Mga Minugbo nga Balita sa Kalibutan

Ang Templo sa Ogden Bag-uhon

Ang duol na sa 40 ka tuig nga Templo sa Ogden Utah mag-agi og 18 ngadto sa 24 ka bulan nga dakong pagbag-o. Ang pinakaimportante nga desinyo nga anaa sa sulod sa templo magpabilin nga mao gihapon, apan ang gawas nga bahin mabag-o na ang hitsura, nga adunay bag-ong bato ug bildo. Ang building bag-uhon aron makapasar sa mga gikinahanglan sa pagsugakod sa mga linog, mabutangan og pinakabag-ong teknolohiya, ug maglakip sa mas makasarang nga ekipo nga adunay mas igo nga enerhiya. Ang usa ka estraktura sa parkinganan nga anaa sa underground idugang usab.

Honor Bee Charm Gimugna

Dungan sa daghang mga kausaban sa programa sa Personal nga Kauswagan, ang Honor Bee charm karon anaa na alang sa batan-ong mga babaye kinsa makahimo og labaw pa kay sa gikinahanglan. Aron makadawat sa charm, ang usa ka batan-ong babaye mobasa og balik sa Basahon ni Mormon ug mokompleto sa 40 ka dugang nga oras sa pagserbisyo human madawat ang iyang medalyon alang sa Pahalipay sa Batan-ong Pagkababaye. Kabahin niini nga pagserbisyo kinahanglang maglakip sa pagtabang og laing batan-ong babaye aron makakompleto sa iyang mga tumong sa Personal nga Kauswagan. Kini nga ganti usa ka gamay nga charm nga isul-ot diha sa mao gihapon nga kwentas kauban sa medalyon.

Exhibit Nagpaila sa mga Santos sa Latin America

Ang Church History Museum bag-ohay lang nga miabli og duha ka pinulongan nga exhibit nga gitawag og “Mi Vida, Mi Historia: Ang mga Sugilanon sa Hugot nga Pagtuo ug Inspirasyon gikan sa mga Santos sa Latin America,” nga nagpahayag sa espirituhanong mga kasinatian gikan sa mga kinabuhi sa 24 ka mga miyembro. Ang ilang mga litrato gipangsab-it hangtud sa pagkahuman sa exhibit, ug ang booth sa audiovisual nga magdawat og pagbinayloay sa hunahuna maoy naghatag sa mga bisita og dugang panglantaw sa kinabuhi sa mga miapil. Ang exhibit makita usab sa internet sa Spanish ug sa Iningles diha sa lds.org/museum. I-klik ang Exhibits and Galleries, dayon sa Current Exhibits.