma sa imong pagpili karon.
Amanda Bernskov, Denmark
Tan-awa kon Unsa Gayud ang Imong Gikinahanglan
Sa akong hunahuna labaw pa kay sa bisan unsang butang sa kalibutan kitang tanan gusto nga higugmaon. Apan ang tinuod nga gugma mas labaw pa kaysa kaibug lamang. Mao kini ang pagsalig ug paghunahuna kon unsa ang labing maayo alang sa ubang tawo. Kini makiangayon ug mainiton ug usahay adunay pagsakripisyo, nagpasabut nga andam kita nga mohatag ug moantus alang niini kon gikinahanglan.
Frieda, ang imong kinabuhi ug ang mga kinabuhi sa daghan pa nga mga tawo nagdepende sa mga pagpili nga imong pagahimoon sa umaabut nga panahon. Mahimong lisud ang pagpili sa sakto kon wala pa ka makahukom kon kang kinsang habig ka modapig. Hinumdumi nga si Satanas walay hunong sa pagtrabaho aron sa pagbungkag sa mga pamilya. Pagmaisugon sa pagsunod kon unsa ang imong nasayran nga sakto. Ayawg pili og ubos pa kay sa kaminyoon sa templo alang sa kahangturan.
Kon gusto ka og tinuod nga gugma, pangitaa ang tighatag sa tinuod nga gugma: ang Dios. Ang tinuod nga gugma usa ka espirituhanon nga tuga, dili usa ka sekswal nga pantasya. Kini gikan lamang sa Dios nga ikaw makadawat niining labing mahinungdanon sa tanang mga gasa.
David Isaksen, Norway
Pagdesisyon nga Mobalik
Sa dihang nag-edad pa ko og 17, misugod ko sa pagbati nga dili na ko makasabut sa mga tawo sa simbahan. Ug nianang sama nga higayon, ang akong mga ginikanan nagdiborsyo ug mihunong sa pagsimba. Padayon pa gihapon ko sa pagsimba, apan nawad-an ko og pagtuo sa mahangturon nga kaminyoon. Sa dihang nakaila nako si Kristian,* dili lisud nga ako motalikod sa Simbahan ug mopahilayo. Busa akong gibuhat.
Nagtipon mi hapit upat ka tuig sa wala pa kami nagbulag. Gusto ko nga mosugod og adto sa simbahan pag-usab, apan nahadlok ko nga ang tanang tawo mangutana sa tanang matang sa mga pangutana. Mibisita ko sa akong igsoong babaye. Didto sa iyang ward walay nakaila kanako o kon unsa na ko kadugaya nga nawala sa Simbahan, ug atol sa akong pag-istar nagsugod ko sa pag-adto sa simbahan pag-usab. Mipadayon ko og tambong sa akong kaugalingong ward sa dihang mipauli na ko sa balay. Sa unang Dominggo nahadlok kaayo ko, apan ang mga tawo nangalipay nga didto ko.
Nasayud ko nga kinahanglan kong mopili og usa ka habig; dili ko makapadayon sa paglakaw nga ang usa ka tiil anaa sa habig sa Ginoo ug ang usa anaa sa kalibutan. Misugod ko sa pagpakigkita sa akong bishop. Mitabang siya kanako nga masabtan ang Pag-ula. Usa kadto ka taas nga proseso sa paghinulsol—sa laing higayon usa gayud ka lisud nga butang. Anaa pa gihapon ko sa proseso, ug ako adunay daghan pa gihapon nga mga butang nga angayng makat-unan, apan mas malipayon ako karon. Nasayud ko nga akong gipili ang sakto sa dihang midesisyon ko nga mobalik sa Simbahan. Kabahin kadto sa pagdesisyon mahitungod sa unsay akong gibati nga sakto ug dayon sa paghimo niini.
Pangalan gipugngan
Barug nga Lig-on diha sa Imong Matarung nga mga Desisyon
Dili pa lang dugay ang akong usa ka higala nag-atubang og susama nga desisyon nga imong giatubang. Ang akong higala nga si Sarah* kaniadto kanunay adunay lig-on nga pagpamatuod mahitungod sa Simbahan ug sa mga kamatuoran niini. Sukad adtong mga batan-on pa kami, kaming duha ni Sarah adunay dakong tinguha nga magminyo sulod sa templo.
Sa dihang nag-edad siya og 17 o 18, iyang nakaila ang usa ka batan-ong lalaki ug nagsugod sa pagpakig-date . Aduna siyay talagsaon nga personalidad ug dali gayud nga magustohan. Dili siya miyembro, apan sa sinugdanan daw dili kadto usa ka problema.
Sa katapusan, nagsugod siya sa paghunahuna kon unsa kaha ang kinabuhi kon makigminyo siya kaniya, bisan og dili sa sulod sa templo. Naghunahuna siya: “Tingali magsilbi ra kini; tingali magkasabot ra mi. Tingali mausab ra siya inig abut sa panahon. Tingali madala ra nako siya ngadto sa ebanghelyo.”
Nagsige gyud siya og hunahuna mahitungod niini, ug siya mihilak ug siya nag-ampo. Nasayud siya sa iyang kinahiladman nga siya sa kanunay gusto gayud og kaminyoon sulod sa templo, apan ang iyang mga pagbati alang sa iyang uyab mao ang nakapahimo niini nga lisud alang kaniya sa pagdesisyon. Sa katapusan nakigbulag siya kaniya. Usa kadto sa labing lisud nga butang nga iyang nahimo sukad, apan iyang gibutang ang iyang pagsalig diha sa Ginoo.
Sa tingpamulak sa 2007 naminyo siya sa usa ka talagsaon nga lalaki. Na-sealed na sila karon sa usag usa niini nga kinabuhi ug sa kahangturan. Malipayon gayud siya nga siya midesisyon sa paghulat hangtud nga iyang makit-an ang usa ka tawo nga iyang gihigugma ug mahimong minyoan sulod sa templo.
Kon ikaw wala masayud kon unsa nga matang sa desisyon ang himoon, pag-ampo mahitungod niini hangtud nga imong masayran. Ibutang ang imong pagsalig diha sa Ginoo. Nasayud ako gikan sa akong pagtan-aw ni Sarah—ug gikan sa akong kaugalingong kinabuhi—nga kon kita mobuhat, Siya mopanalangin kanato.
Anna Lindgren, Sweden
Paghulagway sa litrato pinaagi ni John Luke; sa luyo © Shambhala Publications
Litrato sa Stockholm Sweden Temple © Stefan Hallberg